کابل و مزارشریف شهرلری یشاوچیلریدن قطارینینگ ایتیشلریچه، نیازلری بولگن سوونی تامینلش اوچون هر کونی ساعتلرچه یول یوریشگه مجبورلر.
مزارشریف شهری کارتهی آریانا یشاوچیسی مریمنینگ ایتیشیچه، اویلری یقینیده سوو یوقلیگی، او و عایلهسی اوچون تیریکچیلیکنی قیینلشتیرگن. «اینگ کته قیینچیلیکلریمیزدن بیری اوییمیز یقینیده ایچیملیک سوو یوقلیگی دیر. سرک یقینیده بولگن عمومی بیر نلدن سوو آلهمیز. هر کونی نیچه مرته باریب و بشکهلرنی تولدیریشیم کیرهک. شونینگدیک بالهلریم هم حتا سوو آلیب کیلیش گه یاردم بیرهدیلر.»
او، بالهلرینینگ ساغلیق وضعیتیدن خواطر بیلدیریب و کوپهیتیریشیچه: «قیزیمنینگ بویرهکیده تاشی بار، شفاکارلر پاک و قینهتیلگن سوو ایچیشینی ایتگن، بیراق اقتصادی امکانیتیمیز یوق که هر کونی سوونی قینهتسک.»
شونینگدیک کابل ده هم یشاوچیلر بو کبی قیینچیلیکلر بیلن روپهرهلر. کارتهی سخی یشاوچیسی بولمیش نورگلنینگ ایتیشیچه، اویلریده قودوق سووی قوریب و قوشنیلریدن سوو آلیشگه مجبورلر. «قودوغیمیز قوریگن، قوشنیلریمیز اوییدن سوو آلیب کیلهمیز. ۱۲ ته بشکهم بار که تولدیریشیم کیرهک. نیچه ساعتیم بو ایش بیلن اوتهدی.»
کابل شهرینینگ اوشبو یشاوچیسیگه کوره، هر کونی سوو آلیب کیلیش اونی ساغلیق قیینچیلیکلریگه روپهره قیلگن. «کته کته بشکهلرنی کوترگنیم اوچون، بیر، قول و ایاغیم آغریدی.»
شوندهی بیرحالده، عایلهلردن قطاری حویلیلریدهگی قودوق سووی افلاسلیگی سبب، نیازلری بولگن سوونی تانکرلردن ساتیب آلیشگه مجبورلر. کابل شهری کارتهی مامورین یشاوچیسی وحیدنینگ ایتیشیچه: «بوندن آلدین سوویمیز یخشی ایدی، بیراق سطلنی تولدیرگنیمیزده، سطلنینگ قویی قسمی ریگدن تولهدی.»
وحیدنینگ کوپهیتیریشیچه، سوو ساتیب آلیش خرهجتی، اونینگ اوچون کوپینچه قیینچیلیککه سبب بولگن. «هر بشکه سووینی پولگه آلهمیز. آیده صرف-خرهجتیمیز کوپهیهدی. عایلهده ۱۵ کیشیمیز و درآمدیمیزدن قریب یریمی، سوو ساتیب آلیشگه کیتهدی.»
شونینگدیک کابلنینگ کارتهی نو یشاوچیسی مونیک محمدی، ایچیملیک سوودن فایدهلنیشنینگ برقرارسیزلیگیدن شکایت قیلیب و ایتیشیچه: «قودوغیمیز سووی قوریگن. هر کیچه نلدن باریب سوو آلهمیز. بعضی پیتلرده نوبت هم ییتیشمهیدی.»
بو گزارشده صحبت قیلگن یشاوچیلرنینگ ایتیشلریچه، ایچیملیک سوودن فایدهلنه آلمسلیک، اقتصادی قیینچیلیکلر گه علاوه، کوپینچه چرچهش و عایلهلر آرهسیده ساغلیق خواطرلرگه سبب بولگن.
شهری کانالیزاسیون و سوو ییتکزیش دولتی شرکت مسئوللرینینگ ایتیشلریچه، اقلیم اوزگریشلری اهالینینگ سوودن فایدهلنیشنی چیکلنتیرگن، بیراق وضعیت یخشیلنیشی اوچون بیر قطار لایحهلر عملگه آشیریلماقده. اوشبو شرکت اجرایی باشلیغی غلامالرحمان کاظمنینگ ایتیشیچه: «کابل اوچون ییریک لایحهلر نظرگه آلینگن. جملهدن پنجشیر و بیر قطار توغانلردن سوو انتقال بیریلیشی که اولرنینگ یکونلنیشی بیلن، مینگلب عایلهنینگ ایچیملیک سوودن فایدهلنیشی ممکن.»
افغانستان، قریب سونگی بیر دههده قوروقچیلیککه دوچ بولیب و خلقارا نهادلرنینگ خواطرلری اساسیده، یشاوچیلرنینگ ایچیملیک سوودن فایدهلنیشی چیکلنگن.
