جاری قویاش ییل ۱۲-عقرب مملکت شمالیده یوز بیرگن زلزله، سرپل ولایتی اینیقسه الجهاد تومنیده سوو منبعلرینی جدی شکلده بحران بیلن روپهره قیلگن. الجهاد تومنی یشاوچیلریدن قطارینینگ ایتیشلریچه، بوندن آلدین ایچیملیک و ایکینچیلیک اوچون فایدهلنیلهدیگن «کنده» اسملی سوو ذخیرهلری زلزله نتیجهسیده خراب بولگن.
اوشبو تومن یشاوچیلریدن قدرتالله، زلزله یوز بیرمهگنیدن آلدین عایلهلردن قطارینینگ، بیرگه بیر سوو کندهدن فایدهلنیشینی بیان قیلیب و ایتشیچه: «کندهلر بوتونلی خراب بولدی. بوندن آلدین بیر قطار کیشی بیر تانکر سوو ساتیب آلهر ایدی و مذکور کندهلرگه ذخیره قیلیب، بو سوودن تورت-بیش عایله فایدهلنهر ایدی، بیراق حاضر برچهسی خراب بولیب و اولرده سوو توختمهیدی.»
اوشبو تومن یشاوچیلریدن باشقه بیری محمدظریفنینگ ایتیشیچه، زلزله نتیجهسیده اهالیگه کوپ زیان ییتیشگن. «زلزلهده اهالینینگ سوو ذخیرهلری خراب بولگن و اویلری زیان کورگن. اولرنینگ اصلی قیینچیلیگی ایچیملیک سوو دیر. حکومت و یاردم بیرووچی نهادلرنینگ بو توغریده توجه قرهتمهگنی صورتده، قیینچیلیکلرنینگ کوپهیشی ممکن.»
شونینگدیک الجهاد تومنی یشاوچیلریدن محمداعظم، حاضرگی وضعیتنی یامان دیب و ایتیشیچه: «کندهلر یاریلگن و اویلر بیلن مسجدلردن قطاری بوزیلگن. بوندن آلدین یامغیر و اوشبو کندهلردن سوو تامین قیلهر ایدی، لیکن حاضر یوز اویدن یالغیز بیر اویده سوو بار. یشاوچیلر نیازلری بولگن سوونی نعیمآباد منطقهسیدن کیلتیرهدیلر. بو ییرده بیرته قودوق بار و کوپ وقت نوبت هم ییتیشمهیدی.»
شوندهی بیرحالده، سرپل حادثهلرگه قرشی کورهش اداره باشلیغی صفتالله صفوان، اوشبو ولایتده سطحی و ییر آستی سوولرنینگ جدی شکلده کمهیگنینی تصدیقلب و ایتیشیچه، یوز بیرگن سونگی زلزله، الجهاد و صیاد تومنلریده، اهالینینگ ایچیملیک سوولری ذخیره بولهدیگن یگانه منبع بولگن کندهلرگه جدی زیان ییتیشتیرگن.
اونینگ کوپهیتیریشیچه: «سرپل ده سوو منبعلری جدی شکلده کمهیگن. زلزله الجهاد و صیاد تومنلریده کندهلرگه زیان ییتیشتیرگن و ذخیره بولگن سوولر ییرگه کیتگن. ییر آستی سوولر سطحی ۲۰ متر دن ۷۰،۸۰ و حتا ۱۰۰ متر گه ییتیشگن. بلخاب دریاسی و باشقه سوو منبعلری سیزیلرلی درجهده کمهیگن. کندهلرنینگ اورتهدن کیتگنی اهالینینگ جدی قیینچیلیکلر بیلن روپهره بولیشیگه سبب بولگن. بو توغریده اسلام امیرلیگی و یاردم بیرووچی موسسهلرنینگ همکارلیک قیلیشی کیرهک.»
ایتیلیشچه، کیتمه-کیت قوروقچیلیک و طبیعی آفتلر، سرپل ولایتی یشاوچیلرینینگ تیریکچیلیک وضعیتینی جدی قیینچیلیکلر بیلن روپهره قیلیب، باشقه هر وقتگه قرهگنده ایچیملیک سوو تامینلنیشی و سوو منبعلرینینگ برقرار شکلده مدیریت بولیشی، کوپراق اهمیتگه ایگه بولگن.
