اوتگن هفته جمعه کونی و جاری هفته یکشنبه کونی بدخشان ولایتینینگ بیر قطار تومنلریده یوز بیرگن سوو تاشقینلر نتیجهسیده، اهالیگه کوپینچه زیان ییتیشگن.
بدخشان ولایتی جرم تومنی یشاوچیسی عبدالجمیلنینگ ایتیشیچه، جمعه کونی عصر پیتی یوز بیرگن سوو تاشقینلر طفیلی، اونلب جریب ایکینچیلیک ییر و اویی بوزیلگن. اونینگ کوپهیتیریشیچه: «اهالینینگ کمیده یوزلب جریب ییری اورتهدن کیتگن. شونینگدیک سوو ییتکزیش ترماقلر هم بوزیلگن.»
بیزلرنینگ «ایکس» ترماغی ده هم تعقیب قیلینگ!
جرم تومنینینگ «خرنداب بالا» قیشلاغی یشاوچیسی بولمیش عبدالجمیلنینگ کوپهیتیریشیچه، مذکور سوو تاشقینلر نتیجهسیده، محل یشاوچیلریگه کوپینچه زیان ییتیشیب و اولرنینگ تیزلیک بیلن یاردم بیریلشیگه نیازلری بار.
بدخشان ولایتی یمگان تومنی یشاوچیسی بولمیش سیداحمدنینگ ایتیشیچه، اوشبو تومنده یوز بیرگن سوو تاشقینلر اهالیگه کوپینچه زیان ییتیشتیرگن. اونگه کوره، یمگان تومنیده شنبهدن یکشنبه گه اوتر کیچهدن اوتگن کونی ایرتنگ چاغیگچه (۱۴-ثور، یکشنبه) سوو تاشقینی دوام قیلگن.
سیداحمدنینگ کوپهیتیریشچیه، یوز بیرگن مذکور سوو تاشقینلرده ایکینچیلیک ییرلر و اونلب یشش اوی بوتونلی بوزیلگن و کوپینچه عایله اویسیز-جایسیز قالیب و عاجل یاردم گه نیازلری بار. «اوچ-تورت جریب بولگن بیر باغ و قریب اوچ جریب بولگن باشقه بیر باغ بوزیلگن. قریب ۵ میلیون و ۶ میلیون اوزیمیز زیان کورگنمیز.»
بدخشان طبیعی حادثهلر گه قرشی کورهش ریاستینینگ حادثهلرگه ییتیشیش بوییچه آمری محمد کامگار گه کوره، سوو تاشقینلر یوز بیرگنی نتیجهسیده، اوشبو ولایت جرم، بهارک، یمگان و شهدا تومنلریده ایکینچیلیک ییرلری، باغلر، یشش اویلر، سرکلر و سوو ییتکزیش ترماقلری گه زیان ییتیشگن. جناب کامگارنینگ کوپهیتیریشیچه، یاردم بیرووچی تیملر، تیکشیریش مقصد اوشبو تومنلردهگی زیان ییتیشگن منطقهلرگه بارگنلر.
بیزلرنینگ فیسبوک صحیفهمیزگه باش اورینگ!
محمدکامگار گه کوره، تیکشیریشلری یکونلنگنیدن کیین افغان قیزیل آی جمعیتی کبی یاردم بیرووچی نهادلر هماهنگلیگی بیلن زیان کورگن کیشیلرگه یاردم بیریلیشی ممکن.
ایتیش کیرهک که، بدخشاننینگ جرم تومنیده جمعه کونی یوز بیرگن سوو تاشقینلر نتیجهسیده، ایکی کیشی اولیب و اوچ کیشی هم یرهلنگن.
