۲۹ میزان/۲۱ اکتوبر، اوزبیک تیلی‌نینگ ملی کونیگه تینگ. اوزبیک تیلی ملی کونی افغانستان‌ده‌گی اوزبیک زبانلر اوچون مهم مدنی سنه‌لردن بیری دیر. بو کون آنه تیلی‌میزنی اسره‌ب-اوه‌یلش ، اوزبیک ادبیاتی و تاریخینی تنیشتیریش، شاعر و یازووچیلرنی اعزازلش همده اوشبو مدنی میراث‌نی کیله‌جک اولادلر گه ییتکزیش اوچون مهم امکانیت دیر.
افغانستان‌ده اوزبیک تیلیگە ۱۳۸۲- قویاش ییلی اوچینچی رسمی تیل مقامی بېریلدی. افغانستان اساسی قانونی‌نینگ ۱۶-ماده‌سیده بو حقده جمله‌دن شونده‌ی یازیلگن: «اوزبیکچه، تورکمنچه، پشه‌یچه، نورستانچه، بلوچچه تیللردن بیریده کوپچیلیک اهالی سوزلشه‌دیگن حدودلرده اوشه تیل، پشتو و دری تیللریگه قوشیمچه اوچینچی رسمی تیل صفتیده بوله‌دی و اونینگ ایشله‌تیش اصولی قانون آرقه‌لی بیلگیلنه‌دی.»
کیین ایسه ۲۹-میزان، هجری قویاش ۱۳۹۸-ییلده افغانستان اسلامی جمهوریتی دوریده مملکت تقویمی گه رسماً کیریتیلدی. بونده‌ی قرار بیر گروه اوزبیک ضیالی‌لری، استاذلر، شاعرلر، یازووچیلر و مدنی فعاللرنینگ تکلیفی همده سعی-حرکتلری نتیجه‌سیده قبول قیلینگن.
اوزبیک تیلی تورک تیللری عایله‌سیگه منسوب بولیب، قرلق شاخه‌سیگه کیره‌دی. بو تیل مرکزی آسیا و افغانستان شمال ولایت‌لری اهالیسی کوپچیلیگی‌نینگ تیلینی تشکیل بیره‌دی.
