کابلنینگ بیر چیکهسیده جایلشگن سرای شمالی کمپی، ایران دن قیتگن مهاجرلر اوچون وقتینچهلیک باشپنهگه اَیلنگن که بو ییرده، نازک خیمهلر، ایسیق کونلر، قرانغو کیچهلر همده برقسیزلیک، قیتگنلرگه چیدهب بولمس شرایطلرنی اورته گه کیلتیرگن.
بو کمپ ایچیده، معلومات آلیش اوچون بیر غرفه قوییلگن که بو غرفهده مهاجرلر اوز معلوماتلرینی ثبت قیلیشلریدن کیین، ولایتلریگه یوباریلش اوچون ترتیبگه سالینهدیلر. مذکور مهاجرلردن قطاری اوشبو غرفه اطرافیده ییغیلیب، هر بیری اوزلری و عایله اعضالرینینگ ولایتلریگه تیزراق قیتیشی اوچون امکانیت ایزماقده.
بو آرهده، خیمه گه تکیه قیلیب، قوللرینی تیزهسیگه قوییب اولتیرگن بیر ییگیتنینگ ایتیشیچه، افغانستان گه قیتیش پیتده، برچه نرسهسی ایران ده قالگن و مذکور مملکت پولیسی او و عایله اعضاسینی بوش قول بیلن چیقرگن. ایراننینگ زاهدان شهریده توغیلگن ۲۰ یاشر داوودنینگ ایتیشیچه، بیرینچی مرته افغانستان توپراغیگه آدیم باسگن که بوندن آلدین بو مملکت آتینی یالغیز، عایلهسیدهگی بویوک کیشیلردن ایشیتگن. «ایراننینگ زاهدان شهریده توغیلدیم. اوشه ییرده ایدیم و ۱۵ ییل هم کرمان ده ایدیم.».
بیزلرنینگ فیسبوک صحیفهمیزگه باش اورینگ!
اونینگ کوپهیتیریشیچه، بالهلیک و اوسمیرلیک دوریده مکتب گه باریش اوچون کوپ قیزیققن و هر مرته مکتبگه کیتهیاتگن بالهلر و اوسمیرلرنی کورگنیده بو قیزیقیش ینهده کوچهیگن. اونگه کوره، مهاجرت برچه نرسهنی اوندن آلگن؛ ایلک قولدن بیرگن نرسه، تعلیم حقی ایکن؛ چونکه مهاجر بولگنی سبب مکتب باریشدن محروم بولگن. «نیچه ییل آلدین رخصت بیرمس ایدیملر و ۱۰ ییلدن بیری مکتب گه باریش اوچون رخصت بیرهدیلر. مینی یاشیم هم یوقاری ایدی و مکتب باره آلمهدیم. حاضر مکتبدن محروم بولگنمین و کوزدن عاجز بیر کیشی کبی بولگنمین.»
او، کوزلریگه یاش اَیلهنیب و باغزی تولگن بیر حالده، سوزلریگه دوام بیریب و ایتیشیچه: «جودهیم یامان بیر دولتی بار و کوپ اذیت قیلهر ایدیلر. هیچ کیم گه حرمت قایل ایمس ایدیلر و زورهوانلیک بیلن یاندهشهر ایدیلر.»
بغلان ولایتی یشاوچیسی بولمیش داوودنینگ کوپهیتیریشیچه، اوتمیشده اونینگ خیالیده افغانستان توغریسیده قرانغو بیر تصویر بار ایکن؛ بیراق اوشبو توپراققه آدیم باسیش بیلن اونینگ حیاتیگه بیراز خواطرجمعلیک قیتگن. «بو ییرده برچه کیشیگه حرمت قایل بولینهدی و اوزیمیزنینگ اولکهمیز دیر. ایران ده افغانستانلیک قاچقینلرگه هر نرسه دیهر ایدیلر.»
ایران ده کاشیکارلیک ایشی بیلن شغللنگن داوود، افغانستاننینگ بیر قطار بولیملریده قوریلیش و قیته قوریلیشده مهارتلریدن فایدهلنه آلیشی توغریسیده امید قیلهدی. «انشاءالله یخشی بیر ایش تاپه آلسهک و انشاءالله که اولکهمیز هم یخشی بولسه. هر قنچه هم ایشلسهک اوزیمیزنینگ اولکهمیز دیر و ارزشیمیز بیلینهدی. ایراننی آباد قیلدیم و اصلا ارزشیمیز هم بیلینمهدی.»
داوود یانیده، اونینگ آنهسی بولمیش سهیلانینگ ایتیشیچه، بالهلری ایران ده مذکور مملکتدهگی بالهلر تامانیدن اذیت بولیش اوچون حتا بالهلیک اویینلریدن هم محروم بولیب قالگن ایکنلر. «قوشنیلریمیز افغانی دیب بالهلریمینی اذیت قیلهر ایدی و اولرنی کلتکلهر ایدی. بیزلر هم بالهلریمیزنی اوینهش گه قویمس ایدیک و اویگه کیلتیرهر ایدیم که بو ییر اولکهمیز ایمس دیب. اولر اذیت قیلسه هم سیز هیچ نرسه دیهینگ دیهر ایدیک.»
بیزلرنینگ «ایکس» ترماغی ده هم تعقیب قیلینگ!
بیش کیشیلیک عایله سرپرستی بولمیش سهیلانینگ کوپهیتیریشیچه، بالهلری قرنینی تویغزیش اوچون یاردم گه نیازی بار. «حکومتدن بیزگه یاردم بیریلیشینی ایستهیمیز. نه اوییمیز بار، نه ییریمیز بار و هیچ نرسهمیز یوق. تورموش اورتاغیم فلج دیر. یورهک کسللیگی بار و ایشله آلمهیدی.»
شوندهی بیرحالده، بیرلشگن ملتلر تشکیلاتینینگ اعلام قیلیشیچه، جاری قویاش ییل باشلنگنیدن بویان قریب ۱.۹ میلیون افغانستانلیک قاچقین قوشنی مملکتلردن چیقریلگن که بو وضعیت، بودجه کملیگی سبب اوشبو تشکیلاتنینگ اولرگه یاردملرینی دوام بیریش توغریسیده خواطرلنتیرگن.
لیکن داوود و عایلهسی، باشقه مینگلب عایله کبی بوش قول بیلن افغانستان گه قیتگنلر و اولر آچ قالمسلیکلری اوچون حکومت و یاردم بیرووچی نهادلر آرقهلی قوللب-قوتلنیشلرینی کوتیب تورگنلر.
