سمنگان ولایتی خُلم تومنیدهگی باغدارلر و انار ساتووچیلردن قطارینینگ ایتیشلریچه، پاکستان بیلن تجاری یوللرنینگ یاپیق قالگنی سبب، محصوللرینینگ ساتیلیشی یریم گه ییتیشگن.
مذکور باغدارلر و انار ساتووچیلرنینگ کوپهیتیریشلریچه، آلیش-بیریش یوقلیگی و بو میوه قیمتی کمهیگنی اولرنینگ ایشی برابریده کوپینچه زیان کوریشلریگه سبب بولگن. خلم تومنیدهگی باغدارلردن بیری ابراهیم، حاضرگی وضعیتدن خواطر بیلدیریب و ایتیشیچه: «پاکستان یولی یاپیلگنی اوچون کوپ زیان کورگنمیز. بوندن آلدین بیر سیر انارنی ۲۵۰ افغانی گه ساتهر ایدیک و حاضر ایسه ۱۸۰ و حتا ۱۰۰ افغانی گه ساتهمیز. اوزوم هم شو رقم؛ اوتگن ییل بیر سیر اوزومنی ۳۰۰ افغانیگچه ساتهر ایدیک، بو ییل ایسه ۵۰ افغانی گه ساتیشگه مجبورمیز.»
مذکور تومندهگی باغدارلردن باشقه بیری محمدانورنینگ ایتیشیچه، قوروقچیلیک، زلزله کبی طبیعی واقعهلر و حاضر ایسه بازار یوقلیگی، حیات کیچیریشنی اولرگه قیینلشتیرگن. اونینگ ایتیشیچه: «بو منطقهده، انار، زردآلو، انجیر و بادام بار. پاکستان یولی یاپیق قالگنیده، سوداگرلر ذخیره بولگن انارنی ساته آلمهیدی. قوروقچیلیک باغلریمیزگه زیان ییتیشتیرگن و زلزلهدن کیین اویلر هم بوزیلدی؛ حاضر بازار هم خراب بولگن.»
خُلم تومنیده اوچ جریب ییرگه انار باغی بولگن محمد خالدنینگ ایتیشیچه: «منطقهمیز انار و انجیرگه شهرتی بار. انار ساتیب آلهمیز و ساووقخانه گه قویهمیز و کیین پاکستان همده باشقه مملکتلرگه صادر قیلهمیز. حاضر پاکستان یولی یاپیلگن و بیزلرگه کوپ زیان ییتیشدی. مناسب بازار هم یوق.»
شوندهی بیرحالده، بلخ سودا و صناعت ریاستی مسئوللرینینگ ایتیشلریچه، صادرات اوچون ینگی یوللر یرهتیلیب و سوداگلر، هیچ بیر توسیقلیک بولمسدن اوشبو ینگی یوللردن فایدهلنه آلهدیلر.
بلخ سودا و صناعت باشلیغی امیرمحمد متقینینگ اورغولشیچه، حیرتان بندری آرقهلی ایکینچیلیک محصوللرنینگ ۲۴ ساعتلیک شکلده صادر بولیش امکانیتی یرهتیلگن. «نیچه مرته اوزبیکستان مسئوللری بیلن صحبت قیلدیک و خوشبختانه ایچکی تولیدلر و ایکینچیلیک محصوللر صادراتی اوچون ییترلی آسایشتهلیکلر یرهتیلگن. سودا و صناعت وزیرلیگی مملکتدن تشقیده بیر قطار کورگزمهلرنی اوتکزگن که افغانستان تولیدلریگه بازار یرهتیلسه. سوداگرلرگه حیرتاننینگ ترانزیتی یولی آچیقلیگیدن ایشانچ بیرهمیز. هیچ بیر قیینچیلیک یوق و ایکینچیلیک محصوللر تعرفهسی هم آلینمهیدی. برچه کیشی ایکینچیلیک محصوللرینی اورته آسیا و حتا روسیه گه صادر قیله آلهدی.»
پاکستان بیلن تجاری قتناو یوللر یاپیق قالگنیدن ۵۰ کوندن کوپراق بولگن و بو مدتده، بدیل یوللر آرقهلی تجارت عملگه آشیریلیشی مقصد، سعیوحرکت بولگن.
بوندن آلدین، اسلام امیرلیگی مالیه وزیرلیگی، پاکستان بیلن سوداگرلیک علاقهلر کیسیلگنینینگ افغانستان تجارتی جریانیگه سلبی تاثیری بولمهگنینی معلوم قیلگن ایدی.
