خوست ولایتیده سوداگرلردن بیرقطاری بوگون (۲۵-عقرب/۱۶-نومبر، یکشنبه) بو ولایت محلی مسئوللری بیلن اۉتکزگن ییغیلیشده، پاکستان بیلن سودا اوچون جاری قیلینگن چېکلاولردن سۉنگ، اسلام امیرلیگی باشقه مملکتلر بیلن سودا آلیش-بیریش یونهلیشلریده ایریم قولیلیک یرهتیش گه تأکیدلهگنلر.
اوشبو سوداگرلر گه کوره، پاکستان هر ییلی ینگی میوه و سبزهواتنینگ ییغیم-تیریم موسمیده، افغانستان توارلریگه سودا یوللرینی یاپهدی.
سوداگرلردن بولمیش انور افغاننینگ ایتیشیچه، اوشبو ولایتده غلامخان چېگره بندری یاپیلگنی بیلن، سوداگرلر میلیونلرچه افغانی ضرر کوریشگن. اونگه کوره، سوداگرلر باشقه مملکتلر بیلن سودالرینی کېنگهیتیریش اوچون سعی-حرکت قیلماقده. بو سوداگرلر، اسلام امیرلیگیدن ویزه صادر قیلیش و باشقه اساسی احتیاجلر ساحهسیده عملی چاره کوریشینی اېستهیدیلر.
او شوندهی دیېدی: «تورلی مملکتلر بیلن شرطنامهلر توزیلگن، یوک آرتیش جریانی دوام ایتماقده و توارلر حرکتده. بلکی ۱۰ یا کی ۱۵ کون تأثیر قیلیشی ممکن؛ بیراق اوزاق مدتده افغانستان هر دایم توارلر گه توله بولهدی. بیز سوداگرلر مقابل یوللرنی تاپگنمیز و ېنه هم تاپهمیز. پاکستان یولی یاپیق بولهدیمی یا کی آچیق – بو بیز گه تأثیر قیلمهیدی.»
شو بیلن بیرگه، خوست ولایتیده سوداگرلردن باشقه بیری گل افغان، پاکستان خلقارا قاعدهلر اساسیده افغانستانلیک سوداگرلر بیلن معامله قیلمهیدی شو سببلی بو مملکت بیلن سودانی کمهیتیریش ضرور دیېدی.
اونینگ ایتیشیچه: «بیزنینگ اېستهگیمیز شو کی، حکومت باشقه یوللرده یرهتگن قولهی لیکلر بیز گه هم ویزه، پاسپورت و قتناو یوللر بارهسیده تقدیم ایتیلسین و ویزهلر همده ترانزیت بوییچه معمالریمیز حل ایتیلسین.»
عینحالده، خوست ولایتی سودا و سرمایه یاتقیزیش اتاق باشلیغی نواب امیرزی، پاکستان بیلن سودا یوللری یاپیلگنی بیلن، بازارده اساسی توارلر نرخی ثابت تورگنینی معلوم قیلهدی.
اونینگ تأکیدلشیچه، خوستدهگی سوداگرلر باشقه مملکتلر بیلن سودانی کېنگهیتیریش گه تیارگرلیک کوریب و بازار برقرارلیگینی سقلش گه صادقلر. او شوندهی دیېدی: «حاضر خوستده آزیق-آوقت حتا پاکستان گه قرهگنده ارزانراق دیر، چونکی گوروچ، یاغ و باشقه محصولاتلر اۉزبېکستان، قزاقستان و باشقه مملکتلردن وارد قیلینهدی. شونینگدیک، اۉزبېکستان بیلن توزیلگن ینگی شرطنامه گه کوره، بیزنینگ صادراتیمیز اروپا مملکتلریگه آسانلیک بیلن یېتیب بارهدی.»
خوست محلی مسئوللری، سوداگرلرنینگ قیینچیلیکلرینی یقیندن تینگلش اوچون بوگونگی ییغیلیش اۉتکزیلگنینی ایتهدیلر.
خوست حاکمی عبدالله مختار، سوداگرلر گه اولرنینگ قیینچیلیگینی پایتخت کابلده اسلام امیرلیگی عملدارلری بیلن شریک قیلیب و باشقه مملکتلر بیلن سودا اوچون قولیلیک یرهتیلیشی ساحهسیده سعی-حرکت بولیشیدن ایشانچ بیرگن. «خلقنینگ احتیاجلرینی قاندیریش اوچون اسلام امیرلیگینینگ قراری یانیده توریبمیز و مقابل یوللرنی تاپماقدهمیز. شونینگدیک، ضرر کورگن سوداگرلر و باشقه کیشیلر گه هم یاردم قولینی چوزهمیز.»
اوتگن هفته، اسلام امیرلیگی باش وزیرینینگ اقتصادی اورین باسری ملا عبدالغنی برادر کابلده سوداگرلر بیلن اولتیریب، اولردن پاکستان بیلن سودالرینی کمهیتیریب و باشقه مملکتلر بیلن سودالرینی کېنگهیتیریشنی سورهگن اېدی.
