بوگون کابل ده انسان حقلری و زوروانلیک نی اورته دن آلیب کیتیش موسسهسی همده مدنی جماعه و بشر حقلری شبکهسی ” افغانستان ده ضرر کورهدیگن اقلیتلر و تینچلیک پروسهسی” آتیدهگی تیکشیرو نتیجهسینی ترقهتگن. اوشبو تیکشیروده ۹ ولایت نینگ ۱۸ متخصصی و ۵۹۵ اقلیتلر اعضاسی، مدنی جماعه نهادلری ویاشلری بیلن ۵۰ گروهی بحت اوتکزیلگن.
اوشبو تیکشیرو نتیجهسیگه کوره، افغانستان ده یشهیدیگن کوپینچه اقلیتلر حاضرگی تینچلیک مذاکرهسی اولردن نمایندهلیک ایتمسلیگی نی بیلدیرگنلر.
انسان حقلری و زوروانلیک نی اورتهدن آلیب کیتیش موسسهسی نینگ اجرائی باشلیغی عبدالودود پدروام نینگ ایتیشیچه، اوشبو تیکشیروده دین، مذهب، قوم و تیل معیار گه آلینگن.
جناب پدرام گه کوره، اقلیتلر کوپینچه ضررنی زوروانلیک دن کورگنلر و افغانستان حکومتی اولکه ده یشهیدیگن اقلیتلرگه توجه قیلیشی لازم.
جناب پدرام نینگ ایتیشیچه، افغانستان اقلیتلر ییری بولگن و اقلیتلر نینگ قطاری قدرت ده بولگن و قطاری هم قدرت ده بولمگن.
اوشبو تیکشیرو جریانیده افغانستان اقلیتلری، افغانستان حکومتی، طالبان و دنیا جماعهچیلیگی دن بولگن ایستکلرینی هم بیان ایتیب، افغانستان دولتی بیلن طالبان گروهی نینگ آرهسیده دوام ایتهدیگن مذاکره ده حصهلری بولیش نی سورهگنلر.
اوشبو اقلیتلر طالبان گروهیدن بیرگن سوزلرینی عملگه آشیریب، مذهب، تیل و قومی اقلیتلر نی نظر گه آلمسدن افغانستان یشاوچیلریگه سیاسی حق و ایرکینلیک بیریش لرینی سورهگنلر.
دولت نینگ بشر حقلری بوییچه وزیری خانم سیما سمر نینگ ایتیشیچه، اوروش و کرونا ویروسی کوپهیشی بهانهسی بیلن اقلیتلر حقی ایاق آستی بولمسلیگی کیرهک.
اوشبو تیکشیروگه قتنشگنلر، افغانستان تینچلیک پروسهسیدن خواطر بیلدیرگنلر و اولر نینگ کوپینچه خواطری هم افغانستان ده ضرر کورهدیگن اقلیتلر وضعیتی بولگن.
