امیدالله بیانی قلمی گه منسوب تیلشناسلیککه تیگیشلی «اوزبیک فرازیولوژیسی و اونینگ اورگنیلیشی» ناملی اثر چاپدن چیقدی.
اوشبو اثر، ۳۰ جدی/ ۲۰ جنوری، سهشنبه کونی، بلخ مرکزی مزارشریفده چاپدن چیققن.
«اوزبیک فرازیولوژیسی و اونینگ اورگنیلیشی» اثری عباره، فرازیولوژی و اولرنینگ ترقیاتی جریانلرینی اورگنیشگه بغیشلنگن.
معلوماتلر گه کوره، بو ینگی اثر بیانی اجتماعی و فرهنگی جمغرمهسی مالی یاردمیده ۵۰۰ نسخهده چاپ ایتیلگن.
اوشبو اثر ۱۴۸ صفحه بولیب و ۵ بولیمنی اوز ایچیگه آلهدی. بیرینچی بولیم «تحقیق کلیاتی» دیب ناملنگن، اونده کیریش، مسأله بیانی، تحقیق اهمیتی و ضرورتی و تحقیقنینگ مقصد و سوراقلری یاریتیلگن.
ایکینچی بولیم «تحقیق اوتمیشی» دیب اتهلگن، اونده اوزبیک فرازیولوژیسینینگ شکللنیشی و ترقیاتی، فرازیمه (عباره) همده فرازیولوژی عملینینگ اورگنیش تاریخی بیان قیلینگن. شونینگدیک، تورکیشناسلیک دایرهسیده، خصوصاً اوزبیکستان و افغانستانده فرازیولوژی قندهی اورگنیلگنلیگی حقیده ییترلیچه معلومات بیریلگن.
اوچینچی بولیم «تحقیقنینگ میتودی و موادلری» دیب ناملنگن، اونده فرازیولوژیک بیرلیکلرنی اورگنیشده قوللنیلگن تمایللر و متیریاللر کیلتیریلگن.
تورتینچی بولیم «تحقیق نتیجهلری» دیب اتهلگن، اساساً اوچ یونهلیش بوییچه علمی ایزلنیشلر تقدیم ایتیلگن، جملهدن فرازیولوژیک عباره و فرازیولوژی علمی نیمهلیگی، عبارهلرنینگ معنایی خصوصیتلری همده اوزبیک فرازیولوژی فرازیولوژیک عبارهلرینینگ لغت بایلیگی تحلیل قیلینگن.
سونگی بولیم «مناقشه و نتیجه» دیب ناملنگن، اونده موضوع بوییچه مناقشه، ایریشیلگن نتیجهلر، تکلیفلر و تدقیقاتنینگ ایریم چیکلاولری کیلتیریلگن.
بوندن اوللراق هم اوزبیک تیلیده «ایمان ساوغهسی» اثری چاپ ایتیلیب و کتاب شیدالریگه تقدیم ایتیلگن.
