بوگون “دوشنبه” فاریاب ولایتی نینگ اندخوی، قرمقول، خانچارباغ و قرغان تومنلری و جوزجان ولایتی نینگ قرقین تومنی یشاوچی‌لریدن یوزلرچه‌سی اعتراضی بیر ییغین آرقه‌لی، مزارشریف تورکمن‌لری نینگ مدنی حرکت‌لریدن حمایت بیلدیریب و حکومتدن عبدالرووف نی آدم اوغیرلاوچی‌لر قولیدن قوتقریش اوچون سعی و حرکت قیلیشینی سوره‌گنلر.
اعتراضچی‌لردن بیری آق محمد نوری نینگ ایتیشیچه، حکومت یشاوچی‌لرنینگ جان و مال‌لریدن حفاظت قیلمه‌گن صورتده، اهالی و حکومت آره‌سیده فاصله ایجاد ایتیله‌دی.
اعتراضچی‌لرنینگ آگاه‌لنتیریش‌لریچه، حکومت تامانیدن ایستکلریگه دقت بولمه‌گن صورتده، آقینه بندرینی باغله‌یدیلر.
شونینگدیک، جوزجان ولایتی نینگ قرقین تومنی یشاوچی‌لریدن یوزلرچه‌سی بیر اعتراض یولگه قوییب آدم اوغیرلاوچیلیککه عیب‌لنگن کیشی‌لرنینگ جزالنتیریلیشی‌نی سوره‌گنلر.
اعتراضچی‌لردن بیری الله بیردی، دولت نینگ اهالی خوفسیزلیگی‌نی تامین‌لشگه ناکام عنوان قیلیب ایتیشیچه، خوفسیزلیک‌نی تامین‌لشگه موفق بولمه‌گن رسمی‌لرنی استعفا قیلیشی کیره‌ک.
اونینگ ایتیشیچه، ۹ یاشیده بولگن عبدالرووف نینگ اوغیرلنگنیدن ۳۵ کون اوتماقده، بیراق دولت حاضرگه‌قدر بوتوغریده هیچ‌بیر ایش قیله آلمه‌گن.
۹ یاشیده بولگن عبدالرووف ۳۵ کون آلدین اوغیرلاوچی‌لر تامانیدن مزارشریف شهریدن اوغیرلنگن ایدی. اوغیرلاوچی‌لرنینگ قوییب یوباریلیشی اوچون عایله‌سیدن ۱ یریم میلیون دالر ایسته‌گن.
