امریکا سنا کینگشی اوکراین دهگی اوروش دوام ایتهیاتگن بیر پیتده روسیه گه قرشی اقتصادی تحریملرنی کوچهیتیریش و بو مملکتنینگ انرژی درآمدلرینی کمهیتیریشگه قرهتیلگن قانون ریجهسینی تصدیقلهگن.
الجزیره خبری ترماغینینگ بوگون (۱۷-اسد/۸-اگست، شنبه)، گزارش بیریشیچه، اوشبو ریجه «لیندسی او. گراهامنینگ ۲۰۲۶-ییلگی روسیه و ایران تحریملری توغریسیدهگی قانونی» دیب ناملهنیب، امریکا جمهور باشلیغیگه روسیه نفتی و گازینی ییریک مقدارده ساتیب آلووچی مملکتلر توارلریگه ۱۰۰ فایزگچه باج جاری ایتیش امکانیتینی بیرهدی.
امریکا سنا کینگشی بو ریجهنی ۱۱ قرشی آواز بولگن حالده، ۸۶ ایجابی آواز بیلن تصدیقلهگن. مذکور ریجه حاضر تیکشیریلیش و آواز آلینیش مقصد امریکا وکیللر ییغیلیشیگه یوباریلهدی.
اوکراین جمهور باشلیغی ولودیمیر زلنسکی، مذکور ریجهنینگ تصدیقلنگنیدن خورسندلیک بیلدیریب و ایتیشیچه، روسیه گه قرشی امریکانینگ «حقیقی و کوچلی» تحریملری و باسیملری عملگه آشیریلیشی، اوروش یکونلنیشیگه یاردم بیره آلهدی.
مذکور ریجه، امریکا جمهوریتچی سناتور لیندسی گراهامنینگ اسمیگه ناملنگن. اوتگن آی وفات قیلگن گراهام، اوکراین قوللب-قوتلنیشی و روسیه گه قرشی تحریملر کوچهیشی بوییچه حمایتچیلردن ایدی.
