بیر آدمنینگ ییتی اوغیلی بار اېدی. ییتیسی هم پهلوان بولدی. ییتاوی ییتی طرفدن باش کوترسه، ییر زیریللردی. اوغیللری شونچه قووتلی بولسهده، آته خاکسار اېدی. او بیراونینگ کونگلی آغریگنینی کورسه، متأثیر بولیب ییغلردی. آدمنینگ خورلنگنینی هېچ قچان مینگه کورستمهسین دیب اوتینردی.
بیر کونی آته بیر مسافر گه دوچ کېلدی اونی مهمان قیلیب، اوییدن بیر کیچه جای بیردی. ناشُد مسافر شو کیچه اونینگ بار-بودینی شیلیب کیتدی. چالنینگ بار یوغی بیرگینه قویی قالدی.
اوغیللر غضب گه مینیب، تورت طرفنی آستین-اوستین قیلیب، اوغرینی توتیب، آته حکمی گه تاپشیردیلر. آته ناشُدنینگ یوزیگه قرهی آلمهی ییغلهدی… و اوغیللریگه اوییده قالگن بیته قوینی هم اوغریگه بیریشگه بویردی.
ییتی پهلوان ییتی طرف گه حیران باقدیلر. لېکن آتهسینینگ حکمی حکم. او اېتدی: «مین بو بندهدن آدملیک ایزلهگن اېدیم لېکن اوندن ماللیک تاپدیم. مال مال بیلن ممنون اېکن می، اونگه مالنی بیرینگ.»
اوغری آسان قوتیلگنیگه اېچکیسی «ایگیز» توققندهی شاد بولدی.
ییتی ییلدن کېین اوشه اوغری آتهنینگ حضوریگه بوکیلیب کیلدی. اوکسینیب-اوکسینیب گپیردی: «مینینگ هم ییتی اوغلیم بار اېدی. ییتیسی هم آدم بولسین دیب اۉزیم اولرنی باقدیم. ییتاوی هم مال بولدی، اوغری بولدی. ییتیسی ییتی زنداننی آباد قیلیب اوتیریبدی. سینینگ قرغیشینگ تیگدی.»
آته ېنه متأثیر بولیب کوپ ییغلهدی. آدم بولیب بیراونی گپیرگن من دیېدی. اوغری: «نیمه گه ییغلهیپسن؟» دیب سورهدی. «سین و سینینگ بالهلرینگ اوچون ییغلهیپمن» دیېدی. اوغری ېنه سورهدی: «اېندی نیمه قیلهی؟» چال جواب بیردی: «خاکسار بولده، ییغلشنی اورگن. بیراولر اوچون هم ییغلشنی اورگن. شونده سینینگ کوز یاشلرینگ ییتی مخلوقدن ییتی آدمنی چیقرهدی.»
اۉگیرووچی: نصرتالله احدی
