فراه ده بیر عیال، بودنه ییتیشتیریش کیچیک بیر ایشنی یولگه قوییب، اقتصادی قیینچیلیگینی کمهیتیریش و عایله خرهجتلرینی تامینلشده فعال حصه قوشه آلیش مقصد، سعیوحرکت قیلماقده. نجیبه ناجینینگ ایتیشیچه، بودنه ییتیشتیریش ایشینی آز سرمایه بیلن اویینینگ کیچیک فضاسیده باشلهگن.
اونینگ کوپهیتیریشیچه: «ینگی حکومت قدرت گه کیلیب و عیاللر ایشی چیکلنگنیدن کیین، بیر قطار ایشلرنی بجره آلهمن دیب توشیندیم. ییر هم بار ایدی، محلدهگی بیر قطار عیالنینگ همکارلیگی و مصلحتی بیلن، اویده بودنه ییتیشتیریش ایشیگه باشلهدیم.»
نجیبه، بوندن آلدین هم زراعت یولی آرقهلی عایله اقتصادی نیازلرینی تامینلش مقصد سعیوحرکت قیلگن؛ بیراق مذکور ولایتده سوو کملیگی و قوروقچیلیک سبب، ایشی یریم قالگن. «بوندن آلدین ایسیقخانهم بار ایدی. سبزهوان و اوسیملیک دارولرنی ایکهر ایدیم؛ بیراق سوو کملیگی سبب ایسیقخانّنی اداره قیله آلمهدیم. قریب بیر یریم ییل بولهدی که بودنه ییتیشتیریشگه باشلهگنمین.»
بودنه ییتیشتیریش، نجیبه اوچون یالغیز بدیل ایش ایمس، بلکیم عایله اقتصادی نیازلرینینگ بیر بولیمینی تامینلش اوچون بیر امکانیت دیر. اونینگ کوپهیتیریشیچه: «بودنه تخمی ۵ افغانی و گوشتی ۵۰ دن ۷۰ افغانیگه ساتیلهدی. اهالی اینیقسه سپورتچیلر کوپراق تخمی و گوشتینی ساتیب آلهدیلر. تاووق گوشتیگه نسبت بو فایدهلی دیر.»
نجیبه، بودنه ییتیشتیریشنی آز خرهجت کوتارهدیگن بیر ایش بیلیب و ایتیشیچه، حمایت بولینگنی همده ایش اورگهتیلیب و مناسب بازار گه قول تاپیلگنیده، عیاللردن کوپ قطاری بو ایشگه یوز کیلتیره آلهدیلر. «هر بیر وضعیتده هم تاثیری بار. حداقل اونینگ گوشتی و تخمی اویگه بیر یاردم بولهدی. ساتیلیشی اوچون بیراز فایدهلی بولگن.»
او، بو ایشنی اورگنی توغریسیده شوندهی دیدی: «حاضر اینترنت دورهسی دیر. اینترنت یولی آرقهلی بیر قطار موضوعلرنی اوقیب کوردیم و اولردن فایدهلندیم.»
نجیبهنینگ ایشانچیگه کوره، عیاللر امکانیتی حاضرگی چیکلاولردن کوپراق بولیب و حمایت بولگنلری صورتده، عایله و جمعیت اقتصادیده فایدهلی اورینگه ایگه بوله آلهدیلر. «افغانستان دهگی عیاللر هر ایشنی هم بجره آلهدیلر. مالی حمایت بولگنلریده کوپ ایشلرنی بجره آلهدیلر.»
شوندهی بیرحالده، ایش بیلرمانلردن قطارینینگ ایتیشلریچه، بودنه ییتیشتیریش برقرار درآمد اینیقسه عیاللر اوچون مناسب بولیملردن بیری بوله آلهدی. بیلیم یورت استادی محمودشاه حیدریاننینگ ایتیشیچه: «عیاللر جوده آز سرمایه و نیچه ته قفس همده بیر قطار بودنه بیلن، بو ایشگه باشله آلهدیلر. کوپینچه ییر و جهاز گه نیاز ایمس و کوپراق ایشی هم اویده عملگه آشیریلهدی. انه شوو سبب عیاللر اوچون مناسب بیر ایش دیر.»
مذکور بیلیم یروت استادینینگ اورغولشیچه، بو کبی ایشلر مالی حمایت و ایش اورگهتیلیش بیلن بیرگه بولگنیده، عایلهلرنینگ حیات وضعیتی یخشیلنیشی و عیاللر اقتصادی مشارکتی کوپهیشیده مهم اورینگه ایگه بوله آلهدی.
ایتیش کیرهک که، سونگی ییللرده عیاللردن قطاری اویلریده کیچیک فعالیتلرنی باشلش بیلن، عایله نیازلرینینگ بیر بولیمینی تامینلش یانیده، اقتصادی و اجتماعی اورینلرینی هم سقله آلیش اوچون سعیوحرکت قیلماقدهلر.
