سمنگان ولایتی خُلم تومنی یشاوچیسی بولمیش نوراحمد اوچون ۱۲-عقرب، دوشنبه کونی، کابل-مزارشریف قتناو یولیده میوه ساتیش رستهسیده باشقه عادی کونلر کبی باشلنگن؛ لیکن کوننینگ باشلنگنیدن بیر ساعت اوتمسدن کوچلی زلزله، اونینگ حیاتینی قتیق لرزه گه سالگن. زلزله یوز بیرگنیدن کیین عایلهسی وضعیتیدن خواطرلهنیب، قورقوو بیلن اویی تامان کیتگن. «زلزله یوز بیرگنیده، یالغیز فکرم گه کیلگن نرسه، تورموش اورتاغیم و بالهم ایدی.»
نوراحمد اویی یقینیگه بارگنیده، هیچ بیر زمان ایستمهگنی بیر صحنه بیلن روپهره بولگن؛ اویینینگ تامی قولهب، دیوارلری ییقیلیب و تاش و توپراقلر آستیده تورت آیلیک حاملهدار بولگن تورموش اورتاغینینگ جسدینی کورگن. قوشمه حیاتلریگه باشلهگنلریدن یالغیز توقیز آی و ۱۳ کون بولگن ایکن.
کوزلریگه یاش اَیلنگن نوراحمدنینگ ایتیشیچه: «کاش مین تاش و توپراقلر آستیده قالسه ایدیم. تورت آیلیک بالهم و آنهسی، ایکیسی کیتدی.» کوزلری یاش بیلن توله بولگنی اوچون بیر نیچه دقیقه گپلشه آلمهی و ینه کوز یاشلرینی سیریب، سوزلریگه دوام بیرهدی: «تورموش اورتاغیمنی سکیز ییلدن بیری تانیدیم. قرآنکریم اوقیدی، بیش پیت نمازینی اوقیدی. جوده یخشی، مهربان و هیچ بیر قیینچیلیگی بولمهگن بیر عیال ایدی.»
نوراحمد یالغیز ۲۶ کون نامزد قالیب و کیین ییغگن پولی بیلن کته بیر توی مراسمینی اوتکزگن و تورموش اورتاغی بیلن قوشمه حیاتگه باشلهگن؛ لیکن زلزله، اولرنینگ بو خوشلیگینی بوزگن. «ایکیمیز هم آرام بیر حیاتنی آرزو قیلگن ایدیک. بیر-بیریمیزنی جودهیم سیور ایدیک. بیر کونیمیز هم خوشلیک و مزاق بولمسدن اوتمس ایدی.»
لیکن حاضر ایسه، نوراحمد هر ایرتنگ و شام تورموش اورتاغینینگ قبری اوستیگه بارهدی. او، اوتگن ۲۴ کوننی حیاتینینگ اینگ قیین کونلری دیب بیان قیلهدی که اوشبو کونلرده تورموش اورتاغی اورنیگه، یانیده اونینگ قولدن بیرگنینی ایسلتهدیگن یالغیز بیر نیچه قطعه صورتی قالگن. «بیر کیشینی ییتی-سکیز ییل سیوسنگ کیین توی قیلگنینگدن بیر ییل اوتمسدن اونی قولدن بیرسنگ، جودهیم قیین دیر.»
زلزله یوز بیرمهگنیدن آلدینگی کونلرنی ایسلهب و ایتیشیچه، تورموش اورتاغینینگ یوقلیگی حیات کیچیریشنی اونینگ اوچون قیینلشتیرگن. «اونینگ کورماق اوچون بیر کونده نیچه مرته اوی گه کیتهر ایدیم. حاضر یوز مرته هم اویگه بارسم، بیراق او یوق. حاضر دنیاده هیچ کیم یوق و مین یالغیز قالگنمین دیب توشینهمن. بیز بیر-بیریمیز جودهیم سیور ایدیک. تینگری بیر-بیریمیز گه ییتیشیش اوچون یاردم بیردی، لیکن حیات قویمهدی. چارهم یوق؛ اونینگ یوقلیگینی چیدهشیم کیرهک.»
نوراحمدنینگ تورموش اورتاغی ۲۰ یاشر بولیب و مدرسهلردن بیریده اوقیتووچی ایکن. نوراحمد نیچه ثانیه مینگه قرهب و تورموش اورتاغینینگ یوقلیگی توغریسیده «هیچ کیم اونینگ اورنینی تولدیره آلمهیدی» دیدی؛ بو جملهده مسجم بولگن غم-علم، بیر آیدن بیری اونینگ حیاتیگه آغیرلیک قیلیب تورگن.
