۹-سنبله قانلی زلزله یوز بیرگنیدن قریب ایکی آی اوتماقده، بیراق کنر اهالیسی قلبیده اونینگ جراحتلری هلیگچه ینگی؛ اوشبو زلزله قیسقه مدت ایچیده مینگلب عایلهنی ماتم و اوی-جایسیز قیلدی.
سوکَی تومنی «دیوهگَل» قیشلاغی یشاوچیسی ۴۲ یاشر بازمحمد اوشه قربانلردن بیری دیر. یوز بیرگن کیچهدهگی زلزلهده تام قولشی عاقبتیده ۳۳ عایله اعضاسینی قولدن بیردی. بوگون اوشه اویدن فقط بوزیلگن دیوارلر قالگن.
او، خیره آواز و چرچاق نگاه بیلن شوندهی دیېدی: «زلزله اوییمنی توبدن اوزگرتیریب یوباردی، اېندی او یشش گه بولمهیدی. ۳۳ نفر یقینلریم هلاک بولدی. مینینگ ابهم دینمحمد ۱۷ نفر عایله اعضاسی بیلن هلاک بولدی – او اۉزی، خاتینی، تورت اوغلی، اوچ کیلینی و برچه نبیرهلری. ېنه بیر ابهم رحیمگل ۹ عایله اعضاسینی قولدن بیردی و فقط خاتینی تیریک قالگن. باشقه ابهم تورت عایله اعضاسینی قولدن بیردی و فقط بیر اوغلی قالگن.»
زلزلهدن آلدین، «شروکسی» قیشلاغی ۱۰۰ ته عایله، یم-یشیل، ایلیق آدملر بیلن و کولگو توله کوچهلر گه ایگه اېدی، حاضر اېسه اوشه شادلیک، اۉرنینی سکوت و ویرانگرچلیککه بیرگن. بو ییرده فقط نیچه عایله قالگن و خیمهلر آستیده حیات کیچیریشماقده. کوپینچه یشاوچیلر «دیوهگل» درهسی آوارهلر کمپی گه آلیب باریلگن.
حتا منطقهدهگی بولاقلرنینگ سووی، زلزلهدن سۉنگ قوریب قالگن.
بازمحمد آه تارتیب شوندهی دیېدی: «حاضر مین تنگی قوییسیده یشهیپمن، اکه-اوکهلریم کمپلرده. فقط بیتته اکم یوقاریده ضرور بویوملر بیلن قالگن. مکتبیمیز، مسجدیمیز، یوللریمیز – همهسی یوق بولیب کیتدی. بیزده ۴۰ باش مال بار اېدی، ۱۲ ته سیگیر یوقالدی. برچه مال-ملکیمیز ویران بولدی.»
حاضر بازمحمدده نه ییر، نه اوی، نه مال-ملک و نه تینچلیک بار. اونینگ درآمد منبعی – چاروهچیلیک – قولهگن دیوارلر آستیده قالگن. کېلهجکنی قرانغو کورهدی، بیراق اېنگ قیین پیتلرده یاردم قولینی چوزگن آدملردن منتدارلیک بیلدیرهدی.
کوزلریده یاش بیلن دوام اېتتیرهدی: «اگر خلق و حکومت یاردمی بولمهگنیده حاضر بیز الهقچان جننیگه ایلنگن بولردیک. بیر نیچه دقیقه ایچیده ۳۳ نفر عزیزینگنی یوقاتیش جوده آغیر. ابهمنینگ اوغیللریدن بیری پشاوردن کیلگن اېدی، او هم زلزلهده هلاک بولدی.»
قیش موسمی یېتیب کېلیشی بیلن بازمحمدنینگ تشویشلری کوندن-کونگه آرتماقده. کنرنینگ چیدهب بولمس ساووقلیگی، یوپقه چادرلر و آغیر کیچهگی خواطرلر اوندن تینچلیکنی آلگن.
او مسئوللر و یاردم بیرووچی نهادلردن، اویلرنی قیته قوریشده یاردم بیریشنی سورهیدی.
