امریکانینگ افغانستان تینچلیگی بوییچه سابق مخصوص ایلچیسی زلمی خلیلزاد، افغانستانده قماقده بولگن امریکالیک امیر امیری آزاد اېتیلیشینی خوش قرشیلب، ایکس صحیفهسیده اونینگ آزادلیکه چیقیشینی افغانستان و امریکا اورتهسیدهگی مناسبتلرنی یخشیلش یولیده ایجابی و مهم قدم دیب اتهگن.
او، محبوسلرنینگ آزاد قیلینیشی ایکی مملکت اورتهسیدهگی مناسبتلر یولیده تورگن کتته توسیقلرنی برطرف ایتیشی و ېنهده جدی یوتوقلر اوچون زمینه یرهتیشیگه امید بیلدیرگن.
زلمی خلیلزاد ایکس صحیفهسیده بوندهی یازگن: «ملی منفعتلرنی ایلگری سوریش اوچون افغانستان و امریکا قۉشمه ایالتلری یخشیراق مناسبتلر ایزلهماقدهلر. محبوسلر و گروگه آلینگنلر مسئلهسی اېسه دالضرب و جدی توسیق بولیب، هر ایکی تامان اونی برطرف ایتیشگه حرکت قیلماقده. کورینهدی کی، اسلام امیرلیگی امریکالیکلرنی سقلب توریشنی بایلیک اېمس بلکه اولر اوچون یوک اېکنینی انگلب یېتگن و بو توغری قرهش دیر. ترامپ ماموریتینینگ خارجده حبس گه آلینگن امریکالیکلر گه نسبتن قطعی سیاستی و شو بیلن بیرگه اسلام امیرلیگی تامان همکارلیک قولینی چوزیشی، آچیقچهسیگه عینن شو اۉزگریشگه سبب بولدی. امید قیلهمن کی تیزلیک بیلن بو بارهده جدی یوتوقلر گه گواه بولهمیز.»
شو بیلن بیرگه، اسلام امیرلیگینینگ تشقی ایشلر وزیرلیگی بیر بیانیه ترقهتیب، امریکالیک محبوسلرنینگ آزاد ایتیلیشینی مناسبتلرنی کېنگهیتیریش یولیده ایجابی قدم دیب اتهگن.
اوشبو وزیرلیکنینگ سیاسی اوچینچی باشلیغی ذاکر جلالی، بوتوغریده ایکس صحیفهسیده شوندهی یازگن: «افغانستان و امریکا اورتهسیده یوقاری درجهدهگی اوچرهشوولر اوتکزیلیشی و محبوسلرنینگ آزاد قیلینیشی اساسیده اۉز ارا حرمت و عمومی منفعتلر گه تیهنگن حالده باشقه ساحهلرده هم علاقهلرنی کېنگهیتیریش اوچون زمینه یرهتیلهدی. مهم شونده کی، هر ایکی تامان بوگونگه انگلب یېتگن و محبوسلر مسئلهسینی توغری یول بیلن حل ایتیشگه همده باشقه ساحهلرده مذاکرهلرنی دوام ایتیریشگه قطعی بیل باغلهگن.»
سیاسی بیلرمانلر هم امریکالیک هیئتنینگ کابل گه سفری و محبوسلرنینگ آزاد قیلینیشینی کابل و واشنگتن اورتهسیدهگی علاقهلرنی مستحکملش همده مناسبتلرنی یقینلشتیریشده ثمرهلی دیب بیلهدیلر. بیراق اولرنینگ تأکیدلشیچه، افغانستان اۉز ملی منفعتلریگه، امریکا اېسه اۉز وعدهلریگه صادق قالیشی لازم.
سیاسی ایش بیلرمان عبدالصادق حمیدزوینینگ ایتیشیچه: «محبوسلرنینگ آزاد قیلینیشی امریکا گه مناسبتلرنی اورنهتیش اېستهگینی آشیردی، چونکه اولر اۉز مملکتلریده بونی سیاسی یوتوق صفتیده ایسلهتیب اوتیشهدی. امریکالیکلر بیلن ملاقات افغانستان اوچون ضرور. بیز اۉز خلقارا علاقهلریمیزنی چېکلهمسلیگیمیز کېرهک.»
بیلیم یورت استادی و خلقارا مناسبتلر تدقیقاتچیسی عبدالناصر شفیق، بوتوغریده شوندهی فکر بیلدیرهدی: «امریکا اوتگن تجربهلرده هېچ بیر مملکت گه صادقلیک کورستمهگن و دایما اۉز منفعتلری اوچون امتیاز آلهدی، لېکن امتیاز بیرمهیدی. اگر افغانستان دولتی محبوسلر المهشینویده شوندهی حرکت قیلسه کی خلقنینگ دینی قدریتلری و اسلامی حکملری پایمال قیلینمهسین و مملکتنینگ عالی منفعتلری تأمینلنسه، امریکا بیلن ملاقات معما توغدیرمهیدی. اما اگر امریکا اولگیدیک کوپ مرته الدیدیگن بولسه، او حالده باشقه مملکتلر بیلن علاقهلرنی کوچهیتیریب امریکا گه باسیم اوتکزیش یخشیراق، شونده اولر افغانستان بیلن ملاقات قیلیش گه مجبور بولهدیلر.
امریکا تشقی ایشلر وزیرلیگی بیر بیانیه ترقهتیب، امیر امیرینینگ اسلام امیرلیگی قماقخانهسیدن آزاد ایتیلیشینی ایجابی قدم دیب بهالهگن و بونی قووانچلی خبر صفتیده تعریفلهگن.
