ناور دشتی، افغانستاننینگ ایکولوژیکی مهم بیش ساحهسیدن بولیب، اوتمیشلرده نایاب قوشلر اینیقسه فلامینگولر و سایبریالیک تورنهلرنینگ یشش جایی ایدی؛ بیراق سونگی ییللرده کیتمه-کیت قوروقچیلیکلر و اقلیم اوزگریشلری سبب، جدی قیینچیلیکلر بیلن روپهره بولگن.
غزنی ولایتی ناور تومنی یشاوچیلریدن قطارینینگ ایتیشلریچه، یاغینگرچیلیکلر کمهیشی باتقاقلر قوریشی و اوتلاقلرنینگ اورتهدن کیتیشیگه سبب بولگن. اولرنینگ کوپهیتیریشلریچه، بو منطقهده اوتگن ییللرگه نسبت مهاجر قوشلرنینگ اوتیب-قیتیشی کمهیب و مذکور ایکولوژیکی مهم ساحهنینگ سقلهنیشی اوچون حکومت همده همکار نهادلرنینگ اقدام قیلیشلری کیرهک.
بیزلرنینگ «ایکس» ترماغی ده هم تعقیب قیلینگ!
ناور تومنی یشاوچیلریدن علیناصر، اوشبو ییللرده سوو کملیگی و اهالینینگ قیینچیلیک بیلن روپهره بولگنینی بیان قیلیب و ایتیشیچه: «یاغینگرچیلیک یوق ایدی، بو ییل باتقاق و اوتلاقلر هم قوریگن، سوو یوق. قوریقچیلیک اوچون قوشلر هم اونچه کیلمهیدی.»
شونینگدیک بو تومن یشاوچیلریدن باشقه بیری سخیداد سعادتنینگ ایتیشیچه: «اوتگن ییللرده کیلهدیگن قوشلر سانی کوپ ایدی، حاضر ایسه تاغلی منطقهلر و دشتلرده سوو تنقیصلیگی سبب قوشلر کمهیگن. دولتدن ناور دشتیگه توجه قیلیشینی ایستهیمیز و اونینگ سقلنیشی اوچون دیوار تارتیلیشی کیرهک که کوپ یخشی بولهدی.»
ناور دشتی افغانستان سابق حکومتیده مملکتنینگ سقلنگن ساحهلریدن بیری صفتیده اعلام بولگن و غزنی اطراف-محیطنی سقلش ریاستی مسئوللرینینگ سلاموطندار گه ایتیشلریچه، بو قرار اسلام امیرلیگی دورهسیده هم شو رقم بولیب و اوشبو اداره نایاب قوشلر آولنیشی آلدی آلینیشی و مذکور دشت محیطی سقلهنیشی اوچون بیللی برنامهلری بار.
غزنی اطراف-محیطنی سقلش ریاستینینگ عامه علاقهلر عمومی مدیری حکمتالله مهرانگه کوره: «حاضر هم قانون-قاعده اساسیده، بو ساحه سقلنهدی. مرکزی اداره بویروغی اساسیده، اوندن نظارت قیلهمیز. اوشبو ساحه کمیاب قوشلرنینگ بارلیگی اوچون حفاظت آستیده قرار تاپگن. حاضرگچه ناور تومنیده قوشلرنی ناقانونی آولش سبب، نیچه کیشی قولگه آلینگن.»
شوندهی بیرحالده، جناب مهران باتقاقلر سوو سطحی پس توشگنی و نایاب قوشلر سانی کمهیگنیدن خبر بیریب و آگاهلنتیریشیچه، قوروقچیلیکلر دوام قیلیشی، اوشبو کمیاب تورلرنینگ اورتهدن کیتیشیگه سبب بوله آلهدی. «بیر توغان قوریلگن که منطقهگه برق ایشلب چیقرهدی و سوو یولینی تغییر بیرگن. سوو کوپراق اوشه یولدن باتقاقلرگه ییتیشهدی، بیراق حاضر بو یول باغلهنگن. شونینگدیک باشقه عاملی موسومی یاغینگرچیلیکلر کمهیشی دیر. بو جریان دوام قیلگنی صورتده، اوشبو ساحهده کمیاب قوشلرنینگ اورتهدن کیتیشی ممکن.»
غزنی ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، سونگی ییللر ناور دشتی، جدی شکلده قوروقچیلیک و اقلیم اوزگریشیدن زیان کورگن. اولرنینگ کوپهیتیریشلریچه، بو اداره بیرلشگن ملتلر تشکیلاتینینگ آزیق-آوقت و ایکینچیلیک دستوری همکارلیگی بیلن ناور دشتی سقلهنیشی توغریسیده بیر قطار برنامهلرنی عملگه آشیرگن.
بیزلرنینگ فیسبوک صحیفهمیزگه باش اورینگ!
غزنی ایکینچیلیک، سووغاریش و چاروهچیلیک ریاستی اوسیملیکلرنی سقلش عمومی مدیری محمدذکریا هوتکنینگ ایتیشیچه: «غزنی ده کیتمه-کیت قوروقچیلیکلر سلبی تاثیر قویگن و ناور تومنی اوتلاقلری هم زیان کورگن. ایکینچیلیک ریاستی اوتلاقلر بوزیلیشی آلدی آلینیشی اوچون بیر قطار لایحهلرنی قولگه آلگن که اولر عامه آگاهیلیگی، ساحهلردن قطاریگه دیوار تارتیلیش و بو تومنده نمایشی فارم آچیلیشیدن عبارت دیر.»
ایتیش کیرهک که، ناور دشتی، منطقه بویلب ایکولوژیکی اهمیتگه یگه و سقلنگن ساحهلردن بیری دیر. اوشبو دشت اوتگن نیچه ییلگچه بهار موسومیده، نایاب و مهاجر قوشلرنینگ یشش جایی حسابلنهر ایدی، بیراق حاضر ایسه اقلیم اوزگریشلری و کیتمه-کیت قوروقچیلیکلر سایهسیده، بو طبیعی میراثنینگ قولدن بیریش خوفی بیلن روپهره دیر.
