اسلام امیرلیگی صناعت و سودا وزیری نورالدین عزیزی، اوزبیکستان قاره قلپاقستان جمهوریتینینگ پارلمان باشلیغی امان بای اورینبایف بیلن اوچرهشووده، افغانستان و اوزبیکستان اورتهسیدهگی علاقهلر کینگهیتیریلیشی حقیده بحث ایتدیلر.
اوشبو وزیرلیک، بوگون (۲۰ ثور/۱۰ می، یکشنبه) ایکس صحیفهسیده بیر بیانیه ترقهتیب، تامانلر اوچرهشوو دایرهسیده افغانستان و اوزبیکستان اورتهسیده اقتصادیات، سودا آلیش-بیریش همده قوشمه سرمایه کیریتیشلر کینگهیتیریلیش مسئلهلری حقیده بحث ایتگنلرینی یازگن.
بیانیه گه کوره، تامانلر افغانستاننینگ پخته، تاش کومیر، تازه و قوروق میوهلری صادر قیلینیشی، آزیق-آوقت و انشاآت ساحهلری کینگهیتیریلیشی، ایکی مملکت اورتهسیده سیاحتچیلیک صناعتی مستحکملنیشی، ایکی مملکتنینگ خلقارا قوشمه کورگزمهلری معیاریلشتیریلیشی، افغانستانده دارو ایشلب چیقریش، معدنی موادلرنی پروسس قیلیش، افغانستاننینگ احتیاجی بولگن سکتورلریده قوشمه سرمایه کیریتیش و قاره قلپاقستاننینگ توزی صادر قیلینیشی حقیده بحث ایتگنلر.
اوچرهشووده، مملکت صناعت وسودا وزیری نورالدین عزیزی، اوزبیکستان قاره قلپاقستان پارلمان باشلیغیدن ایکی مملکتنینگ خصوصی سکتور اعضالری قولیلیک بیلن علاقه قوریشی و آلیش-بیریش آسانلشتیریلیشی اوچون ترمذ بازاریده قاره قلپاقستان جمهوریتینینگ علاقه و موافقلشتیریش ادارهسی تشکیل ایتیلیشینی سورهگن.
صناعت و سودا وزیرلیگی بیانیهسی اساسیده، اوزبیکستان یوقاری مرتبهلی هیئتی بلخ ولایتیگه سفری دایرهسیده سودا باغلنیش و تجاری ییغیلیشده اشتراک ایتیشگه قوشیمچه، مزارشریف شهریده اوشبو مملکتنینگ سودا اتاقینی آچهدی.
اسلام امیرلیگی صناعت و سودا وزیرلیگی اوتگن کون، اوزبیکستان قاره قلپاقستان جمهوریتینینگ یوقاری مرتبهلی هیئتی کابل گه کیلگنینی ایتگ ایدی.
