افغانستان مقیاسیده اینترنت و مخابرات خذمتلری اوزیلگنی بیلن، کسلخانهلرده کسللر و اولرنینگ عایلهلریدن قطاری جدی قیینچیلیک بیلن روپهره بولگن. سلاموطندارنینگ قولگه کیلتیرگن معلوماتیگه کوره، بو وضعیت نهفقط دوالنیش جریانیگه تاثیر قویگن، بلکیم عایلهلرگه کوپینچه روحی و مالی باسیملرنی هم کیلتیرگن.
کسلینی دوالش اوچون کابل گه کیلگن جوزجانلیک ولینینگ ایتیشیچه، اینترنت و مخابرات خذمتلری اوزیلگنی بیلن کوپینچه قیینچیلیکلرگه دوچ کیلگن. «بلاسم کسلخانهسیگه کیلدیم، پایوازمین. پولیم خلاص بولدی، پول آلیب کیلیشلری اوچون تلیفون قیلهی دیدم؛ تلیفونلر کیسیلدی، دارو آلگن ایدیم، نیمه قیلهی دیب حیران قالدیم. هیچ کیمنی تانیمس ایدیم. اینترنتنینگ قیته فعال بولیشینی کوتیب توردیم.»
بیزلرنینگ «ایکس» ترماغی ده هم تعقیب قیلینگ!
شونینگدیک کابلده کسلدارلردن باشقه بیری فریدنینگ ایتیشیچه، اینترنت و مخابرات خذمتلری اوزیلگنی پیتیده کسلخانه گه مراجعت قیلیب و کوپینچه قیینچیلیک بیلن روپهره بولگن. «تورموش اورتاغیم کسل ایدی، کسلخانه گه بارگن ایدیم؛ تیلفونلر و اینترنت ایشلمس ایدی. قیینچیلیک بیلن روپهره بولدیم، دوست و تانیش کیشیلر هم خبری یوق ایدی.»
باشقه بیر تاماندن، کابل یشاوچیلریدن باشقه بیری سهیلا، شوندهی دییدی: «اینترنت و تلیفون اوزیلگنیده، آنم کسل ایدی. اوزاق بولیمده حیات کیچیریشیمیز اوچون اونینگ وضعیتیدن خبر آلالمس ایدیم. ایکی-اوچ کون تشویش و استرسم کوپ بولگن ایدی و بو حالت جودهیم قیین ایدی.»
شو بیلن بیرگه، کسلخانهلردن قطارینینگ مسئوللری، افغانستانده اینترنت و مخابرات خذمتلری اوزیلگن کونلریده، طبیات بولیمی جدی قیینچیلیک بیلن دوچ بولگنینی معلوم قیلهدیلر.
پایتخت کابل شهریده «گلوبل» کسلخانهسی باش شفاکاری فضلاحمد رحیمی گه کوره، اینترنت اوزیلگنی بیرینچی کونیده، بیمارنینگ کسللیگینی انیقلهی آلمسلیک و کیچیکتیریلیب دوالنیشی طفیلی، آغیر حالتده بولگن بیر کسل وفات قیلگن. «اوتگن کیچه عاجل بیر کسلیمیز بار ایدی که معاینهلرینینگ انیقلهنیش مقصد، اطلس کسلخانهسیگه یوبارگن ایدیک، چیتایلگه یوباریلیشی کیرهک ایدی؛ بیراق قیغو بیلن اولر اینترنتدن فایدهلنه آلمسلیکلرینی ایتدیلر و انیقلنیش و دوالشده کیچیکتیریش اوچون کسلیمیزنی قولدن بیردیک.»
شونینگدیک کابل ده باسط خصوصی کسلخانهده عمومی ایچکی متخصص، حمیدالله هاشمی سلاموطندار بیلن اوتکزگن صحبتده ایتیشیچه، افغانستانده طبی کدرلر کملیگی باعث، مملکتدن تشقریدهگی متخصصلر بیلن علاقه قوریش اوچون اینترنت گه کوپراق احتیاج بولهدی. اونینگ کوپهیتیریشیچه: «اوتگن کیچه نوکری ایدیم، بیر اولکهداشیمیزنی کیلتیرگن ایدیلر که او ترافیکی حادثه قیلگن ایکن؛ تیلفونی بولگنی بیلن، لیکن عایلهسی بیلن علاقه قوره آلمهدیک و کسلنینگ وضعیتی کوپ یامان ایدی.»
باسط کسلخانهسی خرید بولیمی مسئولی عبدالخالقنینگ ایتیشیچه، اینترنت و مخابرات خذمتلری اوزیلگنی کونلریده، طبی جهازلرنی تأمینلشده قیینچیلیک بیلن دوچ بولیب و جراحلیک بولهدیگن کسللر اوچون ضرور بولگن طبی واسطهلرنی ییتکزیب بیره آلمهگنلر.
بیزلرنینگ فیسبوک صحیفهمیزگه باش اورینگ!
اونگه کوره: «طبی جهازلر اوچون واتساپ گروپلریگه اردر بیرهر ایدیک؛ بیراق حاضر شرکتلر آدرسی هم بیزلرگه بیللی ایمس؛ هیچ بیر ایش هم قیله آلمهیمیز؛ نسایی بولیمده عاجل کسلیمیز بار ایدی؛ شفاکار باشقه کسلخانهده ایدی؛ شفاکارنی کیلیشی اوچون امبولانس یوباردیک.»
اوتگن هفته دوشنبه کونی توشدن کیین، افغانستان مقیاسیده اینترنت و مخابرات خذمتلری اوزیلیب، بانک و اقتصادی قیینچیلیکلرنی یرهتگنی یانیده، ساغلیق سکتوریگه هم تاثیر قیلگن.
