لوگر ده دهقانلردن قطارینینگ سلاموطندار گه ایتیشلریچه، چرچرک کیچیک و قاره رنگلی حشره بولیب، کوپراق جوزا و میزان آیلریده کچالو ایکینزارلریده تاپیلهدی. اولرنینگ کوپهیتیریشلریچه، مناسب وقتده دارودن فایدهلنیلمهگنی صورتده، چرچرک آفتی محصوللردن ۵۰ فایزینینگ اورتهدن کیتگزیشی ممکن.
ییریگه کچالو ایککن لوگر مرکزی پلعلم شهریدهگی دهقانلردن بیری محمد احساناللهگه کوره، مذکور آفتنینگ ترقهلگنیدن خواطرلنگن دیر. او، لوگر ایکینچیلیک، سووغاریش و چاروهچیلیک ریاستیدن دارو و آگاهیلیک بیریلیش توغریسیده دهقانلر بیلن همکارلیک بولینیشی ایستهگن.
بیزلرنینگ «ایکس» ترماغی ده هم تعقیب قیلینگ!
مذکور دهقاننینگ ایتیشیچه: «هیه، ییر گه کچالو ایککنمین. تورلیخیل آفتلر بار؛ بیراق ییرگه چرچرک کیلگنیده، تیزلیک بیلن ایکینچیلیک ریاستیگه تماس آلهمیز. دهقانلردن کوپ قطاری بو آفت سبب، کوپینجه زیان کورگن.»
لوگر ده ایکینچیلیک ایشلری بوییچه ایش بیلرمان عبداللهنینگ ایتیشیچه، چرچرک کچالو اوچون زیانلی آفتلردن بیری دیر که، اوسیملیکنینگ ریشهسینی خراب قیلیب و اونینگ قوریشیگه سبب بولهدی. اونینگ کوپهیتیریشیچه، بو آفتلر کوپراق ییللردن بیری فایدهلنمهگن یا-ده درست بیر شکلده مدیریت بولمهگن ییرلردن قطاریده کوریلهدی. چرچرک، توپراققه تخم قویهدی و وقت اوتیشی بیلن کوپهیهدی.
مذکور بیلرمانگه کوره: «بو بیر کسللیک ایمس، بلکیم کچالو، پمیدار و شو کبی اوسیملیکلر ریشهسینی خراب قیلهدیگن بیر آفت دیر. وقتیده دوالنمسه، اوسیملیک اورتهدن کیتهدی. مذکور آفت حتا چمنزارلرده هم کوریلهدی.»
او، دهقانلرگه بو کبی حشرهلرنینگ اورتهدن کیتیشی اوچون محصولنینگ ییغیم-تیریمیدن کیین ییرلرینی یخشی بیر شکلده قوش هیدهب و قویاش نوری تیگهدیگن جایده قرار تاپیشینی توصیه قیلگن. عبدالله گه کوره، ایکینچیلیک موسومیده بو آفتنینگ اورتهدن کیتیشی اوچون مخصوص دارولر هم بار.
بیزلرنینگ فیسبوک صحیفهمیزگه باش اورینگ!
شونینگدیک لوگر ایکینچیلیک ریاستی مطبوعات مسئولی عبدالبصیر شاهدنینگ ایتیشیچه، اوشبو حشره کچالو ایکینزارلریگه جدی شکلده زیان ییتیشتیرهدی. «چرچرک، زیان ییتیشتیرووچی بیر حشره دیر که رنگی توپراققه اوخشهیدی. بو آفت کچالو ساقهسینی کیسیب و ایکینزارلرگه زیان ییتیشیشیگه سبب بولهدی. مذکور آفت هم پلعلم مرکزی و همده تومنلرده قوریلهدی. دهقانلرگه آگاهیلیک بیریش و نیاز بولگنی صورتده دارو ترقهتیلیشی اوچون سعیوحرکت قیلماقدهمیز.»
لوگر ایکینچیلیک، سووغاریش و چاروهچیلیک ریاستینینگ معلوماتی اساسیده، مذکور ولایتده یوزلب هکتار ییرگه کچالو ایکیلیب و عایلهلر اوچون اونملی درآمد منبعسی حسابلنهدی. بیلرمانلرنینگ ایتیشلریچه، دهقانلرگه آفتلر بیلن قرشی کورهش اصوللری و زمانهوی ایکینچیلیک حقیده ییترلی تعلیملر بیریلگنی صورتده، نه فقط محصوللری سقلنهدی؛ بلکیم اوتگن ییللر گه نسبت نیچه برابر آشیشی هم ممکن.
