بدخشان ولایتی کشم و ارگو تومنیدهگی چاروه‌دارلردن قطاری، چاروه‌لری آره‌سیده نابیللی بیر کسل‌لیک ترقه‌لگنی‌دن خواطر بیلدیریب ایتیشلریچه، چاروه‌لریدن مراقبت قیلیش چاغیده ساغلام چاروه‌چیلیک اصول‌لریدن قوللنگنلری بیرحالده؛ بیراق ینه هم چاروه‌لری نینگ توغیلیشی غیرطبیعی بولیب و قوزی‌لر توغیلیش‌دن کیین اوله‌دی.
بدخشان ولایتی کشم تومنی یشاوچیلریدن محمداکبر نینگ سلام‌وطندار گه ایتیشیچه، سونگی بیر آی جریانیده، چاروه‌لریدن کوپینچه‌سی توغیلیش یا-ده توغیلگنی‌دن کیین تلف بولگن دیر. اونینگ کوپه‌یتیریشیچه، بو قیینچیلیک سبب چاروه‌دارلیک‌دن قولگه کیلتیره‌دیگن درآمدی کمه‌یگن.
محمداکبر گه کوره: «بو قیینچیلیک نیچه ییل بوله‌دی که اورته گه کیلگن؛ بوندن آلدین کوپ ایمس ایدی. اوتگن‌لرده بیران چاروه‌دار شکایت قیله‌ر ایدی که بیر یا-ده ایکی قوزیم نی قولدن بیردیم دیب؛ حاضر ایسه عمومی بولگن؛ هر چاروه‌دار بو قیینچیلیک بیلن روپه‌ره دیر.»
اوشبو چاروه‌دار نینگ ایتیشیچه، اولر و وترینرلر نینگ بو توغریده قیلگنلری سعی‌وحرکت‌لری نتیجه بیرمه‌گن.
بیزلرنینگ «ایکس» ترماغی ده هم تعقیب قیلینگ!
شونینگدیک ارگو تومنیدهگی چاروه‌دارلردن بیری سلیمان نینگ ایتیشیچه، ۱۰۰دن آرتیق چاروه‌سیدن، ۲۵ باش چاروه‌سی نابیللی کسل‌لیک نتیجه‌سیده تلف بولگن. «چاروه‌لر نی آغریق توته‌دی؛ انه شوو سبب اوله‌دی. وترینرلر چاروه‌لر بیرینچی‌ده واکسین بولسه ایدی، بو قیینچیلیک اورته گه چیقمس ایدی دیه‌دیلر. حاضر هم مسئوللر چاروه‌لر نینگ واکسین قیلیش اوچون کیلمه‌گن.»
ارگو و کشم تومنی یشاوچیلری نینگ کوپه‌یتیریشلریچه، بو قیینچیلیک حل بولمه‌گنی تقدیرده، بیر ییل‌لیک زحمت‌لری و درآمد منبع‌لری نینگ اورته‌دن کیتیشی ممکن.
شونده‌ی بیرحالده، بدخشان ایکینچیلیک، سووغاریش و چاروه‌چیلیک ریاستی مسئوللری، اوشبو ولایتده چاروه‌لر آره‌سیده نابیللی کسل‌لیک ترقه‌لگنی نی رد قیلیب ایتیشلریچه، چاروه‌لر توجه‌سیزلیک و چاروه‌چیلیک اوچون ناتوغری اصول‌لردن قوللنیلیشی سبب تلف بوله‌دی.
بدخشان ایکینچیلیک، سووغاریش و چاروه‌چیلیک ریاستی بوییچه آمری نصیر احمدی نینگ ایتیشیچه، کشم تومنی‌ده چاروه‌لر اوچون درمانی مرکزلر بار و اوشبو مرکزلر ایشلاوچیلری چاروه‌چیلر گه آگاهی‌لیک بیریش اوچون تومن‌لر گه سفر قیله‌دیلر.
اونینگ کوپه‌یتیریشیچه: «ساحه‌ده بولگن وترینرلر بو کسل‌لیک نی تانیه آلمه‌ی و بو توغریده هیچ ایش قوللریدن کیلمه‌گنی صورت‌ده، چونکه لابراتوار یوق، نمونه آلینه‌دی. بو ییرده جهازلنگن لابراتواریمیز بار؛ هر قنده‌ی کسل‌لیک بولسه تشخیص بوله‌دی. تشخیص بولمه‌گنی صورت‌ده، نمونه نی وزیرلیککه یوباره‌میز و او ییرده تشخیص بوله‌دی.»
عین حالده، بدخشان ده چاروه‌چیلیک ایشلری بوییچه ایش بیلرمان‌لردن قطاری نینگ ایتیشلریچه، چاروه‌لر نینگ واکسین بولمس‌لیگی حیوانی کسل‌لیک‌لر نی کوپه‌یتیریب و چاروه‌لر نینگ تلف بولیشی گه سبب بوله‌دی.
بیزلرنینگ فیسبوک صحیفه‌میزگه باش اورینگ!
وترینرلردن برات‌محمد نینگ ایتیشیچه، چاروه‌دارلر چاروه‌لری نینگ کسل‌لیککه چلینمسلیگی اوچون، کوکلم و قیش موسومی‌ده اولر نی واکسین قیلیشلری کیره‌ک.
اونینگ کوپه‌یتیریشیچه: «توغیلیش‌دن کیین حیوان‌لری نی واکسین قیلیشلری کیره‌ک؛ اوشه کسل‌لیک که ساحه‌لریده ترقه‌لگن که بو رقم قوزی ساغلام قولگه کیله‌دی. ایکینچیلیک ریاستی مسئولی هم چاروه‌دارلر گه آگاهی‌لیک بیریش دیر.»
افغانستان اینیقسه اوزاق تومن‌لرده‌گی یشاوچیلریدن کوپ قطاری، چاروه‌چیلیک ایشی بیلن شغللنگنلر و بو یول آرقه‌لی عایله‌لری نینگ ییگولیک و باشقه کیره‌کلی نیازلری نی تأمین قیله‌دیلر؛ بیراق بیرقطار کسل‌لیک‌لر ترقه‌لیشی و چاروه‌چیلیک نینگ درست اصول‌لری توغریسیده معلومات‌سیزلیک سبب، اولر نینگ چاروه‌چیلیکلری گه زیان ییتیشتیرگن.
