بیرلشگن ملت‌لر تشکیلاتی نینگ افغانستانده‌گی اورین باسرلیک هیأتی یا-ده یوناما تامانیدن ترقه‌تیلگن گزارش‌گه کوره، خوفسیزلیک و ترور واقعه‌لریگه عیب‌لنیب قولگه آلینگن و افغانستان قماقخانهلریده بولگن ۳ محبوسدن ۱ محبوس قیناققه سالینه‌دی.
اوشبو گزارش‌گه کوره، میلادی ۲۰۱۹ نچی ییل جنوری آیی نینگ بیرینچی کونیدن میلادی ۲۰۲۰ نچی ییل مارچ آیی نینگ ۳۱ نچی کونی گه قدر افغانستان نینگ ۲۴ ولایتیده بولگن ۶۳ قماقخانه دهگی ۶۵۶ محبوس بیلن مصاحبه اوتکزیلگن.
یوناما تامانیدن ترقه‌تیلگن گزارش گه کوره، میلادی ۲۰۱۷ نچی و ۲۰۱۸ نچی ییللرگه کوره قماقخانه لرده‌گی قیناق‌لر رقمی آزه‌یگن.
اوشبو گزارش گه کوره، میلادی ۲۰۱۷ نچی ییل و ۲۰۱۸ نچی ییللرده قیناق رقمی ۳۱.۹ % بولگن لیکن حاضرده ۳۰.۳ % بولگن.
ملی پولیس قماقخانه لریده حاضرده قیناق رقمی ۲۷.۲ % بولگن و اوشبو رقم اوتمیش‌لرده ۳۱.۲ % بولگن.
ملی خوفسیزلیک قماقخانهلریده قیناق رقمی اوتمیش‌لرده ۱۹.۴ % بولگن لیکن اوشبو رقمی حاضرده ۱۶ % بولگن.
بیرلشگن ملت‌لر تشکیلاتی باش کاتبی نینگ افغانستانده‌گی خاص نماینده‌سی دیبرا لاینز گه کوره، قیناق هیچ بیر زمان قبول ایتیلمه‌یدی و قیناق عامللری مسؤل تانیلیشی لازم.
اوشبو گزارش گه کوره، قندهار ولایتی ملی پولیس کوچلریگه تیگیشلی قماقخانهلریده قیناق رقمی ۵۷.۷ فایز بولگن.
عبدالله آتلی کیشی قندهار و پلچرخی قماقخانهلریده محبوس بولگن. او نینگ ایتیشیچه او خیاط بولگن، اونی طالب لیک جرمی بیلن دکانیدن اوشله‌ب قندهار نینگ اوچینچی حوزه‌سیگه آلیب بارگن‌لر.
عبدالله نینگ ایتیشیچه، قندهار شهری اوچینچی حوزه‌سیده جدی شکلده قینه گن‌لر حتا بیر قبرغه سی سینیب و ایکی مرته هوشدن کیتگن.
عبدالله نینگ ایتیشیچه، اونی ۲۰ کون بوییچه حاجت خانه بولمه‌گن بیر اطاقده حبس قیلیب و یالغیز حیاتده قالیش اوقات بیرگنلر.
عبدالله گه کوره، قماقخانه دهگی محبوسلر گناه‌سینی تن آلیب قبول قیلیشی اوچون قوللرینی باغله‌ب کوزیگه بیر تور مواد تامیریله دی و مواد انسان نینگ کوزینی یمان شکلده اچیته‌دی. عبدالله بیر نیچه مدتدن کیین قندهار قماقخانه سیدن پلچرخی قماقخانه سیگه انتقال بیریلگن و گناه سی بولمه گن بیر حالده ۶ ییل بوییچه قماقخانه دن قالگن.
انسان حقلریدن حمایت ایتوچی فعاللر هم کوپینچه قیناق تیکشیرو جریانیده صورت تاپیشی نی ایته دیلر.
افغانستان انسان حقلری کمیسیونی اورین باسری نعیم نظری نینگ ایتیشیچه، اوتگن ییل قماقخانه لرده‌گی قیناق‌لر خصوصیده ۱۴۳ شکایت ثبت ایتیلگن و مذکور رقمدن ۱۳ موردی تانیلیب و تثبیت ایتیلیب مستند توزه تیلگن.
جناب نظری گه کوره، امنیتی و خوفسیزلیک مسؤللر تعلیم کورگنی اوچون قماق خانه لرده‌گی قیناق رقمی اوتگن ییللرگه کوره آزه‌یگن.
قیناق خصوصیده افغانستان عمومی قماقخانه مسؤللریدن فکرلرینی آلیشده تلاش قیلدیک، لیکن موفق بولمه‌دیک.
ایتیش لازم که بوندن آلدین افغانستان قماقخانه لریده‌گی قیناق دولتی نهادلر تامانیدن یاشیریلیب کیلماقده ایدی.
