اسلام امیرلیگی مالیه وزیرلیگی، بوگون دن (۲۰-دلو، دوشنبه)، باشلب پاکستان دن دارو وارد بولیشینینگ بوتونلی تقیقلنگنینی معلوم قیلگن. مالیه وزیرلیگی سوزلاچیسی عبدالقیوم نصیرنینگ ایتیشیچه، باجخانهلردن برچهسیده قاچاقی دارو و باشقه توارلر وارد بولیشی آلدی آلینهدی.
بو بیلن بیرگه تورلی ولایتلرده یشاوچیلر و دارو ساتووچیلردن قطارینینگ ایتیشلریچه، اوتگن اوچ هفتهده دارو قیمتی سیزیلرلی درجهده کوپهیگن.
ایشچیلیک بیلن کونده ۳۰۰ افغانی درآمدی بولگن پروان یشاوچیسی بولمیش عبدالدیاننینگ ایتیشیچه، تورت یاشر قیزینی کسللیک سبب ساغلیقنی سقلش مرکزیگه انتقال بیرگن؛ بیراق دارو قیمتی آشگنی، دوالنیش خرهجتینینگ توللشنی اونگه قیین قیلگن. «میدودرینگه نیازیم بار ایدی، اوتمیشده ۲۰ یا-ده ۳۰ افغانیگه آلالهر ایدیم؛ بیراق حاضر قیمتی ۷۰ افغانیگه ییتیشگن. نیگه قیمتلر آشگن دیب سورهگنیمده، پاکستان دن دارو وارد بولیشی تقیقلنگن دیدیلر.»
کسلدارلردن بیری و لغمان یشاوچیسی بولمیش روحالله گه کوره، تورموش اورتاغینینگ شکر کسللیگی کنترول بولیشی اوچون دایمی شکلده دارو اینیقسه انسولین ساتیب آلهدی؛ لیکن سونگی کونلرده پاکستان دن دارو وارد بولیشی توختهتیلگنیدن کیین، دوالنیش نسخهسی قیمتی ۱۲۰۰ افغانیدن ۱۷۰۰ افغانیگه ییتیگن. «کسلیمیزنینگ شکر کسللیگی بار. بوندن آلدین دارولری ۱۲۰۰ افغانی بولهر ایدی و حاضر ایسه ۱۷۰۰ افغانی بولهدی. پاکستان دارولری نسبتا ارزانراق ایدی و حاضر باشقه دارولر قیمت دیر.»
دارو ساتووچیلردن قطارینینگ ایتیشلریچه، افغانستان ده صرفلنهدیگن دارولردن کوپ قسمی پاکستان دن وارد بولهدی و دارو کملیگی همده واردات توختهتیلیشی بیلن، اونینگ قیمتی سیزیلرلی درجهده آشگن.
بو توغریده کابل ده دارو ساتووچیلردن رشادنینگ ایتیشیچه: «توپلم شکلده پاکستان دارولری قیمتی آشیب و اونینگ اورنیدهگی دارولر قیمتی هم کوپهیگن. صرفلنهدیگن دارولردن ۷۰ فایزی پاکستانی ایدی. هندوستان دارولرینینگ صفتی اونچه ایمس. پانادولنینگ بیر پاکتی ۲۷۰ بولیب و حتا تاپیلمهیدی.»
شونینگدیک افغانستان دارو ساتووچیلر بیرلشمهسی مسئوللری، دارو قیمتی آشیشینی تصدیقلب، بازارده قیمتلر کنترول بولیشی و دارو وارداتی بوییچه بدیل یوللر یرهتیلیشی اوچون اسلام امیرلیگی سعیوحرکتلریدن خبر بیرگن.
بو توغریده افغانستان دارو ساتووچیلر بیرلشمهسی باشلیغی فضلالله نیازینینگ ایتیشیچه: «قیمتلر بیراز یوقاری کیتگن و آز وارد بولهدیگن دارولردن قطاری حاضر کمهیگن. اسلام امیرلیگی بو توغریده حرکت قیلیب و بدیلی بولمهگن پاکستان دارولرینینگ شرکتلر آرقهلی کوپراق وارد بولیشینی سورهگن. سعیوحرکتلرنینگ دوامی بولیب و یقین کونلرده بازارلرنینگ کنترول بولیشی ممکن.»
باشقه بیرتاماندن، اسلام امیرلیگی ساغلیقنی سقلش وزیرلیگی مسئوللری، بازارلرده دارو قیمتی کنترول بولیشی توغریسیده سعیوحرکتلر و ایران، اوزبیکستان و هندوستان دن دارو وارد بولیشی اوچون شرطنامهلر امضالنگنیدن خبر بیرگن.
ساغلیقنی سقلش وزیرلیگی سوزلاوچیسی شرافت زمان امرخیلنینگ ایتیشیچه: «دارولر قیمتی و صفتیگه کوپراق توجه قرهگنمیز. سونگی کونلر ایچکی تولیدلر یانیده وارداتی دارولر قیمتینینگ مناسب سقلهنیشی اوچون سعیوحرکت قیلگنمیز. قیمتلرنی اوتمیش کبی عادی سقله آلیش اوچون تورلیخیل شرکتلر مسئوللری بیلن جلسهمیز بار ایدی. ایران و اوزبیکستان بیلن شرطنامهلرنی امضا قیلدیک و هندوستان گه ساغلیقنی سقلش وزیرینینگ سفریدن مقصد، ساغلیقنی سقلش خذمتلری بوییچه نیازلرنی حل قیلیش ایدی.»
اسلام امیرلیگی و پاکستان آرهسیده چیگره کیسکینلیکلردن سونگ، بو مملکتدن دارو وارد بولیشی تقیقلندی. شونینگدیک مالیه وزیرلیگی، ۲۰-دلودن کیین باجخانهلرده پاکستان دن وارد بولهدیگن دارولرگه رخصت بیریلمسلیگینی ایتگن ایدی.
