ناقانونی یول آرقهلی ایران گه باریشنی قصد قیلگن افغانستانلیک ۱۴ کیشینینگ جسدلری، بوگون (۱۰ اسد/۱ آگست، شنبه) عایلهلری گه تاپشیریلدی.
اوشبو ۱۴ کیشینینگ همهسی بادغیس ولایتی یشاوچیلری بولگن، نیچه کون بیدرک یوقالگنلریدن سونگ، پنجشنبه کونی نیمروز ولایتی چهاربرجک تومنی «ریگهای لالو» حدودیده تاپیلدی.
شو بیلن بیرگه، قربانلرنینگ ایریم عایله اعضالریگه کوره، بو ییگیتلر قشاقلیک، ایشسیزلیک و ایش فرصتلری یوقلیگی سبب ناقانونی یول آرقهلی مهاجرت یولینی تنلشگه مجبور بولگن.
بادغیس ولایتی یشاوچیسی بولگن جیلانی، اوشبو واقعهده ۳۴ یاشلی ایناغهسینی قولدن بیرگن ایتیشیچه، ایناغهسی یولده مهاجرلر بولگن موتر بوزیلگنیدن سونگ باشقه همراهلریدن اجرهلیب قالگن. او شوندهی دییدی: «ایناغهم نیمروز گه بارگن ایدی. کیچه موتری بوزیلدی و همه موتردن توشدی و اوشه ییرده کیچهنی اوتکزدیلر. ایرتهلب موتر حرکت قیلگنده ادهشدیلر. موتر قیتدی، بیراق اولرنی تاپمهدی و ۱۰ کون دوامیده اولردن هیچ خبر یوق ایدی.»
بادغیس یشاوچیسی بولگن عبدالخالق، واقعهده ۱۴ یاشلی جیینینی قولدن بیرگن ایتیشیچه، قشاقلیک و ایشسیزلیک سببلی جیینی ناقانونی مهاجرت قیلیشگه مجبور بولگن. او مسئوللردن اوزاق حدودلرگه کوپراق دقت قیلیب و یاشلرنی ایش بیلن تأمینلشنی سورهیدی. او شوندهی دییدی: «۲۴ کون اول کیتگندی. نیچه کون مسئوللر قیدیردی، بیراق تاپه آلمهدیلر. پنجشنبه کونی اولرنینگ جسدلرینی تاپدی و بوگون ساعت اون بیرده جسدلرینی عایلهلریگه تاپشیردی.»
نیمروز حاکمی سوزلاوچیسی عبدالمتوکل توحیدی شوندهی دییدی: «افسوس بیلن ۱۹ نفر ییگیت ناقانونی یول آرقهلی ایران گه باریش پیتیده بیدرک بولدی، کوپ قیدیریشلردن سونگ اولردن ۱۴ نفرینینگ جسدلری تاپیلدی.»
بوندن ایلگری هم، بیش ییگیتنینگ جسدلری نیمروز چوللریده تاپیلگن ایدی. بو کیشیلر یولگه ادهشگندن کیین هوا ایسیقلیگی و سووسیزلیک سببلی هلاک بولگنلری ایتیلگن ایدی.
خلقارا مهاجرت تشکیلاتی هم، نیمروز چوللریده افغانستان فقرالری هلاک بولگنیدن افسوس بیلدیریب، مهاجرت یونهلیشلریده انسانلر اولیشینی «فاجعه» دیب و قربانلرنینگ عایله اعضالری بیلن همدردلیک بیلدیرگن.
سونگی ییللرده، قشاقلیک، ایشسیزلیک و ایش فرصتلری یوقلیگی سببلی افغانستان کوپینچه اهالیسی ناقانونی مهاجرت قیلیشگه مجبور بولگن؛ بو یول هر ییلی مهاجرلردن بیرقطارینینگ اولیمیگه سبب بولگن.
