تیری ییرتیلیشی یاده-استریا، تیرینینگ حددن تشقری تارتیلیشی نتیجهسیده اورته گه کیلهدیگن ایزلر دیر. مذکور ایزلر کوپراق بلاغت، تنه وزنی تیز شکلده اوزگریشی و حاملهدارلیک دورهسیده تاپیلیب و بو حالت عیاللردن قطاری اوچون تشقی کورینیش خواطرلرینی اورته گه کیلتیرگن.
لغمان ده عیاللردن قطارینینگ ایتیشلریچه، حاملهدارلیک دورهسیده «استریا» اسملی تیری ییرتیلیشی حالتی بیلن روپهره بولهدیلر. اوشبو عیاللر گه کوره، تیریلری اوستیده توستدن مذکور تغییرلر تاپیلیشی، قورقیش، خواطر و جدی روحی باسیملرگه سبب بولگن.
لغمان یشاوچیسی بولمیش ۲۲ یاشر مروهنینگ ایتیشیچه، حاملهدارلیگی سکیزینچی آییده قارین و ایاق قسمتلری تیریسی ییرتیلیب و بو ایزلرنی کوریش اونینگ خواطرلریگه سبب بولگن. «چقهلاغیم توغیلگنیده هم بو وضعیت یخشی بولمهدی. حاضر هم بار. جوده قیغولنهمن. ایتهدیلر که بو کسللیک باشقه عیاللرده هم بار دیب، بیراق باشده دوالنگنیمده، حاضر بو رقم بولمس ایدی دیب توشینهمن.»
لغمان یشاوچیسی بولمیش، اوچ باله آنهسی ۲۵ یاشر پریگلنینگ ایتیشیچه، حاملهدارلیکنینگ تورتینچی آییده تیری خارشیدن کیین تنهسیده ییرتیلیش شکلیده ایزلر تاپیلیب و بو وضعیت اونینگ روحیگه تاثیر قویگن. «یاغ سورتر ایدیم، بیراق چیزیق شکلدهگی ایزلر کیتمهدی. روحیم گه کوپ تاثیر قویگن. تورموش اورتاغیمدن حتا یاشیریدیم که کولمهسین دیب. باش کوپ تشویش قیلهر ایدیم، لیکن تورموش اورتاغیم بو طبیعی بیر قیینچیلیک و کوپ تشویش قیلمسلیگیمنی ایستهدی. حاضر ایتهمن که باشدن بیلسه ایدیم بو وضعیتدن خواطرلنمهیدیم.»
شونینگدیک بو ولایت یشاوچیلریدن باشقه بیری ۲۴ یاشر سهیلانینگ ایتیشیچه، مذکور ییرتیلیشلرنینگ تاپیلیشی آلدی آلینیشی اوچون تورلیخیل کریملردن فایدهلنگنی بیلن، لیکن حاملهدارلیکنینگ ییتینچی آییده ایزلر تاپیلیب و حاضر بو وضعیتدن شرم قیلهدی. «هر رقم یاغدن فایدهلندیم، لیکن اونچهلیک فایده قیلمهدی. هر مرته بو چیزیقلرنی کورگنیمده جودهیم خفه بولهمن. بو وضعیتدن شرم قیلهمن. ینه هم مذکور حالتگه عادت قیلیشگه حرکت قیلهمن.»
بو بیلن بیرگه، نسایی-ولادی شفاکارلرینینگ ایتیشلریچه، تیری چوزیلیشی ایزلری اصلیده تیرینینگ ایکینچی لایهسیده یوزگه کیلهدیگن ییرتیلیش بولیب، تیرینینگ حددن تشقری تارتیلیشی اینیقسه حاملهدارلیک دورهسیده اورته گه کیلهدی.
لغمان ولایتی الینگار تومنیدهگی نسایی-ولادی شفاکارلریدن وژمه ساداتنینگ ایتیشیچه: «تیز بیر شکلده وزن آلهدیگن یا-ده جنیننینگ کته بولیشی کوپراق بو حالتگه سبب بولهدی. ساغلام آوقتلنیش، ییترلی سوو ایچیش، اوسیملیک یاغلردن فایدهلنیش مهم دیر. ینگیلیکده تاپیلهدیگن و رنگی قیزیل بولگن تیری یوزیدهگی چیزیقلر، یخشیراق دوالنه آلهدی.»
بو ولایتدهگی نسایی-ولادی شفاکارلردن باشقه بیری ریما صافینینگ ایتشییچه، تیری ییرتیلیشلرینینگ بوتونلی شکلده دوالنیشی ممکن ایمس، بیراق تیزلیکده مراقبت قیلیش استریانینگ کوپهیشی آلدینی آلالهدی. «آنهلرگه قارینلرینینگ زیتون یاغی، ساده یاغ یا-ده واسلین بیلن یاغلشلرینی توصیه قیلهمیز. بو ایش تیرینینگ ملایم بولیشیگه سبب بولهدی. یاش قیزلر یا-ده نازک تیریگه ایگه بولگن قیزلر کوپراق ضرر کورهدی. تیری ییرتیلیشینینگ بوتونلی دوالنیشی ممکن ایمس، لیکن تیزلیکده مراقبت قیلیش، ساغلام آوقتلنیش، سپورت قیلیش و ملایم قیلووچی نرسهلردن فایدهلنیش ینگی ایزلر تاپیلیشی همده اونینگ کوپهیشی آلدینی آلالهدی.»
شفاکارلرگه کوره، حاملهدارلیک دورهسیده فزیکی تغییرلر عیاللر آرهسیدهگی طبیعی تجربه بولیب و تیری ییرتیلیشی ایسه کوپ ترقهلهدیگن بیر حالت دیر؛ چونکه عیاللر تیریسی جنیننینگ کته بولیشی بیلن تارتیلهدی. مذکور اوزگریشلر بعضا دایمی بولهدی؛ بیراق شفاکار مصلحتی و تیزلیکده دوالنیش بیلن تیری ییرتیلیشی کوپهیش امکانیتینی کمهیتیریش ممکن.
