افغانستان اولاق لیگی آلتینچی باسقیچی فاینل بیلشوویده، سرپل و یما پترول اولاق تیرمه جماعهلری یول تاپگنلر.
بوگون (۲۴-قوس، شنبه) کابل شهری حدودلریگه قرهشلی «یکه توت» منطقهسیده کیتمه-کیت اۉتکزیلگن اولاق لیگی اویینلریده، یما پترول ۶-۳ حسابی بیلن بدخشان گه غلبه قازانیب و بو مسابقهلرنینگ بیرینچی فاینلیستی بولدی و ایکّینچی اویینده سرپل اولاق تیرمه جماعهسی هم فاریاب یاشلری گه ۶-۰ حسابی بیلن غلبه قازانیب و ایکّینچی فاینلیست بولدی.
بیزلرنینگ فیسبوک صحیفهمیزگه باش اورینگ!
یمال پترول اولاق تیرمه جماعهسی «الف» گروهیدن قندوز، فاریاب یاشلری و بغلاننی یوتیب توقیز امتیاز بیلن بیرینچی جماعه اولهراق یریم فاینل گه یول تاپدی و بو مسابقهده بدخشان گه غلبه قازانیب و فاینلیست بولدی.
شونینگدیک، سرپل؛ «ب» گروهیدن بدخشان، سمنگان و بلخ یاشلری گه غلبه قازانیب و توقیز امتیاز بیلن بو مسابقهلرنینگ یریم فاینلی گه یول تاپیب و یریم فاینلده هم فاریاب یاشلرینی ۶-۰ حسابی بیلن مغلوب قیلیب و فاینلده یما پترول رقیبی بولدی.
بیزلرنینگ «ایکس» ترماغی ده هم تعقیب قیلینگ!
اوشبو هفته ۲۶-قوس، دوشنبه کونی فاریاب یاشلری- بدخشان؛ ایکّینچی و اوچینچی اورین همده سرپل-یما پترول اولاق تیرمه جماعهلری بیرینچی و ایکّینچی اورین اوچون بیلشهدیلر.
