اسکاتلند دولتی، افغانستان شرقیده زلزلهدن جبرلنگنلرنینگ قوللب-قوتلش اوچون خلقارا ایکی جمغرمه آرقهلی ۲۵۰ مینگ پوند اجرهتگنینی معلوم قیلگن.
اسکاتلند تشقی ایشلر ادارهسی، بوگون ایرتهلب (۶-جدی، شنبه)، بیر بیانیه آرقهلی یازیشیچه، اوشبو یاردملر کریستین اید و تیرفاند جمغرمهلری آرقهلی زلزلهدن ضرر کورگن منطقهلردهگی یشاوچیلرگه کورسهتیلهدی.
مذکور بیانیه اساسیده، بو جمغرمهلردن هر بیری جبرلنگن منطقهلرده شاشلینچ یاردملر جملهدن نقد پول، ایسیق کییم-کیچگ، طبی پاکتلر و روحی قولب-قوتلش خذمتلری کورسهتیلیشی مقصد، اسکاتلند انسانسیورلیک شاشلینچ صندیغیدن ۱۲۵ مینگ پوند قولگه کیلتیرهدی.
اسکاتلند تشقی ایشلر وزیری آنگوس رابرتسوننینگ ایتیشیچه، افغانستان اقتصادی قیینچیلیک، خلقارا یاردملر کمهیگنی و انسانی انقراض بیلن روپهره بولگنی بیرحالده، زلزلهلر یوز بیرگن. اونگه کوره، افغانستان شرقیده قیشلاقلردن بیر قطارینینگ بوتونلی خراب بولگنی و کینگ کولمی انسانی تلفات، وضعیتنی یامانراق قیلگن.
افغانستان ده تیرفاند نهادی مدیری سولومون کورنلیوسنینگ ایتیشیچه، بو مملکت شرقیدهگی جبرلنگن عایلهلردن قطاری حاضرگچه خیمهلر یا-ده خراب بولگن باشپنهلرده حیات کیچیریب و مهم بیر وقتده اوشبو مالی یاردم، قیش موسومیده حیاتنی سقلهب قالووچی یاردملرنینگ کورسهتیش همده دستلبکی روحی یاردم بوییچه سیمینار اوتکزیش امکانیتینی یرهتهدی.
جاری ییلده افغانستان شرقی و شمالیده ایکیته کوچلی زلزله یوز بیریب و کوپینچه جانی همده مالی زیانلرگه سبب بولگن.
جاری قویاش ییل ۹-سنبله، افغانستان شرقی ولایتلریده ۶ درجه ریشترلیک زلزله یوز بیریب و کنر ولایتیده اینگ کوپ جانی و مالی زیانلر ثبت بولدی. بو واقعهده ایکی مینگ ۲۰۰ دن آرتیق کیشی اولیب، اوچ مینگ ۶۰۰ دن آرتیق کیشی یرهلنگن و شونینگدیک قریب ۷ مینگ یشش اوی بوتونلی یا-ده قسمی شکلده ویران بولگن.
شونینگدیک ۱۲-عقربده یوز بیرگن زلزله، شمالی ولایتلرده کینگ کولملی زیانلر و تلفات گه سبب بولدی. معلومات اساسیده، مذکور واقعهده ۲۷ کیشی اولیب و بیرمینگدنآرتیق کیشی یرهلنگن همده اوچ مینگدن آرتیق یشش اوی خراب بولگن.
