سلمه تیکیش نورستان‌ده‌گی ایریم عیاللر اوچون عنعنوی هنردن تشقری، درآمد تاپیش و عایله خره‌جت‌لرینی قاپلشگه یاردم بیره‌دیگن واسطه گه هم ایلنگن. بیراق ایش امکانیت‌لری‌نینگ چیکلنگنی، تعلیم و کسب اورگه‌تیشگه بولگن احتیاج همده محصولات‌لرنی بازار گه چیقریش بوییچه قوللب-قوتلش دستورلری‌نینگ یوقلیگی اوشبو کسب‌نینگ رواجلنیشیگه توسقینلیک قیلماقده.
۲۸ یاشلی زلیخا، تخمیناً بیر ییلدن بیری سلمه تیکیش بیلن شغللنه‌دی. اونینگ ایتیشیچه، بو ایشدن آله‌دیگن درآمدی آز بولسه-ده، حیاتی احتیاجلری‌نینگ بیر قسمینی قاپلشگه یاردم بیره‌دی. او شونده‌ی دییدی: «درآمدی کوپ ایمس، اما کونده‌لیک خره‌جت‌لر، کییم-کیچک، شخصی بویوملر و عایله‌نینگ ایریم خره‌جت‌لرینی قاپلشگه یاردم بیره‌دی. حتا شو آزگینه درآمد هم مهم، چونکی او اوی خره‌جت‌لرینی قاپلشده می‌نینگ هم حسیم بولیشیگه امکان بیره‌دی.»
۳۱ یاشلی شکیلا هم، قریب اوچ ییلدن بیری سلمه تیکیش بیلن شغللنه‌دی. اونینگ ایتیشیچه، اوشبو هنردن آله‌دیگن درآمدی عایله‌سی خره‌جت‌لری‌نینگ بیر قسمینی قاپله‌یدی همده فرزندلری‌نینگ کونده‌لیک و تعلیم گه عاید احتیاجلرینی تأمینلشده مهم رول اوینه‌یدی. اونگه کوره: «بو درآمد عایله‌م اوچون کتته یاردم. تاپگن پولیم‌نینگ کوپ قسمینی اوی احتیاجلری، کییم-کیچک و باله‌لریم‌نینگ تعلیم خره‌جت‌لریگه صرفله‌یمن.»
نورستان‌ده‌گی تیکووچیلیک اوستاخانه‌لریدن بیریده استاذ ۲۷ یاشلی بی‌بی آمنه، اوشبو هنرنی باشقه قیزلر گه هم اورگه‌تیشگه حرکت قیلماقده. اونینگ مقصدی قیزلر اوچون کوپراق تعلیم آلیش و ایش بیلن تأمینلنیش امکانیت‌لرینی یره‌تیش دیر. او شونده‌ی دییدی: «اگر کوپراق امکانیت و شرایط گه ایگه بولسک، بو ساحه‌ده کوپراق شاگردلرنی تیارلشی‌میز و اوزیمیز همده باشقه‌لر اوچون ینگی ایش اورینلرینی یره‌تیشی‌میز ممکن.»
اقتصاد شناسلر هم اوشبو هنر رواجلنتیریلیشی اوچون تعلیم، مالیه‌وی یاردم و بازار قیدیریلیشینی مهم دیب بهاله‌یدیلر.
اقتصاد شناس سیداحمدنینگ ایتیشیچه، سلمه تیکیش اوی شرایطی‌ده بجریلیشی و کم سرمایه طلب قیلیشی سببلی عیاللر و قیزلر اوچون درآم منبعی گه ایلنیشی ممکن. او شونده‌ی دییدی: «سلمه تیکیش نورستان‌ده عیاللر اوچون برقرار درآمد منبعی بولیشی ممکن. چونکه بو اوی شرایطی‌ده بجریله‌دیگن هنر بولیب، کم سرمایه طلب قیله‌دی. اگر مناسب بازار، تعلیم و مالیه‌وی یاردم بولسه، عیاللر منتظم درآمد تاپیشلری ممکن.»
شونگه قره‌می، اوشبو هنرنی رواجلنتیریش و محصولات‌لرنی ساتیش بازارینی کینگه‌یتیریشگه قره‌تیلگن قوللب-قوتلش دستورلری‌نینگ یوقلیگی اساسی معمالردن بیری بولیب قالگن.
نورستان صناعت و سودا اداره‌سی سرپرستی لقمان حکیم بو باره‌ده شونده‌ی دییدی: «حاضرگچه سلمه تیکیش محصولات‌لرینی قوللب-قوتلش یا کی اولرنینگ سودا بازارینی کینگه‌یتیریش بوییچه هیچ قنده‌ی دستور عملگه آشیرمه‌گن میز.»
موجود چیکلاولر گه قره‌می، سلمه تیکیش ایریم عیاللر و قیزلر اوچون کسب-هنر اورگه‌نیش و درآمد تاپیش امکانیتینی یره‌تگن. عیاللر و بیلرمانلرنینگ فکریچه، کوپراق تعلیم بیریش، مالیه‌وی یاردم کورسه‌تیش و مناسب بازار یره‌تیش آرقه‌لی اوشبو هنرنی رواجلنتیریش همده اونینگ عایله‌لر اقتصادیاتیده‌گی رولینی ینه‌ده آشیریش ممکن.
