روسیهنینگ انسان پرورلیک یاردملری بلخ ولایتیده بیرلشگن ملتلر تشکیلاتی آزیق-آوقت دستوریگه تاپشیریلدی.
اوشبو یاردم یوکی ۴۲۰ تُن اوندن عبارت بولیب، بوگون (۳ ثور/۲۳ اپریل، پنجشنبه) بلخده روسیه باش قنسولی ایگور نیکولایف تامانیدن بیرلشگن ملتلر تشکیلاتی آزیق-آوقت دستوریگه تاپشیریلگن.
نیکولایف، بو یاردملر محتاجلر گه تینگ شکلده ترقهتیلیشیگه تأکیدلب، اوشبو میلادی ییل جریانیده دییرلی تورت مینگ تُن اون افغانستان خلقی گه یاردم کورسهتیلیشیگه قرار قیلینگنینی ایتدی.
شو بیلن بیرگه، بلخده بیرلشگن ملتلر تشکیلاتی آزیق-آوقت دستوری مسئوللری، روسیهنینگ اوشبو یاردملریدن منتدارلیک بیلدیرسهلرده، بیراق بودجه آزلیگی سببلی انسان پرورلیک یاردملر کمهیگنیدن خبر بیردیلر.
بلخده اوشبو نهاد سرپرستی عبدالرزاق ایوبی، اقتصادی قیینچیلیک، قوشنی مملکتلردن مهاجرلرنینگ مجبوری چیقریلیشی، طبیعی آفتلر سببلی، محتاج عایلهلر سانی کوپهلیشیگه سبب بولگنینی معلوم قیلدی.
مذکور نهادنینگ معلوماتلریگه کوره، میلادی ۲۰۲۶ ییلده افغانستانده دییرلی ۱۷ میلیون کیشی، آچلیک بیلن روپهره دیر.
بیرلشگن ملتلر تشکیلاتینینگ ایتیشیچه، اولرنینگ معلوماتلری افغانستانده هر ۱۰ عایلهدن تخمیناً ۸ عایله، یخشی آزیق-آوقت مادهلرینی ساتیب آلیشگه قوربی ییتمهیدی.
