سمنگان یشاوچیلریدن عبدالخالق، ۱۲-عقرب یوز بیرگن زلزلهده اوشبو ولایت فیروزنخچیر تومنی قیشلاقلریدن بیریده جایلشگن اویینینگ قولهگنینی بیان قیلگن. او، زلزله یوز بیرگن کونلرده عایلهسیگه بیر لقمه نان تاپیش امیدی گه تاجیکستان ده ایش بیلن شغللنگن ایکن.
عبدالخالقنینگ کوپهیتیریشیچه، سمنگان ده یوز بیرگن زلزلهدن خبر بولگنیدن کیین بوش قول و کوپینچه تشویش بیلن افغانستان گه قیتگن. قیشلاققه ییتیشگنیده، ویرانهگه اَیلنگن اویی بیلن روپهره بولگن. زلزله برچه نرسهسینی نیچه ثانیهده توپراققه اَیلنتیرگن. بیرینچی لحظهلرده، فقط بیر سوال اونینگ آنگینی یاندیرگن– بالهلریم تیریک می؟
عبدالخالقنینگ قوشنیلری اوشه کون واقعهسینی حکایه قیلیب بیریشهدی که اونی ایشیتیش اونینگ نفسینی قیستیرهدی؛ آلتیته کیچیک بالهسی ویرانهلر آستیده قالگن ایکن و اولرنینگ سعیوحرکتی بولمسه، بوگون بالهلریدن هیچ بیری تیریک قالمس ایکن. «کمبغللیک اوچون تاجیکستان گه کیتگن ایدیم؛ زلزله بولگنیده خاتینیم و بالهلریم توپراق آستیده قالگن ایکن و قوشنیلریمیز اولرنی ویرانهلر آستیدن چیقرگنلر.»
عبدالخالقنینگ عایلهسی زلزلهدن جدی شکلده زیان کورمهگن بولسهده؛ لیکن برچه نرسهلرینی قولدن بیرگنلر. مذکور ایرکک بیر قطار موسسهلر آرقهلی بیرته خیمه و بیر مقدار نقد پول قولگه کیلتیرگن که بو یاردم، ویران بولگن اویی برابریده فقط سطحی بیر دوالنیشدن آرتیق نرسه ایمس. خیمه ایچیگه کوز موسومینینگ ساووق شمالی تیگهدی و بالهلری بیر-بیریدن کیین کسل بولگن. او، بالهلرینی کلینیککه آلیب بارگن؛ لیکن ییترلی امکانیت بولمهگنی سبب، دوالنمهگن. «چولدهمیز و خیمهده بالهلریم کسل بولدی. تومن کلینیگیگه آلیب باردیم که ایکی ته آق دارو بیردی. اوشبو کلینیک جودهیم گوجوم و برچهنینگ قیینچیلیگینی حل قیله آلمهیدی.»
عبدالخالقنینگ حیاتی ییللردن بیری کمبغللیک و قشاقلیک آرهسیده قالگن. او هر ییلی جدی مالی نیازلری اوچون تاجیکستان گه کیتهدی و آلتی آی بو مملکتنینگ تاغلریده هینگ توپلشگه شغللنهدی که بو ایش درآمدی آز دیر، بیراق جاری ییلده او و قیشلاغیدهگی ۶۰ دن آرتیق کیشیگه یخشی بیر ییل بولمهگن. هینگ حاصلی بوزیلیب و ایشلاوچیلر زلزله یوز بیرگن قیشلاقلریگه بوش قول بیلن قیتگنلر. «یخشی ییل بولیب و کوپینچه حاصل بولگنیده، ۱۰۰ مینگ ایشلهیمیز؛ درست ییل بولمهگنیده، اوشنچه تاپهمیز که اوز صرف-خرهجتلریمیزنی تامین قیلسهک.»
اوزی کسل بولگن عبدالخالقنینگ ایتیشیچه، هر کونی بالهلرینینگ تیریک قالیشی اوچون کسل وضعیتی بیلن سعیوحرکت قیلهدی. او، قیینچیلیکلرنینگ کوپلیگی سبب، باشقه حیاتینی توزهتیشگه کوچی ییتیشمسلیگینی ایتهدی. ساووق خیمه، کسل بالهلر و ویران بولگن اوی، اونینگ بوینیگه آغیرلیک قیلهدی.
عبدالخالق، حاضر ایسه یاردم بیریلیشنی کوتیب تورگن. او، حکومتی مسئوللر و یاردم بیرووچی نهادلردن ساووق هواده خیمهلرآستیده نفس آلهدیگن و هر کیچه بیللی بولمهگن بیر ایرتهنینگ خواطریده اوخلهگن عایلهلر سیسینینگ ایشیتیلیشینی سورهگن. «ساووق هواده بالهلریمیز کسل بولگن؛ اویمیزنی قیته توزهتیشگه امکانیتیمیز یوق؛ قرض بیلن بیراز خشت آلدیک که وقتینچهلیک بیر جای توزته آلسم.»
عبدالخالق سوزلرینینگ آخریده هم، بالهلری درس اوقیب و اونینگ یشهگن قیینچیلیکلرینینگ تجربه قیلمسلیکلرینی آرزو قیلهدی.
