سمنگان ولایتی فیروزنخچیر تومنی «قوشمحله» قیشلاغیده ۱۲-عقربده یوز بیرگن زلزلهده جبرلنگن عایلهلر، یاردم بیروچی نهادلر و محلی رسمیلردن، اولر گه جدی دقت قیلمهگنلریدن شکایت قیلهدیلر.
اوشبو یشاوچیلر، یوللر بوزوقلیگی و قیشلاقلری تومن مرکزیدن اوزاقلیکنی، یاردملر وقتیده یېتیب بارمسلیککه سبب بولگنینی ایتهدیلر.
قوشمحله قیشلاغی یشاوچیلرینینگ فکریچه، بو قیشلاق فیروزنخچیر تومنی مرکزیدن ۳۰ کیلومتر اوزاقده جایلشگن و بو تومننینگ اوزاق و محروم قیشلاقلریدن بیری دیر.
قوشمحله قیشلاغی یشاوچیسی محمد و نوربای، بو قیشلاق اهالیسی گه دقت قیلینیب و یاردم کورسهتیلیشینی سورهیدیلر.
محمد شوندهی دیېدی: «منطقهمیز هېچ سروی بولگنی یوق. احتمال باشقه قیسی منطقه، محل یا کی قیشلاق سروی بولگن بولسه، افسوس بیلن بیز گه یاردم بیریلگنی یوق. سروی بولمهگنلیک سببی تومن مرکزیدن اوزاقده جایلشگن بولیشیمیز ممکن.»
نوربای گه کوره: «سرک توزیک بولسه اېدی کوپینچه نهادلر کیلیب بیز گه یاردم بیرگن بولردی. حاضر بیز گه اونچهلیک دقت قیلینمهگن. خیمه بیریشگن بیراق کوپ ساووق. چیدهب بولمس قهرتان. آزیق-آوقت، یاقیلغی ماده بولیمیده قیینچیلیگیمیز کوپ.»
اوشبو عایلهلر، قیشلاقلری تومن مرکزیدن اوزاقلیگی و یوللری بوزوقلیگی سببلی، انسان سیورلیک یاردملردن محروم قالیب و اولر گه نسبتن اونچهلیک دقت قیلینمهگنینی معلوم قیلهدیلر.
بو قیشلاق یشاوچیلریدن بولمیش کمالالدین، قیشلاقلریگه نسبتن یاردم بیروچی نهادلرنینگ دقتسیزلیگیدن تنقید قیلهدی.
او، سلاموطندار بیلن صحبتده شوندهی دیېدی: «فیروزنخچیر تومنیدن ۳۰ کیلومتر اوزاقده میز. یوللریمیز جوده هم بوزوق، داوانلی یولی بار موترلر کوپ قیینچیلیک بیلن قتنهیدی، کیلهدیگن موترلر قیشلاق ایچیده کیله آلمهیدی. سرک توزیک بولگنده کوپینچه یاردم کورسهتیلگن بولردی.»
بیراق فیروزنخچیر تومنی محلی مسئوللری، قوشمحله قیشلاغی یشاوچیلرینینگ ادعالرینی رد قیلیب ایتیشلریچه، زلزله طفیلی جبرلنگن عایلهلر گه یاردم کورسهتیش اوچون، انسان سیورلیک یاردملرنی جذب قیلیش گه سعی-حرکت قیلماقدهلر.
سمنگان فیروزنخچیر تومنی اولسوالی اورین باسری عبدالمنان اسلمی تاتار گه کوره: «ایشانچ بیلن ایتهمیز که انسان سیورلیک یاردملر تینگ ترقهتیلهدی. اسلام امیرلیگی حکومتیده قرینداش گه بیریش یوق. اهالی گه وعده بیردیک و نهادلر گه هم ایتدیک، مستحق کیشیلر انیقلنیشی اوچون انیق سروی قیلسینلر. وکیللریمیز بیرگهلریده بار.»
معلوماتلر گه کوره، سمنگان ولایتی فیروزنخچیر تومنی قوشمحله قیشلاغیده ۵۰۰ دن آرتیق عایله یشهیدی و مملکت شمالیده یوز بیرگن زلزلهدن اېنگ جبر کورگن حدود حسابلنهدی؛ حاضرگی کونده بو حدود اکثریت اهالیسی خیمهلر آستیده تورلی قیینچیلیک بیلن حیات کیچیریب کیلماقده.
