مملکت جمهور رئیسی محمداشرف غنی بیر بویروغ آرقه‌لی، ولایتلر نینگ سوزلاوچیلیک پست‌لرینی بیکار ایتیب و بوندن بویان رسانه‌لرگه معلومات بیریش اوچون ولایتلر حاکم‌لری مسؤل دیگن.
تخار حاکمی سوزلاوچیسی ینگی‌لیکده بیر میدیا بیلن صحبت اوتکزیب، افغانستان هوائی کوچلری تخار نینگ مرکزی تالقان شهریده بیر مسجد اوستیگه اشتباهی هجوم اویوشتیرگنی نتیجه‌سیده، ۱۲ باله هلاک و ۱۴ کیشی یره‌لنگنی‌نی ایتگنیدن کیین، جمهور رئیس محمداشرف غنی اوشبو بویروغ نی صادر قیلگن.
جمهور رئیس نینگ بویروغیده، ولایتلر حاکم‌لری نینگ سوزلاوچی‌لری بیکار ایتیلیشی چیککه‌سیده، تخار حاکمی سوزلاوچیسی نینگ بیرگن معلوماتی ناتوغری بولگنی اوستیگه تأکید ایتیلگن.
انه‌شوحالده، قطار سوزلاوچی‌لر و میدیالردن حمایت قیلووچی نهادلر، جناب غنی نینگ اوشبو قرارینی ناتوغری و اساسی قانون‌گه قرشی عنوان قیلگنلر.
بادغیس حاکمی سوزلاوچیسی نجم‌الدین برهانی ایتیشیچه، سوزلاوچی‌لر یمان امنیتی وضعیتده و دولت‌گه قرشی قوراللی عصیانچی‌لر تهدیدی آستیگه، امتیازلری بولمسدن سوزلاوچیلیک پستیده ایش قیلگنلر و حاضر دولت تامانیدن قربان بولمسلیکلری کیره‌ک.
عین‌حالده، باشقه بیرقطار سوزلاوچی‌لر جمهور رئیس قراریدن جدی صورتده تنقید قیلیب ایتیش‌لریچه، سوزلاوچی‌لر هرکون اینگ آز ۴۰ – ۵۰ ژورنالیست سوراق‌لریگه جواب قیته‌ره دیلر، لیکن ولایت حاکم‌لریده ژورنالیست‌لر سوراق‌لریگه جواب قیته‌ریش اوچون زمانی یوق.
جمهور رئیس نینگ اوشبو قراری برابریده، میدیا و ژورنالیست‌لردن حمایت قیلووچی نهادلر هم واکنش کورستگن‌لر.
افغانستان ایرکین میدیالریدن حمایت قیلووچی نهاد نینگ عضوی محسن کریمی، جمهور رئیس تامانیدن ولایتلر سوزلاوچیلیک پستی بیکار ایتیلگنی خصوصده جدی صورتده واکنش کورستیب، جمهور رئیس نینگ اوشبو بویروغی ایرکین سوزنی ایاق آستی قیلیش، معلومات‌لرگه قول تاپیش‌گه چیکلاو تعیین‌لش و خبرچی‌لر برابریده بویوک قیین‌چیلیک یره‌تیش دیگن.
شونینگدیک، هرات ولایتی خبرچی‌لر خوفسیزلیگی‌نی تأمین قیلووچی کمیته‌سی نینگ مسؤلی همایون نظری، ولایت حاکم‌لری سوزلاوچیلیک بستی بیکار ایتیلیشی‌نی ناتوغری بیر حرکت دیگن.
محلی ارگانلر اداره‌سی باشلیغی شمیم خان کتوازی، ولایت حاکم‌لری خبرچی‌لر سوراق‌لریگه جواب قیته‌ریشده مسؤل بولگنلریدن خبر بیرگن.
جناب کتوازی نینگ فیسبوک صحیفه‌سیده یازیشیچه، ولایت حاکم‌لری سوزلاوچیلیک بستی بیکار ایتیلمه‌گن، بلکیم اولر دولتی اداره‌لر آره‌سیده هماهنگ‌لیک قیلیش و ولایت حاکم‌لریگه یاردم بیریش مسؤلیتی‌نی بوینیگه آلگن.
