قطر، ایران و امریکا آرهسیدهگی اوروشنی یکونلش اوچون واسطهچیلرنینگ سعیوحرکتلری رواجلنگن باسقیچگه کیرگنینی معلوم قیلگن.
رویترز آژانسینینگ بوگون (۱۴-اسد/۵-اگست، چهارشنبه)، گزارش بیریشیچه، امریکا جمهور باشلیغی دونالد ترامپ و قطر امیری شیخ تمیم بن حمد آل ثانی، تلیفونی علاقهده واشینگتن و تهران آرهسیدهگی کیلیشماوچیلیکلر کمهیشی اوچون سعیوحرکتلر همده برقرار بیر کیلیشووگه ایریشیش احتمالی آشیشی حقیده صحبت قیلگنلر.
گزارش اساسیده، قطر امیری اوشبو تلیفونی علاقهده مذاکره اهمیتی، جون آیی اورتهلریده امضالنگن امریکا و ایران کیلیشووگه عمل قیلیش همده اونده نظرگه توتیلگن حربی عملیاتلرنینگ تیزلیک بیلن توختهتیش ضرورلیگینی تاکیدلهگن.
شونینگدیک قطر تشقی ایشلر وزیرلیگی سوزلاوچیسی ماجد الانصارینینگ ایتیشیچه، دیپلماتیک علاقهلر «اینگ رواجلنگن باسقیچلرگه» ییتیشگن.
اونینگ کوپهیتیریشیچه، قطر، پاکستان و عمان شامل واسطهچیلر یقین هماهنگلیک بیلن واشینگتن و تهران آرهسیدهگی مذاکرهلرنی آسانلشتیریب و تکلیفلر لایحهلری المشوویگه کمکلشماقده.
بو بیلن بیرگه، پاکستان خوفسیزلیک ییریک رسمیلریدن بیریگه کوره: «بو اوریندهگی یالغیز مقصدیمیز، مذاکرهلرنینگ باشلش اوچون ایکی تاماننی حاضر قیلیش دیر.»
بوندن آلدین، دونالد ترامپ تهران بیلن مذاکرهلر باشلنگنی و کیلیشووگه ایریشیش اوچون ایراننینگ «آخرگی فرصت» بیلن روپهره بولگنینی ادعا قیلگن ایدی؛ لیکن ایران رسمیلری بو ادعانی رد قیلیب و امریکا بیلن هیچ قندهی توغری مذاکرهنینگ جریان گه بولمهگنیگه تاکید قیلگن.
