ایرلری کوپ خاتینلیک بولگن عیاللردن بعضیلرینینگ ایتیشیچه، ایرلری ایکینچی مرته اویلنگچ، ایری نفقه و برچه قانونی رعایت قیلمهگن؛ بیراق دین عالملری و حقوق بیلرمانلری، ایر تامانیدن عیال حقوقی رعایت قیلینمهگن حالده، عیاللر عدلی نهادلر گه شکایت قیله آلیشینی ایتهدیلر.
بو عیاللر اقتصادی باسیملر گه دوچ کیلهیاتگنینی و اوز قانونی حقوقلری حقیده ییترلی معلومات گه ایگه ایمسلیکلرینی ایتیشهدی.
مزارشریف یشاوچیسی ۲۸ یاشلی یاسمین، ایری نیچه ییل آلدین ایکینچی خاتین آلگن و ایندی اورتهلریده عدالتنی رعایت قیلمسلیگینی معلوم قیلهدی. اونگه کوره، ایری اولر گه نفقهلرینی تولمهیدی و بالهلری بیلن تورلی قیینچیلیکلر گه دوچ.
او شوندهی دییدی: «آلدینلری اوی خرهجتلرینی بیر آز بیرردی، بیراق ایندی آیلر اوتهدی اوی خرهجتینی بیرمهیدی، بعضی وقتلر اویدهگی بویوملرنی ساتیشگه مجبور بولهمن. ایریم گه اوی خرهجتلرینی نیگه تولمهی سنگ دیب سورهسم، پولیم یوق دییدی، چونکی ایشی یوق کیچه تانگ آتگونچه ایرته نیمه پیشیرهی دیب اویلهی من. اوزیم-اوزیمگه پولی یوق ایکن نیگه ایکینچی خاتین آلدی دیمن.»
۳۰ یاشلی و تورت باله آنهسی ضیاجان، ایری ایکینچی مرته اویلنگچ، او [بیرینچی خاتینی) و بالهلرینی اونیتگنینی بیلدیرهدی. ایری عدالتسیزلیک یانیده اولرنینگ نفقهسینی بیرمسلیگینی قوشیمچه قیلهدی، ضیاجان.
او شوندهی دییدی: «نه خرهجت پولی و نه هم نفقه بیرهدی، اوچ-تورت بالم بیلن یشهیپمن، قرض آلهمیز، ایناغهلریمگه ایتهمن قندهی قیلهی دیب، ایتیشهدی بیزنی مسئولیتیمیز ایمس بیراق نیمه چاره قیلهی و بیر عیال من.»
زرغونه هم، ایرینینگ بیمهرلیگی و عدالتسیزلیکلریدن اچیق حکایه قیلهدی. اونگه کوره، ایری ایکینچی خاتین آلگنیدن سونگ بیرینچی خاتینی و بالهلرینینگ احوالیدن بیخبر و بیر تور اولرنی اونیتگن.
اونینگ ایتیشیچه: «ایکینچی خاتین آلگچ بیزنی اونیتدی، نه آزیق-آوقت و نه هم کییم-کیچیگیمیزدن خبری بار، حدودیمیزدن اوزاقده ایکینچی خاتینیگه اوی قوردی، حقوقیم حقیده بیلمهی من، اما شوندن خبریم بار کی اوزیم و بالهلریم نفقهسینی بیریشی کیرهک، ایکینچی خاتین آلهیاتگن پیتده مهریمنی سورهدیم، ایتدی قیسی مهر، شونچه پولیم بار کی اویلنهیپمن.»
دین عالملری و حقوق بیلرمانلری، خاتینلر اورتهسیده عدالت برقرار ایته آلیشنی کوپ خاتین آلیش شرطلریدن دیب بیان قیلهدیلر.
اولرنینگ ایتیشیچه، ایرککلر خاتینی و بالهلرینینگ نفقهسی و خرهجتینی تولشی کیرهک و قوربی ییتمسه ایکینچی خاتیننی آلمسلیگی افضل.
حقوق شناس زیبا زحل گه کوره، ایرلری تامانیدن عیاللر نفقهسی و تینگ حقوقی تأمین قیلینمهگن حالده، عیاللر محکمه گه مراجعت قلییب و حقوقلرینی ایرلریدن طلب قیلیشی ممکن.
اونینگ فکریچه: «اسلام نقطهی نظریدن بیر ایرکک قیله آلهدی تورت خاتین آلسه؛ بیراق تولیق عدالتنی رعایت قیلیش شرطی بیلن، عدالت یعنی تینگ نفقه، صرف-خرهجت، کییم-کیچک و یشش جای بیلن تأمینلش. ایرکک هر خاتینی اوچون نفقه تولمسه یا کی عیال گه ظلم قیلسه، عیال قیله آلهدی محکمه آرقهلی حقوقینی طلب قیلسه و حتا اجرهلیشنی طلب قیله آلهدی؛ بوندهی حالتده عیالنینگ مهر حقی محفوظ دیر.»
شو بیلن بیرگه، دین عالمی امانالله احمدی، ایرککنینگ ایکی یا کی اوندن آرتیق خاتینی بولسه، اولر اورتهسیده عدالتنی رعایت قیلیب و هر بیر عیالنینگ نفقهسینی تینگ شکلده تولشی کیرهک دییدی.
او شوندهی دییدی: «ایکی خاتینلیک ایرکک بیریگه قیزیقیب و باشقهسیگه قیزیقمسه، قیامت کونیده تنهسینینگ بیر تامانی فلج شکلده حشر بولهدی، عدالتنی رعایت قیلیشگه ایشانگن حالده ایکینچی خاتین آلیش ممکن، اما یورهک خواهشی شامل بولمهیدی و بیر ایرکک ایکی عیالنی بیر تور سیوه آلمهیدی.»
اسلام دینی و افغانستان مدنی قانونی گه کوره، ایرکک خاتینلری اورتهسیده عدالتنی رعایت قیلیب و اولرنینگ نفقهسینی بوتونلی تولشگه مجبور دیر.
