بو ییل کوز موسومیده، لغمان ده دهقانلردن قطاری اینیقسه سبزهوات ایکهدیگن عایلهلر، اوسیملیک آفتلری و کسللیکلرینینگ کینگ کولملی شکلده ترقهلگنی بیلن روپهره بولگنلر. «برگ ییهدیگن آق قورت» کبی آفتلر و باشقه کسللیکلر، برگلرنی سرغرتیریب و قوریتگن همده شلغم، کچالو، سبزی و باشقه برگلی سبزهواتلرنی سیزیلرلی درجهده کمهیتیرگن. بو خواطر عایله سرپرستی بیلن بیرگه ایکینچیلیک ییرلرده ایشلهیدیگن عیال دهقانلر آرهسیده هم کوپهیگن.
لغمان ولایتی الیشنگ تومنیده جایلشگن ییرلریده تورموش اورتاغی و عایله اعضاسی بیلن سبزهوات ایکیشگه شغللنگن ۲۴ یاشر مروه، بو ییلگی آفتلر توغریسیده ایتیشیچه: «بو موسومده، برگ ییهدیگن آق قورت کبی کوپینچه آفتلر، سبزهواتلریمیز اینیقسه کچالو، گشنیز، اسملاق و کاهو اوچون خوفلی دیر و کوپ زیان کورهدیلر. دارولردن فایدهلنگنیمیزده، محصوللردن ۴۰ فایزی اورتهدن کیتهدی. عیال دهقانلرگه تعلیمی دورهلر اوتکزیلیشی و صفتسیز دارولر بیریلیشیینی ایستهیمیز.»
شونینگدیک الیشنگ تومنیدهگی ۴۰ یاشر فرشتهنینگ ایتیشیچه، برگلر سرغریب و قوریگن همده ساتیلیش بازاری کمهیگن. «بو موسومده، آفت سبزهوتلر ریشهسینی اورتهدن کیتگزهدی. دارو بازارده بار؛ لیکن اونینگ قیمتی یوقاری و تاریخی اوتگن. بیزلرگه اصل دارولرنینگ بیریلیشینی ایستهیمیز. دارو قیمتی یوقاری دیر و اونینگ قیمتی ارزان بولیشی کیرهک.»
قرغهای تومنینینگ «دهمزنگ» قیشلاغیده آنهسی و سینگیلی بیلن بیرگه ایشلهیدیگن ۲۳ یاشر حبیبهنینگ ایتیشیچه: «آفت اورهدی، چیگیرتکه ییهدی یا-ده توپراقنی بوزهدی. محصولدن یریمی اورتهدن کیتهدی و بیزلر هم کمبغل کیشی. سریمساق و پیازدن بیر محلول نوزهتیب و اونی سیپهمیز. دارونینگ تیکین روشده دولت تامانیدن تامینلنیشی و بیزلرگه تعلیم بیریلیشینی ایستهیمیز و شونینگدیک مناسب ساتیلیش بازاری یرهتیلسین.»
عنعنهوی محلوللردن فایدهلنیشنینگ آز اثری بولیب و محصوللریدن یریمی اورتهدن کیتگن. دولتنینگ قوللب-قوتلهشی و دارولردن فایدهلنیش اوچون تعلیم بیریلیشی، نیاز دیر.
اوسیملیکلرنی سقلش بوییچه ایش بیلرمان محباللهنینگ ایتیشیچه، هوا اوزگریشلری و آگاهیلیک کملیگی، آفتلر کوپهیشیگه سبب بولگن. «دهقانلرگه عمومی آگاهیلیک بیرهمیز. زراعتی مکتبلر آچهمیز و آلدینی آلووچی کمپاینلر آرقهلی معلومات بیرهمیز.»
شوندهی بیرحالده، محلی مسئوللرنینگ ایتیشلریچه، حاضر ایسه آگاهیلیک بیریش برنامهلرینی اوتکزماقدهلر. لغمان ایکینچیلیک آمری بریالی همدردنینگ ایتیشیچه: «دهقانلر آگاهیلیگی آشیشی اوچون تورلی برنامهلرنی عملگه آشیرهمیز. آفتلر جدی بولگنیده، وزیرلیک وقتیده اقدام قیلهدی. لغمان ایکینچیلیک ریاستی، محصوللرنینگ ییغیم-تیریمی کوپهیشی اوچون دهقانلرگه زمانهوی اصوللرنی تعلیم بیرهدی.»
