پکتیا امنیه قوماندانلیگی مسئوللری، اوشبو ولایتده اوتگن اوروشلردن پارتلمهی قالگن راکت اوقی پارتلشی عاقبتیده، آلتی بالهنینگ اولیب و یرهلنگنیدن خبر بیرگنلر.
مسئوللرگه کوره، اوشبو واقعه ۷-دلو، یکشنبه کونی توشدن کیین، پکتیا ولایتی آریوب زازی تومنی اطرافیده جایلشگن «گلغندی» منطقهسیده یوز بیرگن.
پکتیا امنیه قوماندانلیگی سوزلاوچیسی منیب زدراننینگ ایتیشیچه، مذکور واقعه اوشبو بالهلرنینگ راکت اوقی بیلن اوینشلری چاغیده، یوز بیرگن.
بیزلرنینگ «ایکس» ترماغی ده هم تعقیب قیلینگ!
پکتیا امنیه قوماندانلیگی سوزلاوچیسینینگ کوپهیتیریشیچه، بو واقعهده بیر باله اولیب و بیر قیز شامل بیش باله ایسه یرهلنگن.
زدراننینگ اورغولشیچه، واقعهده یرهلنگنلر خوفسیزلیک کوچلری آرقهلی پکتیا حوزهیی کسلخانهسیگه انتقال بیریلیب و اولردن اوچ تهسینینگ وضعیتی آغیر دییلگن.
شونینگدیک نیچه کون آلدین هم، پروان ولایتی شینواری تومنینینگ «صوفیخیل» قیشلاغی اطرافیده، اوروشدن پارتلمهی قالگن قورال-یراق پارتلشی نتیجهسیده تورت باله یرهلنگن.
افغانستان ده بیرلشگن ملتلر تشکیلاتینینگ بالهلردن حمایت قیلووچی صندیغی (یونیسف)، میلادی ۲۰۲۴-ییلده افغانستان ده ۵۰۰دن آرتیق بالهنینگ اوروش جریانیدن پارتلمهی قالگن ماینلر پارتلشی عاقبتیده، اولیب و یرهلنگنینی اعلام قیلگن.
بیزلرنینگ فیسبوک صحیفهمیزگه باش اورینگ!
مذکور نهاد، اوتگن میلادی ییلده اوچ میلیون بالهگه اوروش جریانیدن پارتلمهی قالگن ماینلر خوفی حقیده تعلیم بیرگنینی ایتگن.
افغانستان اوروشلردن پارتلمهی قالگن قورال-یراغلر بیلن افلاسلنگن مملکتلردن بیری بولیب و مذکور مملکت اهالیسی اینیقسه بالهلردن قربانلیک آلهدی.
بوندن آلدین افغانستان ده بیرلشگن ملتلر تشکیلاتینینگ اورینباسرلیک هیئت دفتری (یوناما)، افغانستاننینگ بیرمینگ کیلومترمربعدن آرتیق توپراغی، اوروشدن قالگن ماینلر بیلن افلاسلنگنینی اعلام قیلگن.
