ننگرهار ولایتیده ایریم تاووق فارمدارلرینینگ ایتیشیچه، تاووق کسللیکلرینینگ ترقهلیشی اولرنینگ درآمدلرینی کمهیتیریب، اقتصادی ضرر کوریشلریگه سبب بولگن. اولر گه کوره، تاووق کسللیکلرینی آلدینی آلیش و دوالش اوچون احتیاج بولگن امکانیتلرنی ساتیب آلیشگه قوربلری ییتمهیدی.
ننگرهار ولایتی شینواری تومنیدن بولگن ۳۶ یاشلی سادیه، اوز اوییده قریب ۶۰ ته تاووق باقهدی و یومورتقه همده تاووق ساتیش آرقهلی عایلهسینینگ کوندهلیک خرهجتلرینینگ بیر قسمینی تأمینلهیدی.
اونینگ ایتیشیچه، تاووق کسللیکلری ترقهلیشی عاقبتیده بیر هفته ایچیده ۱۵ دانه تاووغی اولگن. بو ایسه اونینگ عایلهسی درآمدیگه سلبی تأثیر کورستگن.
سادیهنینگ سوزلریگه کوره، تاووقلرینی دوالش اوچون قریب ۵۰۰ افغانی صرفلهگن، بیراق حاضرگچه هیچ کیم تاووقلرنی ایملش و اولرنی کسللیکلر حقیده توشونتیریش اوچون قیشلاغیگه بارمهگن.
اونینگ کوپهیتیریشیچه، یوقوملی کسللیکلر قیسقه وقت ایچیده تاووقلر سانینینگ کمهیشیگه و عایلهلرنینگ اقتصادی احوالیگه سلبی تأثیر کورستگن. او شوندهی دییدی: «تاووقلریمیز اساساً یوقوملی کسللیکلر گه چلینهدی. بو کسللیکلر بیر تاووقدن باشقهسیگه آسانلیک بیلن یوقهدی. اگر بیته تاووق اوشبو کسللیککه چلینسه، بیر نیچه ساعت ایچیده باشقه تاووقلر هم کسل بولهدی. کسللیک ترقهلگنیدن سونگ ۱۰-۱۵ دانه تاووق اولهدی و فقط ۴۵ دانه تاووق قالهدی.»
ننگرهار ولایتینینگ سرخرود تومنی یشاوچیسی ۳۰ یاشلی ندا هم، شونگه اوخشش قیینچیلیککه دوچ دیر. اونینگ ایتیشیچه، کسللیکلرنینگ ترقهلیشی و تاووقلر سقلنهدیگن جاینینگ مناسب ایمسلیگی سببلی جمعی ۳۰ ته تاووغیدن فقط آلتیتهسی قالگن.
ندانینگ سوزلریگه کوره، تاووقلرنینگ اولیشی و یومورتقه کمهیشی اونینگ درآمدیگه سلبی تأثیر کورستگن. او شوندهی دییدی: «بو آیده تاووقلریمیز تورلی کسللیکلر گه چلیندی. اولر شماللـهدی، اولرنینگ کوپچیلیگی اولدی. ۳۰ دانه تاووقدن قریب آلتیتهسی قالدی.»
تاووق فارمی بیلن شغللنووچی ینه بیر عیال آسیا هم، عایلهسینینگ برچه یشش خرهجتلرینی تاووق باقیش آرقهلی تأمینلهیدی؛ بیراق کسللیکلرنینگ ترقهلیشی اونینگ اساسی درآمد منبعی گه سلبی تأثیر قویگن.
اونینگ سوزلریگه کوره، فصللر المهشیشی بیلن تاووقلر آرهسیده کسللیکلر هم کوپیهدی. ینگیلیکده ایسه اونینگ بیش-آلتی دانه تاووغی اولگن. «اوییمنینگ برچه خرهجتلرینی تاووق باقیش آرقهلی تأمینلهیمن. تاووقلریمیز کوپراق کسللیکلر گه چلینهدی. یازده ایسیق طفیلی نفس آلیش بیلن باغلیق معمالر گه دوچ کیلیشهدی، قیشده ایسه یوقوملی کسللیکلر ترقلهدی. حاضر بیش-آلتی دانه تاووغیمیز نابود بولدی. عایلهمنینگ برچه خرهجتلری و درآمدی عینن شو تاووقلر گه باغلیق.»
تاووق کسللیکلری طفیلی یوزه گه کیلهیاتگن معمالر فقط اوییده تاووق باقهدیگن عایلهلر بیلن چیکلنمهیدی، بلکی تجارت مقصدیده پرندهچیلیک فارملرینی یوریتهیاتگنلر هم اوشبو کسللیکلرنینگ ترقهلیشی عاقبتیده کوریلهیاتگن اقتصادی ضررلردن شکایت قیلیشهدی.
اقتصادشناس و ننگرهاردهگی دهقان میرویس رسولی، اوشبو ولایتده پرندهچیلیک ساحهسی ایش اورینلری یرهتیش، محصولات ایشلب چیقریش و اقتصادی سودا-ساتیقنی رواجلنتیریشده مهم اورین توتیشینی ایتهدی.
اونینگ سوزلریگه کوره، تاووقلرنینگ اولیشی و محصولات ایشلب چیقریش حجمینینگ کمهیشی پرندهچیلرنینگ اقتصادی قیینیچلیکلر گه دوچ قیلگن. او شوندهی دییدی: «اگر آلدینی آلیش چارهلر رعایه قیلینمسه، کسللیکلر کوتیلمهگنده ترقهلیشی و فارم ایگهلرینی کتته اقتصادی قیینچیلیککه دوچ قیلیشی ممکن.»
ننگرهار ولایتیده حیوانلر شفاکاری صدیقاللهنینگ ایتیشیچه، جوجهلر صفتلی، معیاری طلبلریگه جواب بیرهدیگن آوقت آزلیگی، فارملر بنالرینینگ طلبگه جواب بیرمهیدیگن طرزده قوریلگنی، یشش محیط خوفسیزلیک قاعدهلریگه رعایه قیلمسلیک همده اوز باشیمچهلیک بیلن فایدهلنیش اوشبو ولایتده پرندهچیلیک ساحهسینینگ اینگ مهم معمالری حسابلنهدی.
او، ایملش، فارملر تازهلیگی و دارو-درمانلردن توغری فایدهلنیش مهملیگینی تأکیدلهیدی. «فارملر فعالیتینی دوام ایتتیریشی اوچون ایملش، توغری آوقتلنتیریش، شماللتیش و تازهلیک قاعدهلریگه رعایه قیلیش ضرور. شونینگدیک، کسللیکلرنینگ ترقهلیشی و اقتصادی ضررلرنی کمهیتیریش اوچون دارو-درمانلردن شفاکارنینگ مصلحتی بیلن فایدهلنیش کیرهک.»
اوشبو ولایتدهگی تاووق فارملرینینگ سانی، کسللیکلر عاقبتیده اولگن تاووقلر مقداری و ییتکزیلگن مالیهوی ضررلر همده ایملش دستورلری حقیده معلومات آلیش مقصدیده بیر نیچه بار ننگرهار ولایتی ایکینچیلیک، سووغاریش و چارواچیلیک ریاستینینگ فکر-ملاحظهسینی آلیشگه حرکت قیلدیک، بیراق اوشبو گزارش نشر بولگونچه هیچ قندهی جواب آلالمهدیک.



