اسلام امیرلیگی باش وزیرینینگ اقتصادی اورین باسرلیگی، مملکتده قریب بیر میلیون کیشی مستقیم و نامستقیم طرزده «قالین» توقیش صناعتی بولیمیده ایشلهیاتگنینی معلوم قیلدی.
اوشبو اداره، بوگون (۲۷ سرطان/۱۸ جولای، شنبه) ایکس اجتماعی ترماغیده سونگی تورت ییل دوامیده بو صناعت سیزیلرلی درجهده رواجلنیب و تشقی بازارلر گه صادرات رقمی آشگنینی بیلدیردی.
مذکور اداره گه کوره، بو قالینلرنینگ آز قسمی مملکت ایچیده ساتیلهدی و کوپینچه قسمی ایسه تشقی بازارلر گه صادر قیلینماقده.
اسلام امیرلیگی باش وزیرینینگ اقتصادی اورین باسرلیگی، جاری ییلده ۱۴ میلیون دالر قیمتی گه ۷۶۰ مینگ متر مربع قالین تورکیه، روسیه، امریکا، آسترالیا، اروپا مملکتلری، کانادا، بیرلشگن عرب امیرلیگی همده افریقا بعضی مملکتلریده صادر ایتیلگنینی بیلدیرگن.
قالین توقیش اوچون کیرهک بولگن نرسهلر جملهدن رنگ، ایپ و برچه مادهلر مملکت ایچیده ایشلب چیقریلیشی معلوم قیلینگن.
اسلام امیرلیگی سونگی ییللرده قالین توقیش صناعتینی رواجلنتیریش مقصدیده قالین وارد قیلیش گه سالیقنی آشیرگن و اوشبو محصول گه بازار قیدیریش اوچون چین، اوزبیکستان، آذربایجان، تورکمنستان، هندوستان، بنگلهدیش و ایران کبی مملکتلرده قالین صناعتی کورگزمهلرینی اوتکزگن.
قالین افغانستاننینگ مهم صادرات محصولاتلریدن بیری حسابلنهدی و مینگلب عایلهلر اونی ایشلب چیقریش، توقیش، قداقلش همده صادر قیلیش ساحهلریده فعالیت یوریتهدی.
