لغمان، سبزهوات ایشلب چیقریش بولیمیده خودکفالیککه ییتیشگن و ایچکی نیازنی تامینلشگه علاوه، محصوللرینی مملکت ولایتلری جملهدن کابل گه صادر قیلهدیگن ولایتلردن بیری دیر. مملکتده قیش موسومیده سبزهوات ایشلب چیقریلیشی کمهیشی بیرحالده، بیراق اوشبو ولایتده دهقانلردن قطاری پلاستیک آستیده ایکین اصولیدن فایدهلنیب، سبزهواتنی موسومدن آلدین بازار گه چیقرهدیلر که بو ایش، بیراز قیمتلر برقرارلیگیگه سبب بولهدی.
لغمان ولایتی قرغهای تومنی یشاوچیسی کامران، ییریدن اوچیریم جریبیده پلاستیک آستیده تورلیخیل سبزهوات ایککن. اونینگ ایتیشیچه، بو اصولدن فایدهلنیشنینگ صرف-خرهجتلری یوقاری بولگنی بیلن، لیکن محصوللر ییغیلیشیدن قولگه کیلهدیگن درآمد قانیقرلی دیر. اونگه کوره، ایکیننینگ بو اصولیده، سبزهوات بوتهلری موزلنمهی و شونینگدیک تیزراق اوسهدی.
کامراننینگ کوپهیتیریشیچه: «حاضر بادرنگ، پمیدار، قلمپیر و قاره بادنجان کبی سبزهواتلر بیلن باشقه بیر قطار محصولنی ایککنمیز. هر بیر میله بیش افغانی، پلاستیک و کیمیایی کود صرف-خرهجتی هم کوپ بولگنی بیلن، بیراق مذکور سبزهوات یخشی حاصل بیرهدی که هم دهقان فایدهسی همده اهالی.»
دهقانلردن باشقه بیری هلالنینگ ایتیشیچه، بوتهلرنی سقلش اوچون پلاستیک و میله ساتیب آلیش خرهجتی یوقاری دیر و دهقانلردن قطاری اونینگ ساتیب آلیش امکانیتیگه ایگه ایمس. او، دولت و یاردم بیرووچی نهادلردن بو توغریده قوللب-قوتلنیش و همکارلیک بولینیشنی ایستهگن. هلالنینگ کوپهیتیریشیچه: «بیریریم جریب ییرگه پمیدار، بادرنگ و قلمپیر ایککنمیز. اونینگ سقلش قیین دیر. یامغیر و شمال بولگنیده، اونینگ یانیگه باریب توختهشیمیز کیرهک که پلاستیکنی شمال آلیب کیتمهسین یا-ده ایچیگه سوو کیرمهسین دیب. ایشی قیین دیر و پلاستیک هم قیمت دیر. دولت و موسسهلردن بو توغریده بیز بیلن همکارلیک قیلیشلرینی سورهیمیز.»
ایکینچیلیک ایش بیلرمانلرینینگ اورغولشیچه، قیش ده پلاستیک آستیده سبزهوات ایکیش دهقانلر اوچون کوپ فایدهلی دیر؛ چونکه بوتهلر اوسیشی و سقلهنیشی اوچون مناسب حرارتنی یرهتهدی.
ایکینچیلیک ایش بیلرمانلردن کرامتالله شفیقینینگ ایتیشیچه، ساووق و کوچلی شماللری بولگن منطقهلرده بو اصول یخشی نتیجه بیرهدی. «پلاستیکی تونللرده سبزهواتلرنی ییتیشتیره آلهمیز؛ چونکه حرارانی کنترول قیلیش مناسب شکلده عملگه آشیریلهدی. کون جریانیده قویاش نوری تونل ایسیشی و اوسیملیککه حرارت انتقال قیلیشیگه سبب بولهدی و بو ایسیقلیک کیچه تامان هم سقلنهدی. شونینگدیک تونل ایچیده نملیک ثابت قالهدی و اونگه علاوه، اوسیملیک کسللیکلردن کوپینچهسی برابریده سقلنهدی.»
باشقه بیر تاماندن، لغمان ایکینچیلیک، سووغاریش و چاروهچیلیک ریاستیده مسئوللرنینگ ایتیشلریچه، قرغهای تومنیده قریب ۱۵۰۰ هکتار ییرده پلاستیک آستیده ایکین بولگن که اونینگ کوپینچهسینی بادرنگ، پمیدار، قاره بادنجان و باشقه سبزهواتلر تشکیل بیرهدی. مسئوللرگه کوره، کیمیایی کود و اصلاح بولگن اوروغ ترقهتیلیشی توغریسیده هم دهقانلر بیلن همکارلیک بولگن.
لغمان ایکینچیلیک ریاستینینگ زراعتی ایشلری بوییچه آمری بریالی همدردنینگ سلاموطندار گه ایتیشیچه: «قرغهای تومنیده قریب ۱۵۰۰ هکتار ییرده پلاستیک آستیده ایکین بولگن که اونینگ کوپینچهسی بادرنگ، پمیدار، قاره بادنجان و باشقه سبزهواتلر دیر. بو تومنده دهقانلرنینگ مسلکی امکانیتی بیراز بار و زراعت ریاستی، دهقانلرنینگ بو یول آرقهلی کوپینچه درآمد قولگه کیلتیریشی اوچون پلاستیک آستیده ایکیننینگ رواجلنتیریب و حاضرگچه بو اصول جاری ایتیلمهگن حدودلرگه رواجلنتیریش اوچون سعیوحرکت قیلماقده.»
ایتیش کیرهک که، باشقه بیر قطار ولایتلرگه قرهگنده، لغمان ده موسومی و موسومی بولمهگن سبزهواتلر ایشلب چیقریلیشی کوچهیب و بو ولایت محصوللری ایچکی نیازلرنی تامینلش گه علاوه مملکت باشقه ولایتلریگه هم صادر بولهدی.
