اسلام امیرلیگی تشقی ایشلر وزیری امیرخان متقی، سیاست ساحهسیده بیرلشگن ملتلر تشکیلاتی باش کاتبینینگ اورین باسری روزمیری دیکارلو بیلن، پاکستاننینگ افغانستان گه هوا هجوملری، دوحه ییغیلیشلری، ایش گروهلری و باشقه مسئلهلر حقیده تلفونی صحبت قیلدی.
تشقی ایشلر وزیرلیگی، بوگون (۵ حوت/۲۴ فبروری، سهشنبه) بیر بیانیه ترقهتیب، متقی اوشبو تلفونی علاقهده سونگی تورت ییل دوامیده پاکستاننینگ افغانستان تورلی حدودلریده کیتمه-کیت هوا هجوملری بارهسیده خواطر بیلدیرگنی قید ایتیلگن.
متقی گه کوره، اوشبو هجوملرده فقط تینچ اهالی نشانگه آلینگن و پاکستاننینگ ادعاسی اساسیده افغانستان توپراغیده هیچ بیر قوراللی کیشی اولدیریلمهگن.
او شوندهی دیگن: «افغانستانده هیچ قوراللی کیشی یوق و برچه تامانلر، جملهدن دیپلماتلر قیله آلهدی سونگی اویوشتیریلگن هوا هجومی جاییگه بارسه و احوالنی یقیندن کوزهتسه.»
بیانیه گه کوره، دیکارلو هم پاکستاننینگ سونگی هجوملریده تینچ اهالی اولدیریلگنیدن افسوسلنیب، بو موضوعنی بیرلشگن ملتلر تشکیلاتیگه اعضا مملکتلر و برچه تامانلر بیلن شریک قیلیشینی بیلدیرگن.
تامانلر، شونینگدیک دوحه ییغیلیشلری، ایش گروهلری و باشقه مسئلهلر حقیده فکر المشتیریشگن.
پاکستان، قویاش ۱۴۰۴ ییل، ۲ حوت، شنبه کیچه، ننگرهار و پکتیکا ولایتلرینینگ ایریم حدودلرینی اوچاق آرقهلی نشانگه آلدی و اونینگ نتیجهسیده عیاللر و بالهلر شامل بیرقطار تینچ اهالی اولیب و یرهلندی.
اسلام امیرلیگی مدافعه وزیرلیگی، اوشبو هجوملرنی قارهلب، «مناسب وقتده» پاکستان گه «ماس و اویلنگن» جواب بیریشی حقیده آگاهلنتیرگن. بو هجوملر، یشاوچیلرنینگ کینگ مناسبت بیلدیریشی یانیده، سیاستچیلر و بیرقطار مملکتلرنینگ قرشیلیگی بیلن دوچ بولگن.
