سمنگان ولایتی خُلم تومنینینگ «ملاسعدی» قیشلاغی یشاوچیلرینینگ ایتیشلریچه، یوز بیرگن سونگی زلزله نتیجهسیده، مذکور قیشلاقدهگی تاغنینگ بیر قسمی بویوک شکلده یاریلگن. اولرنینگ آگاهلنتیریشیچه، مذکور تاغنینگ احتمالی سیلجیشی اویلر، ایکینچیلیک ییرلر، باغلر و اوتیب-قیتیلهدیگن یوللرنینگ خوف بیلن روپهره قیلیشی ممکن.
تاغ یقینیده حیات کیچیرهدیگن عایلهلردن قطاریگه کوره، گرچند حاضرگچه تاغ تنهسیده انیق بیر حرکت کوزهتیلمهگن بولسهده؛ بیراق یاریقلرنینگ کوپهیگنی سبب، اهالیدن قطاری تاغ سیلجیشی و تاشلر توشیشیدن قورقیب، کیچهلرنی آچیق فضا و ساووق هواده اوتکزهدیلر.
مذکور تاغ یقینیده حیات کیچیرهدیگن ملاسعدی قیشلاغی یشاوچیسی نسیمنینگ ایتیشیچه، قار و یامغیر یاغگنی صورتده تاغ سیلجیشی ممکن. «اویلریمیز بولگن اوشبو تاغ، زلزلهده درز قیلدی. قار و یامغیر یاغگنی صورتده، اهالیگه کوپینچه زیان ییتیشیشی ممکن. تاغ چپه بولگنیده اهالی اویلری تاغ آستیده قالهدی. اهالی قورقیب باغلری و موترلری ایچیده اوخلهیدی. دولتدن بو قیینچیلیکنینگ حل قیلیشینی ایستهیمیز.»
شونینگدیک زلزله نتیجهسیده یاریلگن تاغده اویی بولگن محبعلینینگ ایتیشیچه، بو وضعیت اهالینی جدی بیر شکلده خواطرلنتیرگن. «یوقاریدن باریب کورسهیز، جودهیم یامان شکلده یاریلگن. اهالی قورقیب اویلریده حیات کیچیره آلمهیدیلر. کیچه تامان یشاوچیلر باغلر، خیمهلر یا-ده موترلری ایچیگه باریب اوخلهیدیلر. دولتدن بو توغریده توجه قیلیشینی ایستهیمیز.»
ملاسعدی قیشلاغی یشاوچیلریدن باشقه بیری ذکراللهنینگ ایتیشیچه، اوشبو تاغ قویی قسمیده قریب ۵۰ ته یشش اوی بار. او، مسئول نهادلردن وضعیتنی تیکشیریب و ییچیم یول تاپیشلرینی سورهگن. اونینگ کوپهیتیریشیچه: «مذکور تاغنینگ قویی قسمیده قریب ۵۰ یشش اوی بار. زلزله نتیجهسیده تاغ یاریلگن و اهالی حیاتینی تهدید قیلهدی. بیراز ییر قیمیردهشی یا-ده یاغینگرچیلیک بیلن بو یاریقلرنینگ خوفلی و کوپینچه زیانلی بولیشی ممکن. دولتدن اهالی حیاتینی قوتقریش مقصد، انیق شکلده تیکشیریشینی ایستهیمیز.»
شونینگدیک خُلم تومنیده محلی مسئوللر، تاغده یاریقلر تاپیلگنینی تصدیقلب و ایتیشلریچه، احتمالی زیانلر آلدینی آلیش اوچون بیر قطار برنامهلری بار. خُلم تومنی ولسوالی عبدالقادر حامدنینگ ایتیشیچه: «تیکشیریشلر اساسیده، ملاسعدی قیشلاغیده تاغ درز قیلگن و یاغینگرچیلیک بولگنیده تاغنینگ سیلجیشی ممکن و بو یشاوچیلر اوچون جدی بیر تهدید دیر.»
۱۲-عقرب، افغانستان شمالی اینیقسه بلخ و سمنگان ولایتلریده زلزله یوز بیردی. مذکور زلزله نتیجهسیده، ۲۷ کیشی اولیب، بیر مینگدن آرتیق کیشی یرهلنگن و شونینگدیک قریب ایکی مینگ یشش اوی ویران بولگن.
