نسایی-ولادی شفاکارلری، حیض کوریشنی قیزلر طبیعی رشدی جریانینینگ بیر قسمی صفتیده ایکنیگه تاکیدلب و ایتیشلریچه، اولردن کوپ قطاری آگاهیسیزلیک و جمعیتده ناتوغری ایشانچلر بارلیگی سبب، بو باسقیچنی قورقینچ و خواطر بیلن باشلهیدیلر. اولرنینگ کوپهیتیریشلریچه، بلاغت دوریدهگی جسمانی و روحی اوزگریشلر حقیده وقتیده معلومات بیریلیش، قیزلرگه بو باسقیچنی راحتراق اوتکزیشلریگه یاردم بیره آلهدی.
نسایی-ولادی شفاکارلریدن زرغونه محبتنینگ ایتیشیچه، عایلهلر اینیقسه آنهلر قیزلرنینگ بلاغت یاشیگه ییتیشیدن آلدین، اولرنی جسمی اوزگریشلر و شخصی ساغلیقنی رعایه قیلیشلری حقیده خبردار قیلیش همده ضرور رهنمالیکلرنی بیریشلری کیرهک. «حیض کوریش طبیعی بیر نرسه دیر و کسللیک بیلن هیچ قندهی علاقهسی یوق. بیر قیز توقیز یاشیگه کیرگنیده، اونگه حیض کوریش و بلاغت دورهسیدهگی تغییرلر توغریسیده معلومات بیریلیشی کیرهک که بیرینچی مرته حیض کوریشنی تجربه قیلگنی پیت، قورقیب و خواطرلنمهسین.»
روانشناسلردن طوبا محبیگه کوره، قیزنینگ بیرینچی مرته حیض کوریشی قورقیش، اضطراب و شرم کبی تویغولر بیلن بیرگه بولیب و بو توغریده آگاهیلیک بیریلیشی اولرگه اوشبو باسقیچنی آزراق روحی باسیم بیلن تجربه قیله آلیشلریگه یاردم بیرهدی. «قیزلر بیرینچی مرته حیض کوریش پیتده فرقلی تویغولرنی تجربه قیلهدیلر. بیر قطاری رشدنینگ ینگی باسقیچیگه کیریشدن خورسند بولیب، بیراق بیر قطاری ایسه خواطرلهنیب و حتا قورقهدیلر، اینیقسه بو توغریده اولرگه ییترلیچه معلومات بیریلگن بولسمه. عایلهنینگ قندهی یاندهشووی و قیزلرنینگ آگاهیلیک میزانی، بو تویغولر شکللنیشیده مهم رولی بار.»
آنهلردن قطارینینگ ایتیشلریچه، بار رسم-رواجلر سبب قیزلر بیلن حیض کوریش حقیده گپلشگنلری یوق؛ بو مسئله ایسه قیزلرنینگ بیرینچی مرته حیض کورگنلریده قورقیش و خواطرلنیشنینگ تجربه قیلیشلریگه سبب بولگن.
تورت فرزند آنهسی بولمیش ۴۵ یاشر فاطمهنینگ ایتیشیچه، قیزی بیرینچی مرته حیض کورگنیده، جدی شکلده قورقیشنی تجربه قیلگن. «بیر کونی قیزیم ییغلب مکتبدن اویگه کیلدی. جدی بیر قیینچیلیککه چلینگنینی توشینگن ایکن. اونگه بو جریاننینگ طبیعی بولگنینی ایتگنیمده، آرام بولدی؛ بیراق میندن سورهدی که نیگه بوندن آلدین اونگه هیچ نرسه ایتگنیم یوق ایکن. او سوراق مینی اوچون جودهیم قیین ایدی و بو توغریده توجهسیز بولگنیمنی حس قیلدیم.»
اوچ فرزند آنهسی ۴۲ یاشر ناهیدنینگ ایتیشیچه، شرم و عایلهلردهگی بار سنتلر سبب، قیزی بیلن هیچ قچان حیض کوریش حقیده گپلشمهگن. «قیزیم اویگه کیلگنیده، جودهیم قورققن ایدی. مکتبده قان کیتیشینی فرق قیلیبتی، بیراق نیمه قیلهرینی بیلمهبتی. صنفداشلرینینگ بیلمسلیگی اوچون بوتون کوننی خواطر بیلن اوتکزیبتی. اوندن کیین قیزیمگه ایتدیم که بو طبیعی بیر موضوع دیر و بو توغریده رهنمالیک قیلدیک.»
شوندهی بیرحالده، قیزلردن قطارینینگ ایتیشلریچه، بیرینچی مرته حیض کوریش تجربهسی آگاهیسیزلیک، قان کیتیشدن قورقیش و بو وضعیتنی قندهی مدیریت قیلیشنی بیلمسلیک بیلن بیرگه بولیب و نتیجهده اضطراب و تشویشلریگه سبب بولگن.
۱۷ یاشر مریمنینگ ایتیشیچه، بیرینچی مرته حیض کورگنیدن آلدین بو توغریده هیچ نرسهنی بیلمس ایکن. «مکتب گه ایدیم و جودهیم شرم قیلگن ایدی. اویگه کیلگنیمده ییغلهدیم. کیین آنهم گه ایتدیم و مینگه بو وضعیتنینگ طبیعی بیر موضوع بولگنی و برچه قیزنینگ اونی تجربه قیلیشینی ایتدی. لیکن بو توغریده آلدیندن هیچ کیم مینگه هیچ نرسه دیگنی یوق ایدی. باش اولده تجربه قیلگنیمده جودهیم قورققن ایدیم.»
۱۶ یاشر فرشتهنینگ ایتیشیچه، حیض کوریشدن آلدین آگاهیسیزلیک اونینگ قورقیش و خواطرلنیشیگه توغری تاثیری بولگن. «مین حیض کوریشنینگ نیمه بولگنینی بیلمس ایدیم. بیرینچی مرته حیض کورگنیمده قورققن ایدیم و حتا یرهلندیم می دیب توشینگن ایدیم. نیچه ساعت هیچ کیمگه هیچ نرسه دیگنیم یوق ایدی و کیین آپهم گه ایتدیم و او مینگه اونینگ طبیعی بیر باسقیچ بولگنینی ایتدی. اونینگ سوزلری مینی آرام قیلدی و خواطرلنگنیم آز بولدی.»
بو آرهده ۱۵ یاشر سمیهنینگ ایتیشیچه، حیض کوریشنی تجربه قیلمسدن آلدین آنهسی بو توغریده اونگه معلومات بیرگن ایکن. «آنهم حیض کوریش توغریده مینی بیلن گپلشگن ایدی و اونینگ قیزلر کته بولیشی و رشد جریانی طبیعی بیر بولیمی بولگنینی ایتگن ایدی. انه شوو سبب، بیرینچی مرته حیض کورگنیمده، اونچه قورقمهدیم. یالغیز بیراز خواطرلنگن ایدیم، بیراق نیمه موضوع بولگنینی بیلگن ایدیم. ینه هم بیراز تشویشگه ایدیم.»
حیض کوریش قیزلرده بلاغت و طبیعی رشد نشانهلریدن بیری دیر. بو جریاننینگ طبیعی بولگنی بیلن، آگاهیلیک کملیگی، آنهلرنینگ توجهسیزلیگی و اجتماعی بیر قطار ناتوغری ایشانچلر سبب، قیزلردن کوپ قطاری بیرینچی مرته حیض کوریشنی شرم و خواطر بیلن باشلهیدیلر. ساغلیقنی سقلش و روحی ساحهسی متخصصلرینینگ اورغولشیچه، وقتیده بو توغریده معلومات بیریلیش و بو موضوع حقیده گپلشیش اوچون مناسب بیر فضانی یرهتیش، حساس بولگن بو باسقیچده قیزلرنینگ جسمی و روحی سلامتلیگینی سقلشده مهم اورینگه ایگه دیر.
