اسلام امیرلیگی اقتصاد وزیرلیگی، انسانسیورلیک یاردملر کورسهتیلیشی جریانیده اسلام امیرلیگی ارهلشووی کوپهیگنیگه دایر، بیرلشگن ملتلر تشکیلاتینینگ انسانسیورلیک یاردملرنی هماهنگ قیلووچی ادارهسی (اوچا)، ادعاسینی رد قیلدی.
اوشبو وزیرلیک سوزلاوچیسی عبدالرحمان حبیبنینگ ایتیشیچه، بیرلشگن ملتلر تشکیلاتی آرقهلی کورسهتیلهدیگن یاردملر مستقیم شکلده مذکور تشکیلات گه تیگیشلی نهادلر آرقهلی نیازمند یشاوچیلرگه ترقهتیلیب و اسلام امیرلیگی ارهلشمهیدی. «بیرلشگن ملتلر تشکیلاتی نهادلرینینگ بشری یاردملری باشدن حاضرگچه، بو نهادلرنینگ اوزی تامانیدن یشاوچیلرگه ترقهتیلیب، افغانستان ده ایشسیزلیک کمهیشی و اقتصادی رواجلنیشده، اوشبو نهادلرگه کیرهکلی آسایشتهلیکلر یرهتیلیشی اوچون سعیوحرکت بولگن.»
اقتصاد وزیرلیگی سوزلاوچیسینینگ اورغولشیچه، اسلام امیرلیگی یاردملرنینگ عدالتلی شکلده ترقهتیلیشی و امارتی بولمهگن نهادلر آرهسیده همکارلیک کوپهیشی مقصد، تشقی ادارهلرنینگ فعالیتلرینی ترتیبگه سالیش و لایحهلرنی عملگه آشیریش اوچون کینگ قمراولی بیر طرزالعملنی تیارلهگن.
بیرلشگن ملتلر تشکیلاتینینگ انسانسیورلیک یاردملرنی هماهنگ قیلووچی ادارهسی، ینگیلیکده بیر گزارش ترقهتیش بیلن اعلام قیلیشیچه، جاری ییل جولای آییده افغانستان ده انسانسیورلیک یاردملر کورسهتیلیش جریانیده ارهلشوو ۱۴ فایز کوپهیگن. بو نهادنینگ کوپهیتیریشیچه، مذکور آیده انسانسیورلیک یاردملر پروسهسیده ۱۰۴ ارهلشوو موردنی ثبت قیلگن که اونینگ ۹۵ فایزی اسلام امیرلیگی رسمیلری تامانیدن بولگن.
اوچا گزارشینینگ بیر بولیمیده کیلیشیچه: «کوپراق ارهلشوو افغانستان مرکزی بولیملریده ۳۰ مورد بیلن ثبت بولگن و اوندن کیین ۲۱ مورد بیلن شرقی منطقهلر و ۲۰ مورد بیلن جنوبی منطقهلر قرار تاپگن.»
بیزلرنینگ فیسبوک صحیفهمیزگه باش اورینگ!
اوچانینگ گزارشی اساسیده، انسانسیورلیک عملیات ده مستقیم ارهلشوو، برنامهلر عملگه آشیریلیشیده توسیق یرهتیش و خوفلی معلوماتلرنی سورهش، ارهلشوونینگ اینگ مهم شکللریدن بولگن.
شونده بیرحالده، عامه پالیسی بیلرمانلریدن قطارینینگ ایتیشلریچه، بیرلشگن ملتلر تشکیلاتی آرقهلی انسانسیورلیک یاردملر ترقهتیش پروسهسیده اسلام امیرلیگی نظارتی، ارهلشوو بیلن اشتباه آلینمسلیگی کیرهک.
عامه پالیسی بیلرمانی نیازمحمد همدردنینگ ایتیشیچه، بیرلشگن ملتلر تشکیلاتی آرقهلی یاردملر کورسهتیلیشیگه اسلام امیرلیگی نظارتی، بو یاردملرگه کوپراق فایدهلی بوله آلهدی. «اسلام امیرلیگی اوز رسمیلری قراری اساسیده، بشری یاردملر بولیمیده اوز نظارتینی قیلهدی. نیازمندلرگه یاردم ترقهتیلیشیده انیقلیک تامینلنسه، ایش درست دیر و انیقلیک تامینلنیشی نظارت یا-ده هماهنگلیک آرقهلی اورته گه کیلسه، درست بولیب و بو عادی و درست بیر ایش دیر.»
اسلام امیرلیگینینگ قیته قدرت گه ایریشگنیدن کیین، اوچا نیچه مرته افغانستان یشاوچیلریگه انسانسیورلیک یاردملر کورسهتیلیشی جریانیده اسلام امیرلیگی ارهلشوویدن خواطر بیلدیرگن که اسلام امیرلیگی اونی قبول قیلینهدیگن بیر نرسه حسابلمهیدی.
