اسلام امیرلیگی اقتصاد وزیرلیگینینگ ایتیشیچه، افغانستان و پاکستان سودا و ترانزیتی علاقهلری توختهگنی ایکی مملکتنینگ هیچ بیری فایدهسیگه ایمس؛ بیراق کابل بدیل یوللرنی رواجلنتیریش و منطقه مملکتلر بیلن اقتصادی همکارلیکلرنی کوچهیتیریب، بیللی بیر یولگه افغانستاننینگ قرهملیگینی کمهیتیرگن.
اقتصاد وزیرلیگی سوزلاوچیسی عبدالرحمان حبیبنینگ ایتیشیچه، بدیل یوللر تامینلنیشی و افغانستاننینگ سودا شریکلرینی خیلمه-خیللشتیریش اوچون سعیوحرکتلر دوام قیلماقده. اونگه کوره، پاکستان بیلن سودا و ترانزیتی یوللر یاپیق بولگنیده، اوتگن ییللرگه قرهگنده افغانستاننینگ صادراتی میزانی و تجارت حجمی کوپهیگن.
او بدیل یوللر رواجلنیشی و ینگی شریکلر بیلن همکارلیک یرهتیلیشینی اقتصاد وزیرلیگی اولویتلریدن عنوان قیلگن. «افغانستان و پاکستاننینگ سودا و ترانزیتی علاقهلری توختهتیلگنی هیچ بیر مملکتنینگ فایدهسیگه ایمس؛ بیراق ضرر کوریش توری فرقلی دیر. بدیل یوللرنی یرهتیش و منطقهای مملکتلر بیلن اقتصادی همکارلیکلر کوچهیشی اوچون سعیوحرکنلر عملگه آشیریلگن.»
شوندهی بیرحالده، سودا و صناعت وزیرلیگینینگ ایتیشیچه، پاکستان بیلن سودا یوللریدهگی قیینچیلیکلر حاضرگچه حل بولمهی و وضعیتده اساسی تغییر اورته گه کیلمهگن.
سودا و صناعت وزیرلیگی سوزلاوچیسی محمدآصف الیاسنینگ ایتیشیچه، اسلام امیرلیگی سوداگرلرنینگ حاضرگی قیینچیلیکلرینی حل قیلیش اوچون سعیوحرکت قیلماقده؛ لیکن پاکستان تامانیدن بو قیینچیلیکنینگ حل بولیشی اوچون جدی بیر اراده کوزگه کوریلمهیدی. اونینگ کوپهیتیریشیچه، پاکستان یولیده قیینچیلیک، توارلر قیمتیگه تاثیر قویگن. «حاضرگچه بو توغریده تغییر کیلمهگن و قیینچیلیکلر بار. اسلام امیرلیگی سوداگرلرنینگ حاضرگی قیینچیلیکلرینی حل قیلیش اوچون سعیوحرکت قیلماقده؛ بیراق قرشی تاماندن هیچ بیر جدی اراده کوریلمهیدی. توارلر قیمتیده فرق کیلگن، چونکه اوتگن ییللرده تجارتنینگ ۶۵ فایزی پاکستان بیلن ایدی؛ لیکن حاضر ایران و اوزبیکستان کبی بدیل یوللر هم اختریلگن.»
شونینگدیک افغانستان سودا و سرمایه یاتقیزیش اتاقینینگ ایتیشیچه، افغانستانلیک سوداگرلر پاکستان بیلن ترانزیتی یوللر یاپیلگنیدن سونگ، جنوبی و اورته آسیا ده بدیل یوللردن فایدهلنیشگه یوز کیلتیرگنلر.
اوشبو اتاق عامه علاقهلر آمری احسانالله احساننینگ ایتیشیچه، افغانستان تجارتی پاکستان یوللری یاپیلگنیدن کیین، کمهیش اورنیده برقرار بیر وضعیتگه قرار تاپگن. «افغانستان و پاکستان آرهسیده ترانزیتی یوللر یاپیلگنیدن کیین، افغانستانلیک سوداگرلر و سرمایه یاتقیزووچیلر سودا و ترانزیتی بدیل یوللردن فایدهلنهدیلر. بو یوللر جنوبی و اورته آسیا بوییچه تورلی مملکتلردن عبارت دیر.»
شوندهی بیرحالده، اقتصاد بوییچه ایش بیلرمان عبدالظهور مدبرنینگ ایتیشیچه، وارداتی توارلرگه افغانستان بازارینینگ قرهملیگی سبب، تجاری یوللر یاپیق قالیشی برابریده بو مملکتنینگ جبرلنیشی کوپراق دیر. «ترقهتیلگن سونگی گزارشلر اساسیده، قتناو یوللر یاپیق قالیشی و افغانستان بیلن پاکستان آرهسیده تجاری آلیش-بیریش توختهتیلگنی، ایکی مملکتگه ضرر ییتکزگن.»
پاکستان، ییللر افغانستاننینگ تجاری اینک ییریک شریکلریدن بیری همده آزاد سوولرگه بو مملکتنینگ اینگ مهم ترانزیتی یوللریدن بولگن؛ لیکن سونگی آیلرده ایکی مملکت آرهسیدهگی سودا و اقتصادی علاقهلر سیاسی کیسکینلیکلر تاثیری آستیده قیینچیلیک بیلن روپهره بولگن.
