راضیه، بلخ ولایتی شولگره تومنی «گذر تراب» حدودی یشاوچیسی، زلزله یوز بیرگچ، قورقدی و اوشه وقتدن بیری ایکیله بویرهگی آغریشینی بیلدیرهدی. او دوالنیش اوچون ایکی مرته کسلخانه گه مراجعت قیلدی؛ بیراق شفاکارلر تامانیدن بیریلگن دارولر فایده قیلمهگن. راضیهنینگ ایتیشیچه، اقتصادی احوالی یخشی اېمس و دوالنیش اوچون بیر کسلخانه یا کی یخشی شفاکار گه مراجعت قیله آلمهیدی.
او، سلاموطندار بیلن صحبتده شوندهی دیېدی: «توستدن زلزله بولدی، جوده هم قورقدیم و بویرهکلریم آغریدی. حاضرگچه ایکی نسخه دارو آلدیم؛ بیراق اساسی دوالنیش اوچون مراجعت قیله آلمهی من. یول یورگن پیتده بویرهکلریم آغریدی. زلزله بولگن پیتده قاچیب اتاقدن چیقدیم اوشه وقتدن بیری ایکیله بویرهگیم آغریدی.»
شولگره تومنی «جلوزو» حدودی یشاوچیسی ماهگل، آلتی باله آنهسی ایتیشیچه، ایکی اوغلی تورموش قورگچ اوندن اجرهلگن و اېندی تورت قیزی بیلن بیرگه ایناغهسینینگ اوییده یشهماقده. ماهگلنینگ کوپهیتیریشیچه، یشهیدیگن اویی زلزلهده ضرر کورگن و زلزلهدن سۉنگ یورهک خستهلیگی کسلیگه چلینگن.
اونگه کوره، زلزلهدن قریب ایکی آی اوتماقده اېکن، بیراق هنوزگچه قورقهدی؛ بلند آوازنی ایشیتگچ تشویشلنیب و یورهگی تیز-تیز اوروش گه توشهدی. او شوندهی دیېدی: «یورهگیم تیز-تیز اورهدی، اېنگ آز آوازنی ایشیتسم یورهگیم اوروشی کوپ بولهدی و قورقو بیلن اویدن چیقهمن، کوچه آخریده توختهی من. قورقوده من، ایاقلریم تیترهیدی.»
ماهگل، مسئوللر و خیریه نهادلردن، او اوچون باشپنه قوریب و دوالنیش امکانیتینی یرهتیش اوچون همکارلیک قیلیشلرینی سورهیدی. شو بیلن بیرگه، شولگره تومنی «گذر تراب» حدودی یشاوچیسی شازیه، زلزلهدن سۉنگ یورهک اوروشی کوپهیگنینی بیلدیرهدی. او دوالنیش اوچون کسلخانه گه بارگن بولسهده؛ بیراق شفاکارلر تامانیدن بیریلگن دارولر سلامتلیگیگه تأثیر قویمهگن.
او، سلاموطندار بیلن صحبتده ساغلیق قیینچیلیگی حقیده شوندهی دیېدی: «زلزله یورهک اوروشیم کوپهیشیگه سبب بولدی. کسلخانه گه بارهمن، دارو بیریشهدی، آمپول بیریشهدی، سیروم هم بیرگنلر؛ بیراق هېچ بیری فایده قیلمهدی.»
شو بیلن بیرگه، بلخ مارمل تومنی یشاوچیلرینینگ ایتیشیچه، سۉنگی زلزلهلر عایلهلرنینگ روحی گه سلبی تأثیر قویگن.
مارمل تومنی «خراسان» قیشلاغی یشاوچیسی محمدصدیق حنیف بوتوغریده شوندهی دیېدی: «بیز حقیقتن هم تشویشده میز. زلزله یوز بیرگنیدن بویان بالهلریمیز، خاتینلریمیز قورققن و روحی نقطه نظریدن باسیم آستیدهلر؛ یعنی سلامتلیگیمیز جدی ضرر کورگن.»
بلخ ساغلیقنی سقلش ریاستی سۉزلاوچیسی کمالخان زدران گه کوره، زلزلهده روحی قیینچیلیک تاپگن کیشیلر گه محل کلینیکلری و ساغلیق تیملری تامانیدن خذمت کورسهتیلهدی. او شوندهی دیېدی: «زلزله یوز بیرگن حدودلرده کلینیک بار و او ییرده شفاکارلر هم بار روحی بولیمده خذمت کورسهتیشهدی. شونینگدیک، سیار تیملر هم بار و کسللیکنی کوزهتگن پیتده اولر گه مصلحت بیریشهدی و زلزلهدن جبرلنگنلر ساغهلیشی اوچون و عادی حیاتلری گه قیتیش اوچون خذمت کورسهتیشهدی.»
بلخ ساغلیقنی سقلش ریاستی سۉزلاوچیسی گه کوره، اوشبو ییلده مذکور ولایتده قریب ۱۷ مینگ روحی کسل گه خذمت کورسهتیلگن. شونینگدیک، بعضی فعاللر، ییر قیمیرلش اهالینینگ حیاتی و اقتصادی گه تأثیر قویگن؛ شونینگ اوچون یاردملر یانیده اولرنینگ ساغلیغی حقیده دقت قیلینیشی کېرهک دیېدیلر.
زلزلهدن جبرلنگنلر اوچون دولت و ایچکی همده خلقارا نهادلر تامانیدن خیمه و آزیق-آوقت امکانیتی یرهتیلگن بولسهده؛ بیراق احوال یخشیلنیشی اوچون دولت، بیرلشگن ملتلر تشکیلاتی و باشقه یاردم بیروچی نهادلر کوپراق یاردم کورسهتیش اوچون سعی-حرکت قیلیشلری کېرهک.
