مملکت‌ده ایسیق‌لیک درجه‌سی آشیشی بیلن، کابل، هرات، بلخ و جوزجان ولایت‌لریده باشلنغیچ و اورته دوره اوقووچیلری مکتب‌لر نینگ تعطیل بولیشی‌نی ایسته‌گنلر.
کابل ده «زرغون‌شهر» لیسه‌سیده سکیزینچی صنف اوقووچیسی نورالله نینگ ایتیشیچه، سونگی ایکی هفته‌ده ایسیق‌لیک درجه‌سی آشیشی اوچون، نیچه مرته صنف‌ده بورونی قانه‌گن و انه شوو سبب، درس‌لرینی یخشی شکلده اوقیه آلمه‌گن.
مذکور اوقووچی نینگ کوپه‌یتیریشیچه: «دولت‌دن ایسیق نینگ کمه‌یشی گه قدر مکتب‌لر نینگ تعطیل بولیشی نی ایسته‌یمیز. بو آی جوده‌یم ایسیق دیر، بو ایسیق هوا‌ده درس اوقیش قیین دیر. هوا نینگ ایسیق بولگنی سبب، بورونیم قانه‌یدی، بعضا ایسه باشیم آغریدی و درس‌لریم نی یخشی شکلده اوقیه آلمه‌یمن.»
بیزلرنینگ توییترده هم تعقیب قیلینگ!
سونگی کون‌لر مملکت‌ده نظیری کوریلمه‌گن درجه‌ده، ایسیق‌لیک درجه‌سی آشیب و ولایت‌لردن قطاری‌ده ایسه، ایسیق‌لیک درجه‌سی ۴۵ سانتی‌گراد‌دن هم آشگن دیر.
کون اوتیشی بیلن ایسیق‌لیک درجه‌سی آشیشی و مکتب‌لرده هوا نینگ ساووتیش جهازلری یوق‌لیگی سبب، اوقووچیلردن قطاری کوپینچه ساغلیق قیین‌چیلیک بیلن روپه‌ره‌لر.
جوزجان ده اوچینچی صنف اوقووچیسی مصطفا نینگ ایتیشیچه، ایسیق‌لیک درجه‌سی نینگ آشیشی سبب، صنف‌ده دوست‌لریدن بیر قطاری هوش‌دن کیته‌دی. اونینگ کوپه‌یتیریشیچه: «صنفی‌میزده یا صنف‌داشلریمی نینگ بورونی قانه‌یدی یا-ده هوش‌دن کیته‌دیلر. ساووق سوو هم یوق که قوللنسه‌ک. بو وضعیت اوچون بعضا غیرحاضرلیک قیله‌میز. بو وضعیت‌ده مکتب‌لر نینگ رخصت بولیشی کیره‌ک.»
شونینگدیک بلخ ده ایکینچی صنف اوقووچیسی ارسلان نینگ ایتیشیچه، اولر ایرتنگ ساعتپ ۰۸:۰۰ دن توش ساعت ۱۲:۰۰ گه قدر مکتب‌ده بوله‌دیلر و پاک ایچیملیک سوو گه هم قول تاپه آلمه‌یدیلر. اونگه کوره، ایسیق‌لیک درجه‌سی نینگ آشیشی، اوقووچیلر نینگ کوپینچه قیین‌چیلیک بیلن روپه‌ره بولیشی و درس نینگ یخشی اورگنه آلمه‌یشی گه سبب بولگن.
اوقووچیلر یالغیز کابل، جوزجان و بلخ ده مکتب‌لرده هوا نینگ ساووتیش جهازلری یوق‌لیگی و مکتب‌لر نینگ تعطیل بولیشی نی ایسته‌گن‌لری یوق، بلکیم؛ هرات ده هم اوقووچیلر شونگه اوخشه‌گن ایسته‌کلر نی سوره‌گنلر.
هرات ده تورتینچی صنف اوقووچیسی محمد‌عرفان، اوشبو ولایت معارف ریاستی‌دن، ایسیق درجه‌سی نینگ کمه‌یشی گه قدر مکتب‌لر نینگ تعطیل بولیشی نی ایسته‌گنلر.
شونده بیرحالده، هرات معارف ریاستی مسئوللری، مذکور ولایت‌ده مکتب‌لر تعطیلی حقیده ایتیشلریچه، تعلیمی نصاب تکمیل بولیشی سبب، اوقووچیلر درس‌لری نینگ عادی شکلده دوام قیلیشی ممکن.
هرات معارف رئیسی عبدالله امینی نینگ سلام‌وطندار گه ایتیشیچه: «بو توغریده صحبت قیلدیک؛ بیراق تعلیمی نصاب نینگ تکمیل بولیشی اوچون، درس‌لر نینگ دوام تاپیشی کیره‌ک. نظارت تیمی‌میز تیکشیرماقده. بیران مکتب تخطی قیلگنی صورت‌ده، مسئولیت اوز بویین‌لریده دیر.»
بیزلرنینگ فیسبوک صحیفه‌میزگه باش اورینگ!
شونینگدیک بلخ معارف ریاستی مسئوللری، کیله‌سی کون‌لر اوشبو ولایت‌ده مکتب‌لر تعطیلی نی، ممکن ایمس دیگنلر.
بلخ معارف رئیسی عبدالجلیل شهید‌خیل نینگ ایتیشیچه: «بو توغریده معارف وزیرلیگی بیلن صحبت قیلدیک. حاضر ایسه مکتب‌لر نی تعطیل قیلگنی‌میز صورت‌ده، قیش‌ده قیین‌چیلیک بیلن روپه‌ره بوله‌میز. اوقووچیلر قیش‌ده قار آره‌سیده درس اوقیه آلمه‌یدیلر، انه شوو سبب، درس‌لر نینگ دوام تاپیشی ضرور دیر.»
اوتگن ییل‌لر مکتب‌لرده ییل نینگ یریمی‌ده آلینه‌دیگن سیناو‌لر نینگ یکونلنیشی بیلن اسد آیی‌ده مکتب‌لر نینگ رخصت بولیشی بیرحالده؛ اوقووچیلر مکتب‌لر نینگ رخصت بولیشی نی ایسته‌گنلر.
