لوگر یشاوچیلری، اوشبو ولایت‌ده ترافیکی حادثه‌لر کوپه‌یگنی‌دن خواطر بیلدیرگنلر. لوگر مرکزی پل‌علم شهری یشاوچیسی احمد‌شاه‌نینگ ایتیشیچه، کابل-لوگر قتناو یولیده یوز بیره‌دیگن ترافیکی حادثه‌لر نتیجه‌سیده، اونلب کیشی اولیب و یره‌لنگن.
مذکور یشاوچی، لوگر ولایتی ترافیک آمریتی‌دن ترافیکی حادثه‌لر یوز بیریشی کمه‌یشی اوچون ییترلی چاره-تدبیر کوریلیشینی ایسته‌گن. «سونگی کونلر هر کونی کابل-لوگر قتناو یولیده بیر-ایکی حادثه یوز بیره‌دی؛ موترلر سرعتی‌نینگ کنترول بولینیشی و هیداوچیلر‌نینگ حجت‌لری تیکشیریلشی کیره‌ک که ترافیکی حادثه‌لر کوپه‌یشی آلدی آلینسین.»
بیزلرنینگ «ایکس» ترماغی ده هم تعقیب قیلینگ!
لوگر ولایتی محمد‌آغه تومنی یشاوچیسی وحید‌الله، اوشبو ولایت‌ده یوز بیره‌دیگن ترافیکی حادثه‌لردن کوپینچه‌سی‌‌نینگ سببی‌نی، هیداوچیلر تیز هیده‌شی و احتیاط‌سیزلیگی دیگن. اونینگ ایتیشیچه: «یاشی کوپ کیچیک بولگن کیشی‌لر هیداوچیلیک قیله‌دی؛ هیداوچیلیک‌نینگ قانونی حجتی‌گه ایگه ایمسلر، انه شوو سبب حادثه یوز بیره‌دی؛ ترافیکی حادثه‌لر کوپه‌یشی آلدی آلینیشینی ایسته‌یمیز.»
شونده‌ی بیرحالده، لوگر امنیه قوماندانلیگی‌نینگ ترافیک مدیری محمدنعیم زبیر‌گه کوره، اوتگن بیر ییل‌ده اوشبو ولایت‌ده ۱۲۹ ترافیکی حادثه یوز بیریب و نتیجه‌ده، ۳۰۰ کیشی اولیب و یره‌لنگن.
بیزلرنینگ فیسبوک صحیفه‌میزگه باش اورینگ!
زبیر‌نینگ ایتیشیچه، اوتگن ییل‌لر گه قره‌گنده مذکور ولایت‌ده ترافیکی حادثه‌لر یوز بیریشی ایکی برابر بولگن. او، راست‌فرمان موترلر فعالیتی، سرک‌لر بوزوق‌لیگی و هیداوچیلر‌نینگ احتیاط‌سیزلیگی‌نی بو ولایت‌ده ترافیکی حادثه‌لر کوپه‌یگنی اونملی سببلریدن دیگن. «بیر ییل ایچیده بو ولایت‌ده یوز بیرگن ترافیکی حادثه‌لر نتیجه‌سیده ۴۱ کیشی اولیب و ۲۵۹ کیشی ایسه یره‌لنگن. دست پاکستان موترلریدن فایده‌لنیش، سرک‌لر بوزوق‌لیگی و ترافیکی قاعده-قانونی‌گه هیداوچیلر‌نینگ توجه‌سیزلیگی، ترافیکی حادثه‌لر یوز بیریشی اصلی سببلریدن دیر.»
افغانستان قتناو یوللریدن کوپینچه‌سیده یوز بیره‌دیگن ترافیکی حادثه‌لر، یشاوچیلر‌نینگ خواطرلریدن بیری بولیب و ییل‌ده مینگ‌لرچه کیشی‌نینگ اولیب و یره‌لنگنی‌گه سبب بوله‌دی.
