افغانستان شرقی‌ده جایلشگن لغمان، ثمرلی ولایت‌لردن بیری بولیب و اوشبو ولایت یشاوچیلریدن ۸۰ فایزی ایکینچیلیک و چاروه‌چیلیک بیلن شغللنگن دیر. لغمان ولایتی‌ده‌گی ایکینچیلر نینگ ایتیشلریچه، اوتگن ییل‌لرده ییرلریگه موسومی شکلده نرسه ایکه‌ر ایکن‌لر؛ بیراق حاضر ایسه گل‌خانه قوریلیشی بیلن، قدیمی ایکیلیش اصولی اوزگریب و اولر ییرلریده موسومی بولمه‌گن ایکینلر نی هم ییتیشتیره‌دیلر.
لغمان مرکزی مهترلام شهری یشاوچیسی نورعالم نینگ ایتیشیچه: «اوچ جریب ییر گه گل‌خانه قورگن‌مین و سکیز کیشی او ییرده ایشله‌یمیز. کوپینچه پیت، او ییرگه بادرنگ ایکه‌میز و یخشی حاصل هم آله‌میز. یخشی فایده‌سی بار و بیر جریب ییردن ییل‌ده ۲یریم لک افغانی درآمد قولگه کیلتیره‌میز. حیات خره‌جتی نی چیقره‌دی.»
بیزلرنینگ فیسبوک صحیفه‌میزگه باش اورینگ!
شونده‌ی بیرحالده، سوداگرلردن قطاری نینگ ایتیشلریچه، گل‌خانه‌یی محصوللر نینگ ساتیش بیلن، یخشی فایده قولگه کیلتیره‌دیلر. گل‌خانه‌یی محصوللردن ساتیب آله‌دیگنلردن بیر روحید نینگ ایتیشیچه، بو یول آرقه‌لی یخشی درآمد قولگه کیلتیره‌من. اونینگ کوپه‌یتیریشیچه: «هر مرته ۸۰۰ پاکت بادرنگ نی کابل گه آلیب باره‌من و هر پاکت‌دن قریب ۱۰ افغانی فایده قیله‌من. انه شوو سبب، بو یول آرقه‌لی یخشی درآمد قولگه کیلتیره‌من.»
باشقه بیر تامان‌دن، ایکینچیلیک ایش بیلرمان‌لر نینگ ایشانچی گه کوره، گل‌خانه‌لر قوریلیشی و اولر نینگ محصول‌لری کوپه‌یشی خصوصیده درست شکلده توجه صورت تاپگنی‌ده، باشقه مملکت‌لردن یوقاری قیمت بیلن تازه سبزه‌وات نینگ وارد بولینیشی آلدی آلینه‌دی. ایکینچیلیک ایش بیلرمانی کرامت‌الله شفیقی نینگ سلام‌وطندار گه ایتیشیچه: «گل‌خانه‌لرده قلمپیر، قاره بادنجان، تربوز و باشقه سبزه‌وات و میوه‌لر، موسوم‌دن تشقری هم ایکیلیشی ممکن. گل‌خانه‌لر، آچیق ایکین‌زارلر گه نسبت، کوپراق حاصل بیره‌دی و شونینگدیک آزراق سوو گه نیازی بار. بو توغریده خاص توجه گه نیاز بار.»
شونده‌ی بیرحالده، لغمان ایکینچیلیک ریاستی مسئوللری نینگ ایتیشلریچه، اوشبو ولایت ایکینچیلیک ییرلریدن ۳۰۰ جریبی، گل‌خانه قوریلیشی گه اختصاص بیریلگن و محصوللر کوپه‌یشی گه علاوه، یوزلب کیشی گه ایش زمینه‌سی یره‌تیلگن.
بیزلرنینگ «ایکس» ترماغی ده هم تعقیب قیلینگ!
لغمان ایکینچیلیک، سووغاریش و چاروه‌چیلیک ریاستی نینگ خذمتلر آمری بریالی همدرد نینگ سلام‌وطندار گه ایتیشیچه: «اورته شکلده هر جریب گل‌خانه‌ده، اوچ کیشی اوچون ایش زمینه‌سی یره‌تیلگن و بو رقم بو بولیم‌ده قریب ۱۵۰۰ کیشی ایشله‌یدی. مذکور گل‌خانه‌لرده کوپراق بادرنگ و پمیدار ایکیله‌دی. لغمان ولایتی بادرنگی نینگ یخشی بازاری بار و باشقه ولایت‌لر گه علاوه، کابل و شونینگدیک پاکستان گه هم یوباریله‌دی.»
ایتیش کیره‌ک که، حاضر ایسه، لغمان ده ایکینچیلردن کوپینچه‌سی ایکینچیلیک محصوللر کوپه‌یشی و کوپراق فایده قولگه کیلتیریش اوچون گل‌خانه‌لر قوریش گه اقدام قیلگنلر.
