آگاهیسیزلیک، دوالنیش خذمتلری آزلیگی و درست قرهلمسلیک، تخار ولایتیده حاملهدار عیاللردن قطارینینگ خواطرلنتیرووچی «هیدروسفالی» کسللیگی بیلن روپهره بولیشیگه سبب بولهدی. جنیننینگ باش قسمیده میه بوشلیقلریده سویوقلیکنینگ آرتیقچه ییغیلیشی نتیجهسیده یوزگه کیلهدیگن بو کسللیک، ینگی توغیلگن چقهلاق سلامتلیگینی جدی شکلده خوف آستیگه قویهدی.
تخار دهگی شفاکارلرگه کوره، آنهلرنینگ ییترلی بیلگیگه ایگه ایمسلیگی و حاملهدارلیک دورهسیده ضرور مراقبتلر یوقلیگی، بو کسللیککه چلینیش بیلن توغیلهیاتگن چقهلاقلر سانی کوپهیشی عامللریدن دیر. مذکور شفاکارلرنینگ ایتیشلریچه، اوشبو ولایتده هیدروسفالی کسللیگی دوالنیشی اوچون امکانیتلر بولمهی و کسللردن قطاری جراحی و دوالنیش مقصد مملکت پایتختی کابل باریشگه مجبور قالهدی.
اولر، عمومی آگاهیلیک سطحی قوییلیگی و ساغلیقنی سقلش جهازلر یوقلیگیدن خواطر بیلدیریب و مسئوللردن، ساغلیقنی سقلش خذمتلری کوچهیشی و آنه لر آگاهیلیگی آشیشی اوچون بیللی برنامهلر قولگه آلینیشینی سورهگنلر.
تخار ده بالهلر بولیمی متخصص شفاکار فضلکریم صاحبزادهنینگ ایتیشیچه: ««هیدروسفالی توغمه بیر کسللیک بولیب و اونده CSF سویوقلیکلری میه بوشلیقلریده حددن تشقری ییغیلیب و چقهلاق باشینینگ کته بولیشیگه سبب بولهدی. قیغو بیلن عایلهلرنینگ بو توغریده آگاهیلیگی جوده آز دیر.»
شونینگدیک بالهلر بولیمی متخصص شفاکارلردن باشقه بیری محفوظ نورینینگ ایتیشیچه، بو کسللیکنینگ وقتیده انیقلنیشی و آنهلرنینگ معلوماتگه ایگه بولیشی، درست قرار آلیش و اونینگ کیینگی عاقبتلری برابریده مهم اورینگه ایگه دیر. «میه سویوقلیگی آز بولگنیده استازولوماید تابلیتلری بیریلهدی. بولمسه، عملیات بولهدی و چقهلاقلردن قطاری باشی کته بولگنی اوچون سیزارین بولهدی که اولردن آزراغی اولهدی. قیشلاق و تومنلرده تلویزیونی معاینه یوق و چقهلاق توغیلگنی پیتده اولسه، تنهسیگه قرهگنده اونینگ باشی کتهراق بولگنینی بیلهدیلر. التراسوند قیلهدیگن شفاکارلرنینگ آنهلرگه معلومات بیریشی کیرهک.»
شوندهی بیرحالده، تخار ده آنهلردن قطارینینگ ایتیشیچه، جنینلریده هیدروسفالی کسللیگی انیقلنیشی، اولرنینگ قورقیش و خواطریگه سبب بولیب، امکانیتسیزلیک و ییترلی آگاهیلیککه ایگه بولمسلیک، اولرگه قرار آلیشنی قیینلشتیرگن.
تخار ولایتی قلبرس قیشلاغی یشاوچیسی زرمینهنینگ ایتیشیچه: «حاملهدارلیگیمنینگ ۲۰-هفتهسیده، شفاکارلر چقهلاغیم باشیده سوو ییغلیگنی و هیدروسفالی بولگنی ممکن دیدیلر. کوپ معاینهلر قیلدیردم، بیراق تخار ده اونچهلیک امکانیت یوقلیگی سبب، باشقه ولایتگه باریشگه مجبور بولدم. شفاکارلر مراقبت آستیده بولیشیمنی ایتدیلر.»
تخار ولایتی صوفیایی قیشلاغی یشاوچیسی بولمیش منیژه حمیدی، چقهلاغینینگ آلتی آیلیگیده هیدروسفالیگه چلینگنیدن خبر بولگنینی بیان قیلیب و ایتیشیچه، خواطر و قورقووی بولگنی بیلن ینه حاملهدارلیگیگه دوام بیریب و حاضر چقهلاغی جراحی عملیاتدن کیین شفاکارلر آرقهلی مراقبت آستیده قرار تاپگن. «شفاکارلر عملیات بولیشیمنی ایتدیلر. توغیش و عملیات بولیشدن جوده قورقهر ایدیم. عملیات بولدم و چقهلاغیمنی ماشین گه قویدلر و باشی کوپ سوو آلگن دیدیلر. حاضر شفاکار مراقبتی آستیده، لیکن اونینگ تیریک قالیب و قالمسلیگینی بیلمهیمن. مذکور کسللیک حقیده هیچ نرسه بیلمهیمن و عایلهمیزده هم هیچ کیم بو رقم بولگن ایمس ایدی. بیرینچی مرته دیر که بو رقم بیر وضعیت بیلن روپهره بولدم.»
شونینگدیک بو ولایت خسکیپه قیشلاغی یشاوچیسی بیبیگل گه کوره: «چقهلاغیم توغیلدی و کسلخانه گه آلیب باردیک، ماشین گه قویدیلر و اونینگ وضعیتی یخشی همده عملیات بولیشی جریانیده تیریک قالیب و قالمسلیگی بیللی ایمس دیدیلر، بیراق عملیات چاغیده چقهلاغیم اولدی. بو کسللیکنی بیلمس ایدیم و شفاکارلر هم اونچهلیک مسلکی ایمس. بو توغریده معلوماتیم بولسه ایدی، چقهلاغیمنی قوتقره آلهر ایدیم.»
بو بیلن بیرگه، دوالنیش امکانیتلر جملهدن امآرآی و سیتیاسکن ماشینلر یوقلیگی سبب، اوشبو ولایتدهگی شفاکارلر هیدروسفالیگه چلینگن بالهلرنینگ دوالنیش مقصد کابل گه یوبارهدیلر.
بالهلر بولیمی متخصص شفاکارلردن محفوظ نوری، تخار ولایتیده امکانیت کملیگینی بیان قیلیب و ایتیشیچه: «یانیمیزگه کیلهدیگن کسللرنینگ باشی کتهراق دیر و دوالنیش امکانیتی بو ییرده یوق. اولرنی دوالنیش اوچون کابل گه یوبارهمیز.»
ساغلیقنی سقلش نهادلرینینگ گزارشی اساسیده، افغانستان اینیقسه اوزاق حدودلرده عیاللر ساغلیقنی سقلش خذمتلریدن فایدهلنه آلمهیدی. انیقلش جهازلری یوقلیگی، عیال متخصصلر کملیگی و تعلیمی برنامهلر یوقلیگی، هیدروسفالی کبی جدی کسللیکلرنینگ کیچیکتیریلیش بیلن انیقلهنیب و دوالنیشیگه سبب بولهدی.
