کابل شهریده «نور» ملی و تخصصی کسل‌خانه‌سیده‌گی شفاکارلر نینگ ایتیشلریچه، کوریش قیینچیلیکلری و کوز نینگ آلرژیکی کسللیکلریگه چلینگن کسللر نینگ مراجعت سانی ایکی برابر کوپه‌یگن و آی‌ده ۱۶ مینگ‌دن آرتیق کیشی اوشبو کسل‌خانه نینگ تورلی بولیم‌لری گه مراجعت قیله‌دی.
مذکور کسل‌خانه‌ده کوز کسللیکلری متخصصی ضیاالدین حامد نینگ ایتیشیچه، کونده جدی شکلده کوریش قیینچیلیکلری گه چلینگن قریب ۴۰ کسل، عملیات بوله‌دی. اونینگ کوپه‌یتیریشیچه: «بستر قیلگنی‌میز ۴۰ کسل‌دن ۳۵ ته‌سی کوز پرده‌سی کسللری دیر. ۵ فایزی ضربه یا-ده قاره سوو دیر. مراجعت قیله‌دیگنلر سانی کوپه‌یگن؛ آلرژیک بولیم‌لری و کوز پرده‌سی عملیاتی‌ده کسللر کوپراق دیر.»
بیزلرنینگ فیسبوک صحیفه‌میزگه باش اورینگ!
شونینگدیک ضیاالدین حامد گه کوره، کونده کوز قیینچیلیکلری اوچون بو کسل‌خانه گه مراجعت قیله‌دیگن ۸۰۰ کسل‌دن، ۱۵ فایزی کوزی گه پرده توشیش، ۱۵ فایزی کوز ضعیف‌لیگی و ۶۰ فایزی ایسه کوز آلرژیکی کسللیکلری دیر.
شونده‌ی بیرحالده، نور کسل‌خانه‌سیده کارت ترقته‌دیگن بولیمی مسئولی محمدظریف نینگ ایتیشیچه، مذکور کسل‌خانه‌ده کوز آلرژیکی و کوز کسللیکلریگه چلینگن مراجعت قیلووچیلر سانی، اوتگن ییللرگه قره‌گنده ۵۰ فایز کوپه‌یگن. اونینگ ایتیشیچه: «یالغیز اوپیدی بولیمی‌گه قریب ۵۵۰ کیشی و باشقه کیشی‌لر تورلی بولیم‌لر گه مراجعت قیله‌دیلر؛ مراجعت قیله‌دیگن ۵۰ فایزگچه کوپه‌یگن؛ اوتگن ییل‌لرده کونده ۴۰۰ کیشی مراجعت قیله‌‌ر ایدی؛ لیکن حاضر ایسه ۷۰۰ کسل دیر که آی‌ده ۱۶ مینگ مراجعت قیله‌دیگن بار.»
اوزاق نی کوره آلمسلیک، یقین نی کوره آلمسلیک، کوز نینگ ضعیف بولیشی، آب‌مروارید، رنگ نی تانیمسلیک و کوزدن یاش آقیش کوز قیین‌چیلیکلریدن دیر.
اوشبو کسل‌خانه گه کوز قیینچیلیکلری نینگ دوالنیشی اوچون بارگن کسل‌لردن قطاری نینگ ایتیشلریچه، تورلی سببلر اوچون کوزلری کوریش قیین‌چیلیگی گه چلینگن.
خوست ولایتی‌دن کابل گه دوالنیش اوچون بارگن صندگل نینگ ایتیشیچه، نیچه مدت‌دن بویان کوزی قیین‌چیلیک بیلن روپه‌ره بولگن. اونینگ کوپه‌یتیریشیچه: «بیر کوزیم نی خوست‌ده عملیات قیلدیردیم؛ لیکن یخشی کوره آلمه‌یدی. حاضر ایسه باشقه بیر کوزیم هم کور بولگن؛ شفاکارلر پرده توشگن و عملیات بولیشی کیره‌ک دیه‌دیلر.»
شونینگدیک کابل یشاوچیسی عزیز‌الله نینگ ایتیشیچه: «کوزیم نینگ قاره بولیشی‌دن ایکی آی بوله‌دی؛ هر نرسه نی برق فکر قیله‌من، لیکن ینه هم کوریلمه‌یدی.»
بیزلرنینگ «ایکس» ترماغی ده هم تعقیب قیلینگ!
شفاکارلر نینگ ایتیشلریچه، کسل‌لیکلر گه چلینیش، کوزدن درست شکلده مراقبت قیلمسلیک و درست شکلده آوقتلنه آلمسلیک کوریش قیینچیلیکلری اصلی سببلریدن بولیب و هو افلاسلیگی، بیر قطار دارولردن قوللنیش و افلاسلنگن محیط‌لرده بولیش کوز آلرژیکی کسللیکلری سببلریدن دیر.
ینگی‌لیکده بیرلشگن ملتلر تشکیلاتی نینگ قاچقینلر ایشلری بوییچه عالی کمیشنری افغانستان ده ۴۰۰ مینگ کیشی نینگ کوزدن عاجزلیک و بیر میلیون ۵۰۰ مینگ کیشی نینگ کوریش قیینچیلیکلری گه چلینگنی نی اعلام قیلگنی بیرحالده،َ کوز کسللیکلریگه چلینگنلر سانی کوپه‌یماقده دیر.